منتديات منابر ثقافية

ربع ســاعه
أوّاااااه ..لو يتحقق اللي فـ بالي
وأرجع ربع ساعه لـ سن الطفوله ..
وأغيّر اللي من كبرت استوالي
في كلمةٍ نفسي بسببها خجوله ..
حوادث الايام .. قبل الليــالي
ناخت على صدري بكل الحموله ..
من وين ما لدّيت وجهي قبالي
الحظ بايعني بشسعة نُـعوله ..
ونصيبي اللي فالعمر ما صفالي
مع إني أركض له رجلٍ عجوله
حرمني من نعمة أربي عيالي
في هَــم لين اليوم ما أقدر أقوله ..
كل يوم يصليني بطاريه صالي
وأعيش فيه الحزن بـ أربع فصوله ..
والناس تحسبني خلي البال سالي
وتسيئ فيني الظن عرضه وطوله ..
لكن رغم هذا طموحي انفصالي
خذيت من قصة حياتي البطوله ..
مانبيب ليبرالي .. ولا رأسمالي
ولانــي مع ذوله ولا ضد ذوله ..
لكني مسالم .. وطبعي قتالي
على حسب مصلحتي فـ كل دوله ..
لذا أنصحك دوّر حبيبٍ بدالي
الحب .. به أشياء غير الرجوله ..
ضيّعت فيها من المحبين حالي
مع ان نفسي ما تضيع بسهوله ...
الشاعر : محمد بن ظاوي الكعبي