هدوا بيتي... شعر بالعامية المصرية

[ياسر السعيد الششتاوي]

هدوا بيتي
قالوا علشان مخالف
وانا باني فْ أرضي
والكون كله عارف
دا قانون
ولّا إجرام
والله يا ناس
دا حرام
ليه بيتي
ياخد م المسئولين إعدام
أيه ذنبه
أيه ذنبي
قولوا لي يا سادة يا كرام
أزاي أشقى
واتعب
علشان أبني بيتي
وفْ ثانيه يضيع
يتهد
كأني بشوف موتي
سافرت
وكنت
بحط القرش
على القرش
على حْساب راحتي
أو حتى قوتي
علشان لما ارجع
أبني حاجة
أبني أربع جدران
يرسو فيهم جسمي
وينام صوتي
أبني حاجة
تفضل لعيالي ومراتي
أبني حاجة
جوايا الحلم عامل
زي الشجر الوارف
هدوا بيتي
علشان مخالف
هيه الدولة معانا
ولّا ضد التعمير
مش طالب فيلا
أو حاجة
تنفع لوزير
أنا طالب بيت
زي الناس
دا حتى
شوف العش المتعلق
ع البوص الأخضر
من تصميم العصفور
دا حتى التعبان
له جحره
يسكن فيه
عن فاس الناس مستور
أزاي أبقى إنسان
ومصير حقوقي في السكنى
أصبح تالف
هدوا بيتي
قولوا علشان مخالف
طيب قولوا لي
ع الحل الصابح
قولوا لي
مين بدمار بيتي رابح
أزاي هدوا بيتي
وانا عمري بحلم بيه
عايزين أزاي أقدر أبني تاني
ما جايز في حضوري تهدوه
قولوا لي
تكسب دولتنا
م الهدم إيه
مفيش غير الغلبان
اللي نقدر في أي وقت نجازيه
لو بيت
واحد مسنود
لا حد يجي يمه
أو حتى فْ أفعاله يخوض
وانا قاعد
ع الأنقاض عاكف
هدوا بيتي
قالوا علشان مخالف
أخدوا ظلي
وشقا عمري
وبقيت في الشارع
أشكو للرحمن أمري
ومفيش مخلوق
داري بيا
جوايا ساكن مري
حاسس
أن الوقت
بقا يشعل جمري
محروق من جوايا
حرقة من مات له عزيز
دا حاجة في التاريخ
معملهاش لانجليز
هدوا بيتي
علشان مخالف
معلون
من يصدر أي قرارات
ترمي الناس فْ لوعة
وف بيته قاعد
يشرب
ويكول قطايف
هدوا بيتي
قولوا علشان مخالف
شكراً لجميلك يا بلدي
لو يعني
كنت بنيتي لي شقة
ما كنت أخالف يوم
ولا ذقت مشقة
طيب قولوا لي
إدفع غرامة
سيبوني ببيتي
أقعد فيه بكرامة
مش في لحظة
تقولوا هدوا بسهوله
كأن ذبحتوا حمامة
هدوا بيتي
قالوا علشان مخالف
وانا طول عمري
عرقي في بلدي نازف
وجزائي كان
هدوا بيتي
طب
دخلوني لو حتى سجن
ولّا عايزين
تبنوا لي أكبر حزن
شكراً لجميلك يا بلدي
مبقاش ناقص
غير إن تاخدوا جلدي
وانا دايماً وياكم واقف
لو حد حكى لي اللي جرى
ما كنت أصدق
بس انا بعيني شايف
خربوا بيتي
خربوا جيبي
في الآخر
يطلع مسئول
ويقول
للمواطن
والله انت حبيبي
هدوا بيتي
قالوا إنت مخالف
وانا باني ف أرضي
والكون كله عارف
شعر: ياسر الششتاوي

[ناريمان الشريف]

أصعب ما يمارسه الظالمون بعد الأسر والقتل هو التشريد وهدم بيت صاحبه
وإن هدم البيوت في فلسطين هو الأسلوب المتواصل الذي يمارسه المحتل ضد شعبنا الفلسطيني أكثر وجعاً من غيره من الإجراءات ، خاصة إذا حُكم على صاحب البيت أن يهدم بيته بيديه ، لا شك أنه منتهى القهر والظلم

كلماتك جريحة ..
بورك القلم وصاحبه
تحية ... ناريمان

[ياسر السعيد الششتاوي]

المشاركة الأصلية كتبت بواسطة ناريمان الشريف سجل لمشاهدة الروابط

أصعب ما يمارسه الظالمون بعد الأسر والقتل هو التشريد وهدم بيت صاحبه
وإن هدم البيوت في فلسطين هو الأسلوب المتواصل الذي يمارسه المحتل ضد شعبنا الفلسطيني أكثر وجعاً من غيره من الإجراءات ، خاصة إذا حُكم على صاحب البيت أن يهدم بيته بيديه ، لا شك أنه منتهى القهر والظلم

كلماتك جريحة ..
بورك القلم وصاحبه
تحية ... ناريمان

أشكرك .. ولك وافر احترامي على مرورك العابق