في صـُحبة ِ البـَدْر ~
 

~ مختارات من دواوين البـَدْر ~


//


http://www.wgfat.com/contents/newsm/22.jpg


ظماَيْ انت ~!



..ظماَي.. اَنت..
وَمن يعشق ظماَه غيري..!
..جروحي.. اَنت..
ومن يكره دواَه غيري..!
اَسقني لو ماَرتويت..!
داَوني لو ماَشكيت..!
ماَهقيت اِني اَشتاَق في حياتي لغيرك اَنت..,!
ماَدريت اِن ماَبه أغلى منك اِلا اَنت..
..ياَظماَي..اَنت..
ماَتصور اِن عيني مره تغفي وماَ اَشوفك
ماَتصور لويطول اَلصمت ماَ اَسمع حروفك
تدري اِحساسي بخوفي هو اَماني..
لماَ تسأل عني ليله عن مكاَني..
ماَتصور كيف تحرقني اَلثواَني..
شمعه في ليل اِنتظارك .!
ياللي يسبقني زماني من عطش ..ليلي لنهارك..
عطني موعد.!!
وانسى موعد.!!
بس ..لاتهجر..وتبعد
ياَظماَ قلبي لقلبي...
وغربة عيوني عن عيوني...!
وينك اَنت..؟
ياترى الليله
في صدري..؟
لا
في جفني..؟
لا
في اَلشعور اَللي خطفني..؟
اَاَه لوتدري بشوقي..

اَاَه ياظما الدنيا بعروقي..!




//

http://images.alarabiya.net/large_42114_68637.jpg




الليالي الوضح

في الليالي الوضح ..
والعتيم الصبح ..
لاح لي وجه الرياض ..
في مرايا السحب ..
كفّها فلة جديله من حروف ..
وقصة الحنا طويلة .. فـ الكفوف
من نده عطر الرفوف ..
لين صحاه ..
في ثيابك يا الف ليله..
وفي الهبوب ..
انثنينا يا هبوب النعاس .. والحلم ..
ألف غصن من اليباس ..
فز لاجلك .. وانثنى ..
اكسري الاوهام كاس ..والمواجع فم
وان عشقتيني انا ..
ما ابي من الناس .. ناس ..
ما علينا .. لو طربنا وانتشينا
آه .. ما ارق ( الرياض ) تالي الليل ..
انا لو ابي ..
خذتها بيدها .. ومشينا ..
يا نصيبي من الصور .. والرسايال
ومن كل شمس قايمه .. ومن كل ظلٍ مايل ..
يا مكاني من البيوت ..
ومن الصحاري اللي .. فرقت فكري قبايل ..
وين احب الليله .. وين اهيم ..
اقبلي مثل ديم ..
أو غصون النار تنبت فـ الغضى ..
وبين ما خلى من النخيل الفضا ..
وما نسى الغيم ..
أقبلي .. يا بختري عيوني من الربيع ..
وطل وجهي من الشتا ..
ومثل صوتي من الهبوب ..
اقبلي مثل الرياض ..
من تعاريج الدروب ..
في ضلوع الوادي ..
وين حبيتك قمر .. فوق طين أجدادي ..
وين احب الليله .. وين أهيم ..
ارفعي طرقة الشيله .. عن سديم ..
وكوبٍ وهاج ..
اقطعيني بنصل طرفٍ سادرٍ وحجاج ..
شقيقيني يالهبوب العارضية ..
واهدمني سياج ..
لين أغني الهوى ما هو خطيه..
يالعفاف اللي تسربل بالبياض ..
كل ما قربت يدينا ..
ناض طير.. وجض ريم ..
ما علينا ..
آه .. ما ارق الرياض تالي الليل ..
انا لو ابي ..
خذتها بيدها .. ومشينا


//

http://up.graaam.com/uploads/images/...243fa3cd36.jpg



انت ِ حلم

انتظرتك .. عمري كله .. وانتي حلم
ومرت الايام والله .. وانتي حلم..
ليه تأخرتي علي ..
توهي مره واسالي ..
كوني في غير الزمان .. والا في غير المكان
كوني عمري .. عمري كله..
اللي باقي .. واللي كان..
انتظرتك عمري كله .. وانتي حلم ..
كل نجمه شعشعت والقلب عتمه .. كانت انتي ..
كل حرفٍ حرك شفاهي بكلمه .. عنك انتي ..
وكل حبي اللي مضى والحب قسمه .. منك انتي ..
كانوا الاحباب ظلك .. بعض احساسك ونورك ..
ما عرفتك يوم كلك .. ياللي في غيابك حضورك ..
انتظرتك عمري كله .. وانتي حلم ..
هذا إنتي .. قولي والله إنه إنتي ..
وين غبتي ؟! .. عني هذا الوقت كله ..
وين كنتي ؟! ..
شيبت عيني طيوفك .. وما أصدق إني أشوفك ..
ياللي قلبي في كفوفك .. نقش حنا ..
وفي جديلك عطر ورد ..
آتمنى .. لو تكوني في فراغ اعيوني وعنى
وفي سموم ضلوعي برد ..
ليه تأخرتي علي ..
وما طرى لك تسألي ..
ليه تأخرتي علي .. وما طرى لك تسألي ..
إنتظرتك عمري كله عمري كله .. وانتي حلم


//

http://www.sahm-ahsas.com/up//upload...596569174a.gif




أوقات

أوقات ياخذنا الحكي ..
وننسى بالحكي أوقات ..
واوقات .. يا ليت الكلام سكات ..
يجرحنا الحكي ..
اسهر .. مع حبيبي .. يا قمر الكلام ..
لين يغفى حبيبي .. وجروحي تنام ..
ابعد عن حروفي .. وعن المي وخوفي ..
وابحر في سفينه .. عن بحر الظلام ..
وصلنا مدينه .. من عطر وغمام
انا وين القى كلام .. ما مر فــ كلام
اوقات .. يا ليت الكلام سكات ..
يجرحنا الحكي ..
بغني لعيونك .. في حزني وفرحي
وبكتب عيونك .. قصيده لجرحي
واخلي ابتسامك .. دموعك كلامك
قمر هالسوالف في ليل السكوت ..
ولو الف نجمه في عيني تموت ..
في حزني أحبك .. ويأسي أحبك ..
أحبك .. مااقول أوقات


//

http://www.sha3erjordan.net/images/library/albader.jpg




حبيبتي يا حلم

قصت ظفايرها .. ودريت
البارحه .. جاني خبر ..
أدري لبست خاتم عقيق ..
وتقرا لها كتاب .. عتيق ..
كتاب .. واظنه شعر ..
أحفظ أنا حجار الطريق .. اللي يودي لبيتها ..
واعرفها زين ..
واعرفها زين ٍ وانا ..
لا شفتها ولا جيتها ..
قابلتها صدفه .. على شفاه الصحاب ..
همسة أمل حسيتها
ودمعة عذاب ..
وصارت هي الخبر الجديد ..
وعلومها همي الوحيد
وش عاد .. لو كانت بعيد ..
بين الحروف حبيتها ..

حبيبتي .. يا حلم ..
ياللي أعرفك اسم ..
وجهٍ تصوره الحروف .. واتخيله ..
نجم ٍ احس انه قريب .. ما اوصله ..
انتي اللي اعرفه .. زين ..
واللي اجهله انتي ..
حبيبتي .. وياليتها ..
اعرفها زين وانا .. لا شفتها ولا جيتها ..



//

http://i42.tinypic.com/33xub84.jpg



صـعــب الســؤال





صـعــب الســؤال ........ صـعــب السـؤال

لـيـه نـفـتــــــرق ........ لــيـه نـفـتـــــرق

ويــن نـلـتــــــقي ........ ويــن نـلـتـــــقي

انـت الجـنوب وانا الشـمال مابـيـنـنا بحـر ورمـال

لكــن نحـــب والله نحـــب فـــــــــوق الخــــــــيال

صعـب السـؤال

ياللي اجـمل من كلامي عـنك واقـرب من سكوتي

آه ياطــول المــسافة بـيـن احـــساسي وصــوتي

ماهـو غـريب اني اسالك

وانـت انــا كـيـف كـيـف اوصلـك

لامستحـيل هـذا الـرحـيل

لكن نحب والله نحب فوق الخيال

صعـب السـؤال

قـصـيدتي وين الحـروف جـف القـلم

ياضايعة بـرد الكــفـوف رعـشة الـم

قـصيدتي الا الندم

سافــري وانـت مـعي وبـتـرجعي وانـت مـعي

قـصيدتي لاتسمــعي غـــــــــير القـصـــــــــيد

ياساكـنة في ورق الحـشا وحــــبر الــــــوريد

صعـب السـؤال ..



//

http://www.elbader.net/bo/images/bader_picture.jpg



جرحي بخير



ومرت سنه .. على فراقك
على صوتك .. واشواقك
غريب كيف االزمن يرحل
واحلام العمر .. تذبل ..
سنه مرت .. وانا أول ..
حبيبٍ يوقد الشمعه
لجرحه في يوم ميلاده
هلا .. بالحب .. واعياده
وكل عامٍ .. وجرحي بخير

مشيت دروبنا .. خطاوي قلوبنا
ومريت الوعد .. وعدنا العام
ماكان الوعد .. ولا الأيام .. هي الايام
وما ادري ليه هالشارع .. نسوه الناس
ومتى هالمقعد الخالي .. يجوه الناس
حبيبي .. ليه فـ غيابك .. يغيبوا الناس
حبيبي .. ايه والله حبيبي .. ايه والله
نساني العمر.. لو انساه
نساني الفرح .. لو انساه
احبه .. ما ظهر نجم .. ونبت عشب .. وسرى براق
أحبه .. لا زمن يشقي جروحي .. لا جفا .. وفراق
أنا هذا الهوى كله .. وقلبي آخر العشاق ..



//

http://i34.tinypic.com/2dqlk0m.jpg




عندك أمل



عندك أمل .. عندك ..
محتاج أمل منك ...
يا فرح عمره ما اكتمل ...
يا جرح لسه ما اندمل ...
محتاج أمل منك يكون ...
طاغي الخطى .. دافي العيون ...
وعندك أمل عندك ...
عندك أمل يضوي .. نجومي في السما ..
عندك أمل يروي .. يروي بساتين الظما ...
محتاج أمل منك يكون ...
طاغي الخطى .. دافي العيون ...
وعندك أمل عندك ...
إنت حبيبي ... والهوى صحبه وطريق ...
إنت رفيقي ... وما ابي غيرك رفيق ...
محتاج أمل منك يكون ...
طاغي الخطى .. دافي العيون ...
وعندك أمل عندك ...



//

http://www.mzmz4.com/sh3r/images/33.jpg



لا تسأله ناسي


لا تسأله ناسي .. خله مثل ما هو
ياقلبي إحساسي .. ماهو معي هو
والله لا أمر .. صوبه لا امر
أصرخ بامر .. أبكي بامر
ما التفت .. لو هو العمر
وما ينحني راسي ..
كافي .. ترى ذل
يا خل .. ياخل
مكسور انا الخاطر
في نظرة الكل
لا تذكرني .. وجه مع الناس
لا تصبرني .. ما في الجفا إحساس
ضاع العمر .. وانت لا شمس لا ظل
والله لا أمر .. صوبه لا امر
ما التفت .. لو هو العمر
وما ينحني راسي ..
جف الكلام ..وسكت الدمع
الليلة .. با طفي الشمع
باترك ملامح .. صورتك تحت الغبار
واترك شوارع ديرتك .. لارض النهار
با نساه انا ... ما ادري متى
بالصيف يمكن .. او فـ الشتاء
والله لا أمر .. صوبه لا امر
أصرخ بامر .. أبكي بامر
ما التفت .. لو هو العمر
وما ينحني راسي ..

//

http://www.al-jazirah.com.sa/208443/lp01.jpg



ردي علي الصوت


ردي علي الصوت .. ردي حياتي
صمتك على شكوى حنيني .. مذله

اما اقطعي بالوصل حبل النجاتي
والا عطيني باقي الود .. كله

لا توعديني .. عذب الصبر ذاتي
والبعد حالي مع عنا الوجد سله

اشكي الجفا لك .. ما شفيتي شكاتي
الوعد الأول للقا .. فات حله

يرضيك يصبح شملنا للشتاتي
يرضيك نرضي كل نفسٍ مغله

يرضيك لا فرحوا بهمي عداتي
واقفوا يقولون .. الغضي عاف خله

ردي علي الصوت .. يكفي السكاتي
قولي لغيرك ماهفا القلب للّه






//

http://images.alarabiya.net/%D8%A8%D..._2149_4683.jpg




تخــيــّر



انـا ماشـــير بالفـــرقا ولا احــدك عـلى المقعـاد

تخـير في طــريق الـوصـل والا درب هجـــراني

حـرام الوصـل مايجمع قـلوبٍ عـن هـواها بعـاد

وبعـض البعــد لـو عــــذب يجمـع بين خـــلاني

تحـسب ان الهوى ضحكة دقايق عشتها فميعاد

الى مارحـت تـنساها وتـنسى الوعـد وتـنساني

الا ياصاحـبي الرفـقة تـرى ماهى ثـياب إجـــداد

تـبـدلها مـتى ملـيـت وتلبـس غـيــــرها ثــــاني

الى ضـاع الـوفـا مـابه هـوى بارجـيه انا ووداد

ترى ذا الفـرق بين اقـرب قـريب وبين عـدواني

تحاكيني بطـرف لسان وهرجي من صميم فـواد

وتـقـف مـن بعــيد ويـم درب المـــوت تنحــاني




//

http://center.jeddahbikers.com/uploa...2760795044.jpg







قصة حب


فـ كل قصة حب أحلام ومدينة ..
ليل ونخيل وهبوب ..
لكل قصة حب لو كانت حزينه ..
أجمل ألوان الغروب ..
ناظري ضيّ الحوانيت القديمه ..
ونقش أبواب البيوت ..
كلها شعر ومواعيدٍ قديمه ..
وصوت قلبـي اللي يموت .. وما يموت ..
لكل قصة حب .. عذال وحسود ..
ليه تخدعنا الأماني .. والليالي السود .. سود
إشعلي جمر العناد .. قربـي معاد أشوفك ..
لا يفرقنا السواد ..
ارسمي وجهي بكفوفك ..
ولا تجرّحنا عيون الليل .. وحروف النميمه
ولا يعذبنا السكوت ..
إن عطشنا أو شربنا الدمع ديمه ..
للهوى بنحيا ونموت ..
لكل قصة حب أشواك وورود ..
وليه نصرخ من ألمها .. وكلها تنبت في عود ..
ناظري هذا قمرنا لو تغطيه الغيوم ..
وناظري هذا شجرنا مهما تحرقه السموم ..
ولو تجرّحنا عيون الليل وحروف النميمه ..
ولو يعذّبنا السكوت ..
إن عطشنا أو شربنا الدمع ديمه ..
للهوى بنحيا ونموت ..






//

http://photo.goodreads.com/authors/1...p5/2997878.jpg





لا تنساني




خريف ..
اوراقك الصفرا .. خريف ..
والضحكة الصفرا .. خريف ..
ملت .. مواعيد الوله ..
قلبك دله ..
وقف .. النزيف ..
وش عاد .. لو تكذب علي ..
إكذب علي ..
ما عاد .. فرحني غزل ..
ما عاد .. عذبني امل ..
ياحب ناداك الرحيل .. رد الندا ..
إخترت عن عيني بديل .. وكان المدى ..
أعطيك .. وش عندي قليل ..
صرخة .. وصدى ..
اللي بيدي إني اذوب ..
واشتاق لك .. طيف وصور
ولو هو بيدي .. امحي الدروب ..
والغي المواني والسفر ..
وآه من السنين .. يا حبيبي ..
من اللي ما ينسى مين ..
واللي يعيش ينسى ..
ومر الزمن ليلة ..
ليله .. بعد ليله ..
اسهر .. وانادي له ..
وأحيا على .. باقي عطر..
فـ أطراف منديله ...
ويلاه ... يا ويلاه ..
قلبي أنا ويلاه .. أسهر أنادي له ..
وامر شباكه عسى .. تضوي قناديله
يا حبي اللي ذاب ...
ما للزمن أصحاب ..
صدقني ما أدري لمتى ..
إنت وانا أحباب ..
وآه من السنين
لا تنساني .. هذا الكلام اللي بقول ..
لجل المطر .. لجل الفصول ..
لا تنساني ....



//

كذبه


من الشمال هضاب ..
ومن الجنوب وادي ..
وما بينهم ( كذبه ).. القرية العذبه..
طين ونخل وقباب ..
سورٍ بلا ابواب
وأظن ميلادي .. ماله زمن وكتاب ..
لكن ولدت فـ يوم .. وولادتي صعبه ..
قالوا سنة ما غاب .. مات .. أو رحل ( شرشاب )
ترف الشفاه مثل الجناح ..
ويطير الحكي .. يطير
فـ الاعياد .. يقولون :
كان يحرك الناس عرايس ..
بقطعة خشب وخيوط ..
يشعل المعارك .. ويرتب الأعراس ..
ينهي الجدل .. ويعلق الأجراس ..
يتعب الأنداد .. متبعثر الأبعاد ..
ويجمع عيون الناس فـ احداقه
ويعزي في الموتى .. ويبارك الاولاد ..
يكتب لكل طفل ورقه ..
ويغطيه بلحاف ..
مثل الكهوف مظلم .. ومثل الغدير شفاف ..
يصهر حديد البنادق ورق .. ويبري خشبها اقلام ..
ويحرق البارود .. ند .. وخشب صندل ..
ويبدا من الحنظل .. وينتهي في الشهد ..
بعض الليالي عبد .. وباقي الليالي طيف ..
كذبه .. مثل سوالف الجن .. مالها آخر
ومثل البحر زاخر .. بالحقيقه والخيال ..
ايام تحملها الجمال .. شمال ..
لجبال .. تكسيها الثلوج ..
وين المروج .. وعرايش العنب ..
وايام ينهكها التعب ..
وتجلس على اطراف الدروب ..
وتقابل الصحرا جنوب ..
تعد أعواد النبات الناحله ..
في السراب ..
وين اختفى شرشاب ؟
في الليل واجساد الحطب ..
تلوى .. وتصرخ .. ويجلدها الحطب ..
يصبح كلام الليل غير ..
وترف الشفاه لكن .. يموت الطير الأول ..
ويظهر بداله طير ..
وشرشاب يرجع .. من عج الاساطير ..
وضباب القوافي ..
لا هو مريض .. ولا متعافي .. مثلنا ..
لحم .. وعظم .. وعيون ..
واسمعهم يقولون : لو هو حرير وخز ..
أحيان .. يهتز ..
مثل انعكاس الغصن ..على الما الجاري ..
وترتعش كفه .. وسط العواصف ساري ..
وما يحرك الا .. حجانه الكثه ..
تظهر .. وترشح .. اوجاعه الرثه ..
على سطح الجديد من الثياب ..
تنشب حروفه فـ الضروس .. وتنقطع انفاسه ..
ذكرى الجنايز والعروس .. تتقاسم احساسه
يرجع لنا من كل الدروب دخان ..
ومن العزايم دله .. وشظايا فنجال ..
مشوش ٍ .. كله .. كله ..
عج .. ودموع .. ومناديل ..
في الريح .. قبل الغروب بشوي ..
يطيح العج .. وتهدا الهبوب ..
( وكذبه ) .. تجلس على الساقي ..
تغسل التراب .. عن وجهها الطيب ..
وعن قلبها الباقي ..
وتناظر الشمس اللي تغيب شوي .. وشوي ..
والما يترقرق صافي .. فـ ضلوعها ..
بين ضلوعها .. وبين النخيل
وتتذكر ايام الرحيل .. وتسترجع اوقات الغياب ..
شرشاب ..
كان المصابيح في السوق .. والمدفأة في البيت
وما يحرق الكبريت .. من تبغ .. ومن عود ..
يخيط .. جناح الفراش الأبيض المحروق ..
بسلوك الرماد ..
كان الخضار .. لزرعنا .. وكان الجراد ..
كان الوله .. وعطر المكاتيب .. ووشوشات النبات ..
يرمي الحصاة .. قبل الغدير ..
ويجني الرطب قبل اللقاح ..
ولا تطعن اطراف الرماح .. الا ما يصيب ..
كان الغريب .. اللي يعلمنا الوطن ..
( كذبه ) .. تظهر عليها الشمس من كل الجهات .. في الصيف
ما هي شمس وحده .. تقول الف شمس ونيف ..
بس الغريب .. ان ظلالها داكن ومظلم وعميق التجاويف ..
مثل صدور أهلها ..
ووقت السوالف والحكي .. اطفالها شيبان ..
وهذي عجوز ترتكي .. على ظلها ..
يوم ابتعد عنها الجدار ..
قالت وانا من هالنهار .. هارب للظل ..
الله المستعان شرشاب
اتذكره وأنا شباب ..
يعزف الرباب ..
ويحفظ قصيد بني هلال ..
ويرقص بمطرق خيزران .. وسط الحفل ..
ثوبه نظيف لو هو عتيق ..
وما في الجيوب .. ( لو بيزه ) وحده ..
يبيع الحطب .. ويشعل قناديل الدروب ..
قبل الغياب ..
ودايم تشوفه جالس لوحده ..
وفي يوم جا خطاب .. قالوا يبي ( مزنه ) ..
نقول : هذا خطيبك في الحفل .. يرقص بمطرق خيزران
الله المستعان ..
والى متى الكذبه .. يا ( كذبه ) .. والحكي في الغياب ..
وين ادفنوا ( مزنه ) .. ومتى رحل شرشاب ..
فوقي يمر غراب .. وتحتي كسر من طين ..
اطلال هالمسكين .. وملامحٍ لبيوت ..
كانت غتر وبشوت .. عطر وكحل وشيال ..
حضر الزمان وغاب .. واللي عرف شرشاب ..
ما انصف الرجال .. لكن ظلم ( كذبه ).



//

العطش


آه ..يا العطش
جفت اشفاهي
وصوتي الواهي ارتعش
لو حبيبي ما .. ما سقاني الما
لو شربت أظما لحبيبي .. وللعطش

يا سموم القيظ ..جفت عروقي
تحتي الرمضا..واللهب فوقي
والعطش شوقي .. وشوقي للعطش
اسقني عيونك حبيبي .. أو أموت
ما ابي رمشك نعش

يا وسامي الحب ..امطري في القلب
الزهر والعشب ..قلبي يا مطر
الظما .. والجوع .. بعدك .. والدهر
لو حبيبي ما .. ما سقاني الما
لو شربت أظما لحبيبي .. وللعطش



//

حسايف


التفت ...
وتوها ... توها ما اختفت ...
ماكساها الليل ... باللون الحزين ...
التفت ... وتعالت صرخته ...
في نظرته ...
صاح ... لكن بالنظر ...
وانكسر .... شوفه عثر ...
حسايف .. تذبل الضحكه وهى بين الشفايف ..
تذبل الفرحه وتضيع ...
ويصبح الكون الوسيع ...
مايكفي خطوتين .. لاكساه الليل بااللون الحزين ..
يوم مدلها يده ..
كانت الرجفه لقا ..
ودعت فيها الشقا ..
وتركت بين الاصابع ..
عطــرهــا ..
وعمرها ... عمرها ماجت على وقت الوعد ..
إلا ذاك اليوم ..
وعمرها .. مابكت .. وماضحكت ..
ماحكت له .. واسكتت
مثل ذاك اليوم ..
كانت اجمل من خياله .. كانت انظر ..
كانت اكثر .. من أماني عمره الظامي حنين ..
واختفت .. من كساها الليل باللون الحزين ..
اختفت في الطريق اللي معه..
كانت تجيه ..
كيف دربٍ جمعه معها .. خذاه..
ليتها اختارت سواه..
تزرع الفرقا لياليها .. عليه ..
وحسايف ... حسايف








//

سيدي قم



سيدي قم...
ما خبرت اللي يحب يشتهي النوم
سيدي قم...
لاتنام وفي السماء باقي نجوم
يا جريح البارحه
كيف طبت اليوم
سيدي .. يا سيدي قم

سيدي ...الليل للعاشق نهار
قم معي ... نجمع نجوم الظلام
سيدي ... لو عرفت الانتظار
ما غفا لك جفن .. .يا عذب الكلام
اه لو تدري الهوى والسهر مقسوم
يا جريح البارحه
كيف طبت اليوم
سيدي .. يا سيدي قم

سيدي ... لا تناظرني بغضب
ودي تحس مثلي بالغرام
سيدي ... ما وراك إلا التعب
ليت عيني مثل عينك تنام
اه لو تدري الهوى والسهر مقسوم
ويا جريح البارحة كيف طبت اليوم
سيدي .... يا سيدي قم



//

الفتاة الغايبة


و سـلامـي .. لمن سـأل عـنـي ..
أنـا من أشعـل .. عـيـون الفـتـاة الغـايبـه.. شـمـس بـكـلامي..
ليـن تـركـوني النـاس .. و راحـوا لضـي عـيـونهـا ..
و رجـعـت نفـسـي طـايبـه.. أجـرّ ظـلـّي ..
و كـان لي .. ظـل ثـقيـل .. تعـلق .. بعـود نحيـل ..
و القـلـب رجـل عـايبـه .. ترقـا جـبـل ..
ردوا ســلامـي .. لمـن سـأل ..

يحـينـي الـكـلام .. قـولي .. قـولـي أعـرفـك ..
انت من يحـمل جـذوع الـشـجـر للـماء.. ولنـور القمـر ظـلمـا..
أنت اللـي مـردت الـقــوافـل .. تطـلب التـرحـال ..
و زيّـنـت الـشـمـال.. نجـمـه .. وعـلـّمـت الغــلام .. اســمـه ..
ليـن انتـهـض .. رجـال .. يحـيني الـكـلام .. قـولـي ..
في بعـض الـكـذب .. رحـمــه..

الوقـت يمضـي .. صـديـقتـي.. والنـاس تمـضـي ..
وهـالحـراس باقيـن .. على ورق هـالـتيـن ..
والكـوكـب الفضـي .. والبـوح بالأحـسـاس ..
تتـغـيـر الألـوان .. الا الـسـواد .. متى الـسـواد يمـضـي ..
تـوي رفـعـت الأرض .. سـجـده .. وســبّحـت لـه.. وحـده ..
و صـار الـرمـاد .. ومـضـي .. و كـل الـذنـوب .. غـبـار ..
و دمـوعـــي الأمـطــار ..

صـديقـتـي .. يحـينـي الـكـلام .. قـولي .. لمـن سـأل ..
أنا من اشـعـل عيون الفـتـاة الغـايبـه .. تيـه وخجـل ..
ليـن تركـونـي الناس .. و رجـعـت نفــسـي .. تايبـه ..
مـن كـل.. مـا في النـاس .. و كـل مـا فـينـي .. الا .. الكـلام ..
أنا..الكـلام يحـيني .. يحـيني الكـلام .. قـولي ..
لاجـل الفتاة الغايبـه .. من هالعــتيـم .. تعـود ..
وردي سـلامـي لمن سـأل .. ان كـنت أنا مـوجـود.. مـوجـود..
و الحـلـم .. رجـل عـايبـه .. ترقـا جـبـل ..
و سـلامـي للـفتـاة الغايبـه ..



//

الفجر البعيد



نامت عيونك
وصحى الليل مظنونك أغاني
قصّت جناح الثواني غيبتك
وصارت الساعة أماني
وآهـ ..آهـ
أنا حروفي في غيابك
لا هي حكي ولا هي قصيد
أكتب الظلما وأعيد
وإنت يالفجر البعيد .. نامت عيونك

إسهر معي ليلة
حاول تحس بلوعتي ليلة
عد النجوم وش كثرها.. ياللي بقلبي كثرها
نام .. القمر فـ وسادتك نام
ليتك تغير عادتك
خل القمر ليله.. يسهر معي ليله

أنا حروفي في غيابك
لا هي حكي ولا هي قصيد
أكتب الظلما وأعيد
وإنت يالفجر البعيد.. نامت عيونك

يا ساحر البسمه .. أساهرك نجمه
وابسمعك كلمه .. كلمه و لو كلمه
قم نادني .. يالله عسى تحتاجني
وإن مر ليلي ما سألت
وإن زاد ظلمك ما عدلت
آهـ.. آهـ
أنا حروفي في غيابك
لا هي حكي ولا هي قصيد
أكتب الظلما وأعيد
وإنت ياالفجر البعيد.. نامت عيونك



//

سلمى



اللـي طعنّي بين الاضـلاع وأدمى

هذاك نــدٍ لي ونعمـين فارس

ومن ينطح الوقت الردي قلبه أعمى

كم عامـرٍ خـلاه بالقاع دارس

يـابنت مـالي قلب بـالحب يرمى

كفي سهـام الفاتـرات النواعس

المـا عيـوني أظهـريني مـن المـا

وأنـا غريـق الدمع والريق يابس

ظميـان من مثلي من النـاس يظما؟

وأنـا علـى أحلى الينابيع حارس

والله يالـولا فيّـة عيـون سـلمى

ماشوف كل الناس ضاحك وعابس

مـن طـاب لي بالنـور ماني بظلمة

ومن جـادلي بالغيث مـاني بحابس



//

صوتك يناديني



تذكٌر .. صوتك يناديني ...
تذكر ... تذكر ...
تذكر الحلم الصَغير ...
وجدار من طين وحصير ...
وقمَرا ورا الليل الضرير ...
على الغَدير ...
لاهَبٌت النسمَة تكسر ...
جيتي من النسيان ...
ومن كل الزمان ...
اللي مَضَى ... واللي تغٌير ...
صوتك يناديني تذكٌر ...
ناديتي ... خانتني السنين ... اللي مَضت راحت
ناديت ... ماكن السنين ... اللي مضت راحت
كنا افترقنا البارحة ...
البارحة .... صارت عمر ...
ليله ... أَبَدْ عيٌت تمرٌ ...
ياجمرة الشوق الخَفي ...
نسيت أنا وجرحك وفي ...
يتذَكر الحلم الصغير ...
ريانَة العُود ... نادي ...
نادي الليَالي تعُود ..
بشوق الهَوى ... بوعُود ...
بوجهي اللي ضيعته زَمَان ...
في عُيُونك السٌود ...
ياالضحكة العَذبة ...
عَنك الصٌبر ... كِذبه ...
وفيك العُمر موعود ...
اشتقت للحلم الصغير ...
واشتقت لجدار وحصير ...
وقمَرا ورا الليل الضرير ...
على الغدير ...
ان هبت النسمَة تكسر ...



//

نجمه ونهر


لو حبت النجمه نهر .. وطاحت على صدره سنا

أن مرت الغيمة قهر .. وان هبت النسمة قهر
والى رمى طفلٍ حجر .. عكر مواعيد الهوى
انتي وانا نجمه ونهر .. وطالت مشاوير السهر
بينك وبيني الغيم ....
والشمس .. واغصان الشجر ..
وحكي العواذل والحذر ..
ولو رمي طفلٍ حجر .. عكر مواعيد الهوى
يابنت للنجمه سما .. وانا لي الوادي
ماختار في قربك ولا ... اختار في بعادي
امشي .. ولاودي .. لوتمسكي يدي
لااضيع فـ أمواج البحر .. ويفوت ميعادي
ان مرت الغيمه قهر .. وان هبت النسمه قهر
لو حبت النجمه نهر


//

يسعد صباحك

يسعد صباحك .. ليلنا تو ماجا
الشمس غابت واشرقت عندكم ... شمس
هى شمسنا اللي في جبينك تلاجا
والا قمرنا اللي فقدناه من امس
لليل السما برد وسحاب وعجاجا
يامن يشب النور .. في الخاطر العمس
انتى وانا لو كنا نتناجــا
لاماطفت في خاطري .. شمعه الهمس
يالى جرحتك ... مالجرحي علاجا
ادري الجروح النازفه تكره .. اللمس
بقول احبك .. وان عقدتى الحجاجا
!!اقولها ثنتين واربع مع خمس ..؟
ويسعد صباحك يابعد كل ماجا
ماراح من عمري .. وانا في رجا الشمس



//

رسالة


إلى من .. يهمها أمرى .. إلى من ..
رجاءٍ .. إلى متى صبري .. رجاءٍ
أنا لن .. اشتكي .. همي لغيرك ..
ياروحي ..اشتكي روحي على من
رساله .. حبرها ..دمي ..
رساله ..تصرخ ابهمي ..إلى من ..
سألت الرمل .. في دروب القوافل ..
سألت الجدب .. عن لون السنابل ..
سألت الناس عن وجهك حبيبي ...
عن الشمس .. ومتى تشرق مساءً
أحبك ..يالصحاري اللي ..
فـ هجيرك .. احترق كلي..وفاءً
كتبت لواحة عيونك رسايل ...
بسراب الدمع ... وانفاس القوايل ..
كتبت وذي ترى .. اخر رسالة
أحبك .. وان نسيتيني .. وداعا




//

ثلاث ملامح لوجه واحد




على الغدير كانت سما..
ويرمي الضما وجهي عليه
على الغدير .. وجهي وسما ..
لين ارتمى وجهك عليه ..
على الغدير ..
وجهي .. ووجهك والسما ..
من يسبق ويملى يديه ..
يشرب ملامح صاحبه ..
ليت السحاب ..
يظهر على المدى الباهت ..
وتمر ثلاث طيور ..
بين العتم والنور ..
ينبت شجر .. واعشاب ..
وطفلٍِ يبيع زهور ..
يولد ..
وتتحول الاخشاب ..
كرسي ..
واجلس انا وياك ..
قبل الظلال هناك ..
في أخذ الصوره ..
على سلة السيف الصقيل ..
يتكحل سيفين ..
وينزف قتيل ..
واليوم عيد .. يا اللي الجفا وصلك ..
ومشغولة في كحلك ..
وشلون انا بحايدك ..
امرايتك سيف ..
و ذ بحي انا .. عوايدك ..



//

العمر أحبك




لليل أحبك .. مابقى في السما نور
والى ضواني الليل .. للصبح أحبك
واللحظة اللي كلها صد وغرور
اشوف قبري بين عينك وقلبك
في صدري سراجٍ حزين ومكسور
رغم المطر والريح ... شلته افدربك
والله مابه غير لوعاتي قصور
وخوفي عليك الله ربي ..وربك
إلى متى ببني على صمتك جسور
لاحيرتني اسباب سلمك وحربك
العمر احبك... مابقي فينى شعور
ومتى جفاني العمر ... وشلون أحبك



//

عطني المحبة



عطني المحبة ..
كل المحبة .. عطني الحياه..
عطني وجودي ..
ابغى وجودي .. أعرف مداه
املا شعوري .. بالحب مره
ابغى هواكم.. حلوه ومره
وأغلى الأماني .. عاشت في غربه
ياعمر ثاني .. عطني المحبه
عطني في ليل الياس شمعه ..
وبسمة نهار..
عطني في ضياع العمر دمعه..
وسكة ودار ..
واعطيك أمل في الحب غالي ..
يصعب على غدر الليالي ..
وأغلى الأماني .. عاشت في غربه
ياعمر ثاني .. عطني المحبه




//

الرسايل


وليله كانت الفرقا
و قالت لي .. فـ أمــان الله
و ليله ذكرها يبقى
على جرحي .. و لا انساه
و جت تاخذ رسايلها ..
و خصله من جدايلها
و تديني جوباتي
بقايا عمر بسماتي
و قالت لي .. فـ أمــان الله

في ليله كنها الليله عرفتك بسمتي و فجري
و ليله زي ذي الليله و هبتك في الأمل عمري
و يا ليت البسمه ما كانت ولا الاحساس
وياليت الدنيا خانتني و كل الناس
و لا خنتي هواي انتي
و لا قلتي .. فـ أمـان الله

لا تردين الرسايل ويش اسوي بالورق
و كل معنا للمحبه ذاب فيها و احترق
لو تركتيني في ليله بسمتك عند الرحيل
دمعة العين الكحيله عذرها الواهي دليل
و ليله كانت الفرقا
و قالت لي فـ امان الله



//

الجرح .. والنزف



قـــــــال مجــــــروح جــــاوبـتـه نعــــــــم

قـــــــال ماشــــــــــوف بــك آثـــــــــار دم

قـلـــــت وان كـــــان في ذاتي الـنــــــزيف

قـــــــال مابــــه نـــــــزيفٍ مــن عــــــــدم

قـلـــــت وان خـــان بي اغـــلى حـــــبـيـب

قـــــــال وهــــــــــم بـنـيـتـه وانهــــــــــدم

قـلـــــت ماعــــــذبك يـــــــوم الـفــــــــراق

قـــــــال درب وتـمـشـــــــيـه الـقـــــــــــدم

قـلـــــت مابـــه ســـوى جــــلدك شعــــــور

قـــــــال غـيـــــره فـــــلا حــــــس بالــــــم

ياوســـــيـم النـــاس لـــو قـــلبك وســـــيـم

واكـــــــرم النـــاس في غـيـــــر الكــــــــرم

عـنـــــدك الظـــــلم عـــــــدل في الهــــــوى

واعــــــــدل العاشقــــــــين اللي ظــــــــــلم

انـت لــــو كـان في حــــــــبك حـــــــــــــياة

كـان خــــــلى حـيــــــاتـك لـــــــــه طـعـــــم

اتعــــــس الخــــــلق مــن يرجي هــــــــواك

مااضيـــــع النبـــــض في قــــلب الصــــــنم



//

بس أحلم




صحيح اني انسى الحوادث والملامح و الاسامي..
لما أكتب عن غرامي .. شعر ابعد ما يكون عن مجرد
جرح دامي ..
يمكن أقرب للجنـــــــــون...
من تفاصيل الحكاية..الاساور والمرايه..
عندي همــــــوم القصيده غامضه صعبه عنيده..
وانت عاشق للوضــــوح ..
ودك بسري ابوح..و انا اخر همي بــوحي
اعبر الشارع ... في الرصيف الثاني قهوه
فيها اربع طاولات ..وحده اجلس فيها وحدي ..وحده للي بيجي بعدي .. وحده لأغلى حرف عندي..أما اخر وحده دايم للي فات..
من هموم وذكريات ..زحمة لكن كل من في القهوه ربعي
كلهم دمي و دمعي ليه ما تجلس مكاني
وهذا شوفي وهذا سمعي اطلب اقلام ودفاتر ..وحاول اكتب عن شعور ..لاهو ظلما و لا هو نور ..
قلب مابين السطور .. وانا اكتب اغنيه مثل الرسايل كنت اكذب .. و الخيال العذب كذب ..
كنت لازم اخفي سري و ما اقول
ان هالمره قصيدي هو خيالات الحقــول تطرد اسراب الطيور عن حقيقه عن شعور ....
ما هو في ذهب السنابل .. انما تحت الجذور ..
كســـــروا العشـــاق بابي ...
قطعوا لحمي ثيابي.. وخلعوا الادراج ..
طاحت مزهرياتي الجميله شققوا جفني كتابي وسألوا
وين الجديله
ودمعة العين الكحيله مالقوا في بيتي الا .. وما لقوا في صدري الا .. وما لقوا في قلبي الا ..
امنياتي المستحيله ..
و اني احـــلم بـــس احلــــم ..




//

موت وميلاد



فـ عيني تغيب الشمس .. وتشرق افـ عيني
في ناظري للشمس .. موتٍ وميلاد
لليل في دمعي سنا .. نجمتين
وللصبح في جفني شفق هم وسهاد
كن السهر دربٍ عليه ابـ تجين
ولا ودي أقطع درب لاماك برقاد
ياللي جميع الناس بينك وبيني
وكل لحظة أنا نتظر منك ميعاد
عذري لياسي منك .. إنك تبيني
خنت الرجا.. وان صنت لي عهد ووداد
ولمصافحك ربي خلق لي يميني
أمدها لك وصل وأمدها بعاد
البسمتك ترخص غوالي سنيني
جرحي يهون ووجاير الشوق يزداد
أنسى عذاب العمر و ما أنسى حنيني
تبلى ليالي العمر وجروحك جداد



//

وين تبدا هالمدينة




وين تبدا هاالمدينه .. كل يوم ..
من رصيفٍ عاريٍٍ تحت النجوم ..
من عناوين الجريده ..
في المواني .. وحمرة عيون المسافر ..
ضحكة الصبح الجديده ..
أخر اوراق التذاكر ..
اوبعد حبر الختوم ..
وين تبدا هاالمدينه .. كل يوم ..
ودي اعرف هاالعواصم ..
وأبي ابدا من يديها ..
ودي انزع من اصابعها الخواتم ..
قبل لاسلم عليها ..
ودي تجمعني بها لحظه حميمه ..
وين تجلس هاالمدينه ..
في العماير .. في الدواير ..
في الدكاكين القديمه ..
اوتحت اهدابك انتي ..
في صدري احساسٍٍ شهي ..
لو يدوم ..
وابي اعرف وين تبدا هاالعيون .. وتنتهي ..
كل يوم ..؟
مدري وش سر العوصم .. والمداين .. والعيون ..
ومدري وش سر الجنون ..
اني اعرف ..
انتظرتك في محطات القدوم ..
وفي مواعيد السفر ..
صك شباك التذاكر ..
وانمحى حبر الختوم ..
وما عرفتك ...



//

ارفع جروحك


إرفع جروحك عن وصال الخناجر

نزفك عزيز ومثلك النجم لاطاح

ولاتنحني للريح والذّل فاجر

والخوف ساس الذل والغبن ذبّاح

مادام لك عن خفضة الهام زاجر

إمّا إنكسر ولا تعدّاك الارياح

مانته بعشبٍ نابتٍ وسط حاجر

ولا إنت بشراع التيه والوقت ملاّح

إنت الّذي باسمك تضيق الحناجر

لو إنطقوا بك همس سمعوا بك صياح

تقفي وكن الحرف للحرف هاجر

وتقبل وقلب الصخر بالشعر بوّاح

ولا من رمى صبحك عباة الدياجر

ثم إنتهى ظماه شع بالنور مصباح

إرفع جروحك عن تراب الخناجر

نزفك عزيز ومثلك النجم لاطاح




//

المسافر


لا تلوح للمسافر ..
المسافر راح ..
ولا تنادي للمسافر
المسافر راح ..
يا ضياع أصواتنا .. في المدى والريح
القطار وفاتنا ..
والمسافر راح ..

يالله يا قلبي تعبنا من الوقوف ..
ما بقى بالليل نجمة ولا طيوف ..
ذبلت أنوار الشوارع .. وإنطفى ضيّ الحروف
يالله يا قلبي سرينا .. ضاقت الدنيا علينا
القطار وفاتنا ..
والمسافر راح ..

مادري باكر هالمدينة وشتكون ..
النهار والورد الأصفر والغصون ..
هذا وجهك يالمسافر لما كانت لي عيون ..
وينها عيوني حبيبي ..
سافرت مثلك حبيبي ..
القطار وفاتنا ..
والمسافر راح ..



//

لو تغيبي



لو تغيبي ولو رحل وجهك حبيبي

في غيابي عنك أشوفك .. وفي عذابي منك أشوفك

صدقيني ما نقص هالليل بعدك إلا قمرا

وما فقدت من النهار إلا شعاع الشمس بكرا

واجمل الناس حبيبي .. حبيبي

لو تغيبي لو رحل وجهك حبيبي

تصغر الدنيا وتضيق

كلّ مافي الدنيا أعرفه إلا بيتي والطريق

أنا أحبك ذا نصيبي .. إبعدي عني وغيبي

صدقيني مانقص هالليل بعدك إلا قمرا

ومافقدت من النهار إلا شعاع الشمس بكرا

لك ليالي ما سألتي .. ولي ليالي ما سألت

لو دريت إنك زعلتي .. كان أفرح مازعلت

بس داري مافي قلبك إلا قلبك

واختياري إني أحبك والا أحبك

ومن عذاب الحب يكفي لو تجرّح قلب واحد

وإنتي يا حبي وضعفي لا يهمك كله واحد

لجل تتغير فصول .. ويبكي الغيم في عيوني

وتزهر جبال وسهول .. اضحكي بيّا وبدوني

وصدقيني ما نقص هالليل بعدك إلا قمرا

ومافقدت من النهار إلا شعاع الشمس بكرا





//

السراب



قال السراب وقلت ظامي سرابه

قال الهلاك وقلت لعيون الاحباب

يا لايمي في حب مترف شبابه

الموت حق ولاتبرق في الاسباب

كانة ذبحني صاحبي من عذابه

مابي لدمي يا أهل اللوم طلاب

الجادل اللي فية زين ومهابه

تاقف له قلوب وتخضع له أرقاب

في حجر عينة لي غدير وسحابه

وفي وسط قلبي لة تناهيت وعتاب

إن قلت أحبة يكفي القلب مابه

وان قلت أنا مابية..باصير كذاب



//