الكــهل

في مـُـكنتك قدرتك لكن مرادك عفْ

رصوا المحافل قوافل وانت وحدك صفْ

وان كف نوح السواقي إنت مالك كفْ

ما يوهن النخر عزم الصخر عند الشط

منخور دهور والعواصف لم تهزك قط

مالم تمس الأصول فاضية الحمول وهباء

والهام في عالي الغمام وف رفرف الجوزاء

وما غاض حنينك سنينك أو معينك جفْ



الـزاد

زادي قـُصَادي بقايا م العيدان والريش

ألُوك في كِـبْـر الملوك ووداعة الدراويش

واعف لما يكف الجوع عن التشويش

ويملا سر الحمام تاني سما الوجدان

أدْعِـيه ألوّن جناحه واطلقه بحنان

وما خدت زادي صديق وتقلت كالمخاليق

لاكن فواصل أواصل بعدها التحليق

واملك حبور الطيور وبهيج نسيج الريش



المــوت

حسبت موتي في آخر دنيتي تبجيل

إن كان مَلَـفـِّي يكفـّـي ع الطريق كدليل

وسقيت بذوري نفوري من بكا وعويل

ويقهر الموت قبوله بالرضى والطوع

الفرد ينشى ويمشي والخلود للنوع

واللي انتصر ع الضرورة باختيار مسئول

إذا المغيب جلله يتأمله ويقول ...

جليل غروب الكواكب كالميلاد وجميل



العتــاب

يقع البطل في الخَطـَل لما الشيطان يندس

والحُـر لازم يثور لما الشعور يتمس

وشكة الأخ من دون الجروح تتحس

قالوا الإيدين اللي تبدأ بالغلط تنصد

أنا قلت ايدي وليا الحق راح تتمد

لأن قلب النقي غير الحليب ما يصب

وزرعة الحب ما تطرح خلاف الحب

والجرح يتلـَـم لو بيد الصديق يتجَـس