البراءة
الأم :
يابني ظلعك من رجيته
لظلعي جبرته وبنيته
واحسب الشيب اللي من عمرك جنيته
يابني طش العمى بعيني
وجيتك بعين القلب أدبي على الدرب المشيته
شيلة العلاكة يابني
تذجر جفوفي بلعب عمرك عليهن
سنة وجفوفك وردتين على راسي
وبيج أنا غي كل فرح عمري النسيته
يابني شوفك يبعث الماي الزلال بعودي وأحيا وآنا ميته
أبيض عيونك لبن صدري
وسواد عيونك الليلك عند مهدك بجيته
وأبنك التوه يناغي الخرز بالكاروك يابني
كتلة لاتخاف اليتم جده
اللي ما مش أبو عنده
الحزب أبوه الحزب بيته
كتله ياابني ياوليدي من تجير على الأيام
تلكه حزام أبوك المماطواني وماطويته
تلكه منه خطوط أضمهن حدر ضلعي
لحد ماموت بعز على السر الحويته
ياعمد بيتي وكمر ليلي وربيع الشيب والعمر الجنيته
جيت أهزك ياعمد بيتي
يكون الدهر ظعظع عظم منك للخيانه
وساومت جرحك على الخسة وجفيته
يابني خلي الجرح ينطف
يابني الجرح اليرفض شداده علم ثوار يرفرف
يابني أرضى الجلب يرضع من حليبي
ولاابن يشمر خبزه من البراءة
ياابني يأكلني الجرب عظم ولحم
وتموت عيني ولادناءة
ياابني لاتثلم شرفنا
ياابني ياوليدي البراءة تظل مدى الأيام عفنة
تدري ياابني بكل براءة
كل شهيد من الشعب ينعاد دفنه
وخلي إيدك على شيبي واحلف بطاهر حليبي
كطرة كطرة وبنظر عيني العميته
قلي مايندار رجمي وأنت أمي وذاك حزبي
وعز أبوي المالواني ومالويته
قلي مااهدم حزب بيدي بنيته
الأخت
خوية كابلت السجن
حر وبرد وليلي ونهاري
تحمات لجلك على غرضي
وأشعلت ليلي بنهاري
تالي تهتكني بخلك وصلة جريدة
كرة عيونك يخوي جازيت انتظاري
بهاي أكابل أمهات الناس وهمومي أفضها
جنت اتدوس اعظامي وكلك حيل رضها
جنت ارضى تدبج ابطني جنيني
ولابراءة عار متبركع تجيني
ولاتكون الكاع تبلعني
وش اخبر الناس
والينشد شكله
شلون تجابل عيون المحلة
شلون أوصفك وانته كلك عار وذلة
بعد مالك أرض ويانا وخبز لاتصل يمنه
هاك عار الجريدة
ولف ضميرك والكرامة
مثل ماتبريت من شعبك
تبرينا من اسمك وياشعب هذا التشوفه موش ابنا

الشاعر الفراتي
خالدعبدالجبارالفرج