الشاعر / حامد زيد ~ - الصفحة 5 - منتديات منابر ثقافية



صح النوم

تعودنا على حمل الجمايل والزعل واللوم
ولا نرفض عتب غالي ولا نزعل من جداله
تمنينا حوز اغلى مكانه في وجيه القوم
ونعيش الخوه بوقت يضد رجاله رجاله
تعلمنا من الدنيا وزدنا للعلوم اعلوم
وسقنا للدروب قلوب رجليه وخياله
وقفنا للزمن وقفة شجاعه والقروم قروم
الين ان صار واحدنا بديل اقواله افعاله
الى منه خذا ياخذ مثل ماياخذ المحروم
والي منه عطا يعطي ولو من لقمة اعياله
ولا بتنا ولو باتت رحايلنا بدون عزوم
نساوم للفخر بارضه ولو بأي من اشكاله
ولا عفنا ولو شفنا على باب النهار سموم
ولا خفنا ولو طفنا بمخراجه ومدخاله
واذا شفنا عناقيد العنب فوق الشجر ملموم
نهز غصون عنقوده واذا ماطاح نرقا له
نصبر بعضنا بالكذب الابيض والهدف معدوم
ونقول انا وصلنا له لو انا ما وصلنا له
وانا واحد من اصغرهم طموح وللطموح رسوم
على وجهي مثل قوله بغى شي ولا ناله
عطيت ولا رضيت اخذ من سلوم البخيل سلوم
ولا عمري رضيت اقعد على قلب العرب عاله
ولا ارضى بالفخر فزعه وجواسيس وكلام رخوم
ولا عمري حنيت الوجه بعد المجد لحثاله
غناي الله وانا رجل عزيز مقدر محشوم
قنوع بالقدر وان قلت فال الله ولا فالك
بسيط يرمي حموله على متن الجبال هموم
بوقت الاسف عيت تطيق همومه جباله
بوقت نزل خشوم ورفع من رداه خشوم
وخلي قيمة الرجال بين الناس برياله
صحيت وقلت للنايم بعد ماقام صح النوم
زمانك ماعطاك إلا صور وحطام تمثاله
سنين اطالع البارق وقول ان المطر محتوم
وهو ما مد لي كفه وانا ما طلت هماله
أرد اكذب على نفسي واقول ان النخل مفطوم
وهو ما بالنخل عذقي عطش ماذاق شلاله
وانا مابي من البارق هماليل ومطر وغيوم
ولو ذقت العطش بعيون طرقية ورحاله
تعلمت الصبر من كنت طفلي بالمهد مزموم
إلين ان صرت رجل لا أنتخوا به طوح اعقاله
وانا ما احلف بعد عمر طويل بدفنتة المرحوم
بقول الله ولا غير الله الرحمن نلجاله
ومثل ما بالمطر خوه الي من اهل كوم وكوم
انا قلبي بعد يقدر يدك البيد بلحاله
واذا اسمي واصل الدنيا قبل لا القى الحياه بيوم
ابتكرها وانا اسمي يضرب التاريخ بامثاله
واذا ربعي وهم ربعي تناسوا حقي المهضوم
بعيش اشره على قلبي قبل ارثي على حاله
واذا كفي طعن كفي برأس الخنجر المسموم
بعرف ان النصيب اقرب من الرجال لظلاله
مدام ان الزمن خلا الشجاع بوقتنا مهزوم
اجل خلو ضعيف النفس يقصر شرة اشواله

//

09-13-2010, 04:49 AM

المشاركة 42

أمل محمد

مشرفة سابقة من آل منابر ثقافية



الليال السرمديه

من عرفت العلم وانتي يالليالي سرمديه
والوصول أغلى طموحات الفتى بأول شبابه
والمهابه ماتهادت غير لنفوسٍ رديه
ليت في قلب الليالي للفتى قدر ومهابه
دنيةٍ تجمع صفاتين الخجل والعنجهيه
كنها بنت يزود بحسنها ثقل وذرابه
يوم جتني تمتحني في زمان الجاهليه
جيتها رجلٍ تحلى في تقاليد الصحابه
بالعطا تبخل علي وبالعذاب تموت فيه
عشتها قلب شجاع يكره الضيم ويهابه
بس ابدري وش نهاية وصلها وأخر هديه
وهو صحيح ان القصايد للجريح أول عذابه
ومن عرف لك يالليالي وانتي اكثر من هويه
ومن تلحف في ترابك مقتنع باللي جرا به
من قدر طموحه في زمان المعمعيه
مَن مِن الناس يتجرا يتركك وانتي ترابه
السؤال يعيد نفسه والاٍ جابه مبدئيه
والقلوب اللي تخالف ودها صارت تشابه
والخلايق ماتسوي طيبها جود وحميه
كلنا نضحك بوجهِ مبتسم للغدر نابه
لو يصير الموت راعي .. كلبونا له رعيه
لو زعل نزعل ونرضى لا رضى حضرة جنابه
والله اني مانويت اكشف ملفات القضيه
لكن اني شفت شيٍ يفقد العاقل صوابه
ياالحياه انتي غديتي بالغرابيل اجوديه
كنك اللي مايميز بالخطا غير ارتكابه
ماعطيتي غير جرح ولعنبوها من عطيه
والله انك ما عطيتي خير للقلب وصوابه
خاينه .. ما انتي عزيزة خافقي ياالأجنبيه
جنبي عني وأجنب من مداخيل الغرابه
وأخذ بدربٍ يدرك للقى روحه وجيه
يايموت الدرب ولا بدفن القلب بضبابه
وان ذبحتني تمني رجعتي وابكي عليه
لين تملين المحاجر بالبكا حزن وكآ به
وادفنيني بين ظلك والخيوط العسجديه
لو لقيتي بعد موتي واحد بنفس الصلابه
شاعرٍ قدم قصيده لاغلب أيامك ضحيه
بين ناسٍ مايطيقون القرايه والكتابه
يازماني لو بقى للشعر في صدري بقيه
بكتبه وارسم خيالي بالورق وأروي سرابه
وكان ردت للعناد وعودت للمقدريه
والله أني ما اتنازل لين اعديه السحابه
يازمانٍ مبتلي به وابتلى فيني بليه
لاتلوم اللي يخونك كان له عقل ولبابه
بقفل القلب المشقى عن هبايبك العتيه
ودق بابه من بعدها لو قدرت تدق بابه
الحياه اللي تسمي لعبة الشاطر خطيه
ماتساوت في عيوني مع جناحين الذبابه
أذكر أني كنت عايش بالليال الاوليه
وأذكر أني كنت عايش وقتها باحضان غابه
ماعرفت إلا عبارة مثلها مثل الوصيه
عيش عمرك ذيب تسلم من مخاليب الذيابه

//

09-13-2010, 04:50 AM

المشاركة 43

أمل محمد

مشرفة سابقة من آل منابر ثقافية



الذهب

يا كثر ما رافقت خلان واحباب
ويا كثر ما في شدتي هملوني
على كثر ما أعدهم ستر وحجاب
على كثر ما احتجتهم واتركوني
من صارت الخوه ثمن حفنة تراب
نفس الوجيه اللي نصوني... نسوني
من غير ذكر فروق، وعروق، وأنساب
كانوا ثلاثة ...والثلاثة جفوني
علمتهم وشلون الأهداف تنصاب
ولما سواعدهم قوت... صوبوني
عشاني أصغرهم عمر صاروا أحزاب
عشاني اصدقهم قصيد اظلموني
اللي نجاح اسمي زرع فيهم أنياب
حتى النصيحة ما بغوا ينصحوني
دام العطايا عندهم دين وأتعاب
والله لو أطلب ذنبهم ما عطوني
طالب نصيحة، كني طالب أرقاب
وهي نصيحة؟!كيف لو زوجوني؟
كنت أكتب لنفسي مشاريه وعتاب
ولا ادري إن اللي قروني... قروني
تضاربت من دوني عقول وألباب
واجد بغوا غيري... وواجد بغوني
أقفل هدب... تسهر على شعري أهداب
كني حبست إرقادهم في جفوني
لو شفتهم واحد... يشوفوني اسراب
من وين مالدوا نظرهم لقوني
أثري وجودي بينهم محرق أعصاب
ومزعل بعضهم من بعض لو طروني
يا كبري بعيني وأنا توني شاب
واهم كتاب الشعر حاربوني
حتى ولو يهوي على نجمي شهاب
يكفيني إن إسمي كبير بعيوني
كد قال ابوي: ان هبتهم قول: ما هاب
لو يقدرونك قول: ما تقدروني
مادام قبري محتضن راس مرقاب
على كثر ما تقدرون ادفنوني
لو ماني بذيب إنهشت عظمي ذياب
لو ما عرفت اثبت وجودي لغوني
لو ما سكنت وجيههم مت بغياب
لو ما قدرت أمحي ورقهم محوني
أصبحت الأصعب لأنهم كانوا اصعاب
جننتهم مثل ما جننوني
ماجيت أبدبل كبدهم شعر وخطاب
لين أدبلوا كبد الذي خلفوني
يا ويل وجهي كن للدمع مخلاب
ما جف ماه ولا استحى من طعوني
كل ما طرالي منظرمريب وأرتاب
كان الوحيد اللي يحرك شجوني
قبلة صلاة،وذكر، وخشوع، وكتاب
وأمي على سجادة النور دوني
تدعي لي الله يفتح بوجهي أبواب
تتوسله بالشده يكون عوني
من كثر ما خفاقها بالدعاء ذاب
صارت تحس إن زملاي اكرهوني
بشرتها: يمه معي ربع وأصحاب
ماني لحالي واجد اللي يبوني
من يوم ما حاز قلمي كل الالقاب
قلطتهم في دفتري واحفظوني
الله وهبنيهم بني عم وأجناب
من يوم جيت اعجبتهم واعجبوني
واعجابهم فيني ما هو بأيه اعجاب
باسلوبي، بشرحي، بطرحي، بلوني
لوقلت عن نفسي( بشر)..صرت كذاب
لو قلت : ( دمي من ذهب) صدقوني
لو بكيفهم كان ازرعوا دربي أعشاب
لوبيدهم يتشبهون اشبهوني
من كثر ما صاروا من طبوعي اقراب
حتى بلبسة شمغهم قلدوني
واجد دعوني واغلقوا دوني الباب
واكثار ناس أبكي لهم ما بكوني
لوطالوا لهدمي مناسيب وأطناب
كان وغلاتك من زمان اهدموني
مدام حطوا فيني عيوب وسباب
جنبت عنهم مثل ماجنبوني
أصلا لو أن بخوتي شي ينعاب
ذبحت نفسي قبل لايذبحوني
أنا يدي لو ماكست متني ثياب
نذر ٍ على لقطع يدي من متوني
موعيب أجي مدعو ولا أشوف ترحاب
العيب لو إني رجعت إن دعوني
مادمت اجي ولا يحسبون لى حساب
حرمت اروح اذا يبوني يجوني

//

09-13-2010, 04:50 AM

المشاركة 44

أمل محمد

مشرفة سابقة من آل منابر ثقافية



الأم

قصيدتي زاد بعيوني جمالها
واخذت أنقي بالمعاني جزالها
واكتب معانيها من الشوق والغلا
لأمي وأنا اصغر شاعر ٍمن عيالها
كتبتها في غربتي يوم رحلتي
لما طرالي بالسفر ماطرالها
امي وانا بوصف لها زود حبها
وان ماحكيت لها قصيدي حكالها
امي لها بالقلب والجوف منزله
مكانة ماكل محبوب نالها
اقرب من ظلالي وانا وسط غربتي
وانا تراي اقرب لها من ظلالها
ماشافت اعيوني من الناس غيرها
ولا خلق رب الخلايق مثالها
اغلا بشر في جملة الناس كلهم
واكرم من ايدين المزون وهمالها
اتبع رضاها ورتجي زود قربها
واللي طلبته من حياتي وصالها
الصدق مرساها والاشواق بحرها
والعطف واحساس الغلا راس مالها
اهيم فيها وابتسم يوم قلبها
يسأل وانا قلبي يجاوب سؤالها
وان اطلبتني شي فزيت مندفع
اموت أنا واحمل تعبها بدالها
واصبر على الدنيا والاحزان والتعب
واحمل على متني فطاحل جبالها
واسهر اعذب راحة القلب بالشقا
واعيش اعاني بس يرتاح بالها
تربية ابوي اللي على الطيب بذكرة
اللي وهبني الحياه ومجالها
نور لي ادروبي وانا طفل مبتدي
حتى تركني واحد من رجالها
الوالدين اولى بالاحسان لجلهم
وأولى بتكريم النفوس وعدلها
اقولها وانا على الله متكل
والله عليم بقدرتي واحتمالها
ياكلمة اغلى من الناس كلهم
ياشمس بقلبي بعيد زوالها
يافرحة تملي لي الكون باكمله
ياشجرة تكبر ويكبر ظلالها
تضحك لي الدنيا ليا شفت زولها
مثل السما تزها بطلة هلالها
والبعد عنها ياهل العرف ماقدره
لاشك ناري زايدة بشتعالها
ماعيش ببلاد ولاهيب بأرضاها
ولابي عيوني كان ماهي قبالها
أرض ٍ تدوس امي بالاقدام رملها
اموت فيها واندفن في رمالها

//

09-13-2010, 04:51 AM

المشاركة 45

أمل محمد

مشرفة سابقة من آل منابر ثقافية



القدس

تخيلوا لو يفزع الجار للجار
في مجتمع غاضب وحاقد ومشحون
وتخيلوا لو تلتفت كل الانظار
للمشهد اللي وقفت دونه عيون
وتخيلوا لما رحل الحرب تندار
مابين حكام العروبه وصهيون
اليا متى نستقبل ذنوب بأعذار
واليا متى نستنزف جروح بطعون
نتبع خطأ تيار ونصد تيار
نبعد وعدوان المسلمين يدنون
لوكان بقلوب العرب صبر واصرار
ماكان سووا فيكم اللي يسوون
بهمالكم بدلتم الثار بالعار
بعتم تراب القدس وانتم تشوفون
حنا كذا بمعارض الراي شطار
لين أستوى بالمجد عالي ومطمون
من كثر ما كنا نجامل ونحتار
صرنا نخاف نعارض اللي يقولون
لقدس تصرخ والسما تحصد أعمار
والدم ينزف والارامل يموتون
وارواح تسلب سلب واعصاب تنهار
واطفال تعدم والبشر ما يحسون
خمسين عام نحارب الشرك بأحجار
وبسكوتنا نبني عمارات وحصون
ننسى وكن اللي حصل شي ماصار
نسكت وكن مابيننا شخص مغبون
لين أشربوا من دم الاسلام كفار
وبعروقنا صاروا يروحون ويجون
استضعفوا لين اضعفوا كل الاقطار
ساقوا غضبهم والاوادم يصلون
يستدرجون العزل للسمح الابرار
يستمتعون بقل الاطفال بالهون
ماكنه الاشعب مخلوق غدار
في قلب لا ساكن ولاهو بمسكون
بالذل ماتلقى على صيته غبار
كبارهم واطين وصغارهم دون
لابارك الله فيهم صغار وكبار
ولاجمع الله شملهم وين يسعون
وماتنطفي شمس الحقيقه ولو جار
فينا زمان الذل والضعف والهون
ودام الفشل والضعف ثلثين الاضرار
لابد ما نضحك ولا بد يبكون
وأنكانت قلوب العرب تنذر انذار
ليش انتجاهلهم واهم يستبدون
الناس قالت حارب النار بالنار
ومالله خلق للادمي عمر مضمون
وان كانت الفزعه من أحرار لأحرار
حنا البروق اللي غدت سحب ومزون
وحنا السكون اللي سبق عصف واعصار
وحنا سباع الكون يا لعنة الكون
وحنا عرب والعرب ماتترك الثار
بافعالنا ماهي بقولة يقولون
نزعل ولكن بالزعل دمنا حار
نفزع اليا شفنا العذارى يصيحون
عقالنا معهم من العلم مقدار
ومجنوننا ينطح ثمانين مجنون
ياشعب يا ثاير وياشعب مغوار
هون من اسباب المعاناه وتهون
أصرخ على كل البشر وأجهر أجهار
وخل اليهود إن مادروا عنك يدرون
وأجمع شتات الوقت تذكار تذكار
وأذكر مواقف كل طاعن ومطعون
حارب بدين الخالق النافع الضار
واستذكر الرحمن وابليس ملعون
واطرد من ارض الله عدوين الاذكار
وان جوك ولا جعلهم مايردون
ورح قلهم حنا على كل مشوار
وذوقوا مرارة نصف ما تستحقون
واذا رضيتم قولوا الوقت دوار
واذا زعلتم سووا اللي تسون

//

09-13-2010, 04:51 AM

المشاركة 46

أمل محمد

مشرفة سابقة من آل منابر ثقافية



انتي ولا شيّ

والله وصرتي تستهينين فيني
وانا الذي سويت لك قدر بيديّ
تدرين وش كنتي قبل تعرفيني ؟
ان قلت لك كنتي ولا حاجة شويّ
انا الذي فرشت لك رمش عيني
وعملت منك شي وانتي ولا شيّ
جيت اعشقك ما جيتك لك تحقريني
جيت اسكنك بسمة ما هو بسكنك غيّ
لا صرت عامل لك قدر قدريني
ترا الكرامة صفحة ما لها طيّ
ما دام ما جيتي غلا لا تجيني
نار الجفا عندي ولا الذل بالفيّ
والله لاهجرك قبل لا تهجريني
اجل تبيعيني واجيلك برجليّ
يا تتركين الكبر يا تتركيني
لأن المحبة شي والمهزله شيّ
إن كانت الدعوة غلاي وحنيني
يمكن يزول الحقد ويشعشع الضيّ
لكن حكاية ينحني لك جبيني
في ذمتي ما ينحني لك وانا حيّ

//

09-13-2010, 04:52 AM

المشاركة 47

أمل محمد

مشرفة سابقة من آل منابر ثقافية



أهل الجنوب

وعيني اللي كل ما ذعذع من الغرب هبوب
يحلا لها لون الغروب اللي يذوب قبالها
ويا ويل حالي كل ما يحلالها لون الغروب
تطري لي الريم اللعوب وسالفة ترحالها
وعز الله اني كل ما تطري لي الريم اللعوب
حرمت امد ايدي على حاجة وانا ما اقوالها
من سافرت ريم الفلا صديت عن كل الدروب
ما هو قصور بالعذارى بس ذيك لحالها
من فارقتني ما خطف قلبي من الحور محبوب
ولا لقيت الجادل اللي تستحق احيالها
لأن القلوب ان ما وفت لأحبابها ما هي قلوب
والعشره اللي ما ترد الروح ما نسعى لها
إما الوفى اللي يستر الرجّال من كل العيوب
والا الجفى اللي يستر عيوب العرب في رجالها
ما اقسى من فراق الجنوب الا فراق اهل الجنوب
ويلي على اللي كل ما تزعل تشد رحالها
اللي مذيره العتب لا شبت بصدري شبوب
عييت اراضيها وهي عيت تطول بالها
كانت معي مثل النصيب يحدني من كل صوب
كانت دروبي من متاهات الظلل لظلالها
كانت هروبي لا شعرت اني بحاجه للهروب
كانت سماي اللي ليا ضاقت علي ألجالها
ليه اتحداني وانا في كل الاحوال مغلوب
ليه حرمتني من قهر عذالي وعذالها
ليه اتجاهلني وانا لاني جبان ولا كذوب
ليه ارخصت دمعي وانا اللي ما بكيت الا لها
ما ترحم اللي له سنه كأنه على النار محطوب
ما هزها دمع الفقيد اللي بكته أطلالها
ما خافت تهدم السنين اللي بنتنا طوب..طوب
ما فكرت تشفق على حالي وترحم حالها
قولوا لها لو ما تذوب انا بخليها تذوب
قولوا لها لو ما عنت لي مستعد اعنالها
إليا ادمحت لي هالخطا بدمح لها كل الذنوب
وإن جابت الحسنى معي تبشر بعشر أمثالها
أفرش لها صدري وطن وأجمع لها ضلوعي شعوب
وأرقى لها المكانه اللي ما حد(ن) يرقى لها
إن كاني مخطي فأنا ماني خليّ من العيوب
الذنب يغفر والبشر تجزى بقدر أعمالها
البعد قاسي والفراق يضيق الصدر الرحوب
وانا تعبت ادور الحيله وارد احتالها
قولولها ترجع ترا ماني على الحزن مغصوب
وإلا ترا نذر(ن) علي انه ماهو ب أشوالها
إما تجنب هالهبال وتترك البعد وتتوب
والا بتبشر بالهبال اللي ما هو بهبالها
كافي زعل ترا الظروف مقفله من كل صوب
وأنا حملت من الهموم انواعها واشكالها
يكفيني اني كل ما هبت على صدري هبوب
تحن عيني للجنوب وتلتفت بلحالها
والمشكلة اني كل ما حنت عيوني للجنوب
تطري لي الريم اللعوب وسالفة ترحالها
وعز الله اني كل ما تطري لي الريم اللعوب
حرمت امد ايدي على حاجة وانا ما اقوالها

//

09-13-2010, 04:52 AM

المشاركة 48

أمل محمد

مشرفة سابقة من آل منابر ثقافية



قرم وفقير

منك العذر وعلي المعذره
لا تحسب حساب هجر ولا هجير
كل ذنب بتذنبه بستغفره
واحد(ن) ما يعذرك ما فيه خير
دور بصدري وطن واستعمره
عندك من الضلع الأول للأخير
عيش فيني وادمر اللي تدمره
واعتذرلي واعتبر سرك ف بير
لا تبشرني بجرح وتذخره
لا تعشمني بفرح وتستخير
ولا تنومني بليل وتسهره
ولا تنام الا وانا جفني سهير
خلني مثل النجوم مبعثره
عيش فيني لا شهيق ولا زفير
لا تقول العفو عند المقدره
خل قلبك صلب وحسابك عسير
المسامح والزعل للمبزره
والا انا لاني زعول ولا صغير
ودي ادري ليه للحزن ثمره
ودي اقطف من قساوتك العبير
ودي اجفل من فراقك واحذره
ودي اعرف لو زعلت شيب يصير
لو تقدر خاطري صدق اكسره
لو صحيح تحبني لا تستشير
ازرع بقلبي سبب يستنفره
اثبت انك غير وان الناس غير
شاعرك ما كل بنت تجرجره
حارت ابه عقول ناس(ن) ما تحير
النسا ما حركوا فيه شعره
ثار عشق وما لقى شي يثير
لو سكت شفت الوقار بمنبره
وان تكلم زمهرير بزمهرير
ما يحضر إلا القلوب مجمهره
وما يغيب الا وعشاقه كثير
إن هجرته تستقر بمحجره
وإن تبعت رضاه ما عينت خير
إعشقه لكن بعد ما تقهره
إبتسم له بس لا شفته كسير
حن لكن حن لا جبت خبره
حب لكن خل حبك بالاخير
لو عطيته وجهك أعطاك ظهره
صد عنه ويتبعك مثل الضرير
لا تحاول تكسبه ما تخسره
صير ثلج يصير لك مثل السعير
ما تميل الا الغصون المثمره
وما يسيل من الجروح الا الغزير
من قبل ما تنقهر منه اقهره
قبل لا يستحقرك خلك حقير
اسكنه حرك جموده بعثره
اعشق اكره عاتب اشره حن غير
انثره لملمه.. لملمه انثره
صد.. ياخي طير لو تقدر تطير
من متى وانا اتحرى لي مره
تثبت اني لا وقعت اوقع كبير
ابك انا مقطوع من غصن شجره
لا صديق ولا رفيق ولا عشير
بدوي(ن) شيب الصبر شعره
ما عرف ريش النعام ولا الحرير
إن غفا كأن السحاب يدثره
وإن صحى يفرش من الرمضا حصير
ماخذ(ن) من قسوة البيد أكثره
ومن شموخ البدو شر(ن) مستطير
جنته صحراه والشوك زهره
والسراب بنظرته مثل الغدير
إن فزع يا مشجعه يا مظفره
من خلقه الله وهو قرم وفقير
كان ما تقدره قل ما تقدره
صير غالي صدق والا لا تصير
الغلا اللي ما تزعزعه اهجره
دام قلبك لا يجار ولا يجير
شوف لك رجل(ن) بليد استحقره
واجد اللي يعشقون بلا ضمير
بس انا لو جبت لي مية مره
ما تحرك فيّ شعره لو تطير

//

09-13-2010, 04:53 AM

المشاركة 49

أمل محمد

مشرفة سابقة من آل منابر ثقافية



المباني

جابك الله من غياب ٍ ضيّق صدور المباني
قبل لا الوحشه تزعزع بيتك الصلب وتبيده
بيتك اللي من رحلت وكل جدرانه تعاني
ماتحمل ينتظر شهرين وعيونك بعيده
الله العالم لو إنك جيت متأخر ثواني
ماتشوف إلا بقايا من حصاه ومن حديده
من عرفتك وأنت تايه من مواني لي مواني
وتارك ٍ قلبي مولّع من وقيده في وقيده
ضاعت سنيني أحد بهاليالي وتحداني
وأنت ماتشبع غياب ولاتخاف من النقيده
ودي أتحمد لك الله بالسلامه , مامداني
كل ماتوصل برحله ترجع برحله جديده
دام تدري كل وجه ٍ غير وجه الله فاني
ياخي أكسبلك ثواب وخاف ربك في عبيده
كان فيني عيب قلي:فيني العيب الفلاني
كان هرجي مزعلك في شي قلي:لاتعيده
عيب تصغر في عيوني وأنت برقاب الغواني
كيف تستسهل طعوني وأنت خابرني وليده ؟
لعنبوك أن مت بيدك من يفكك من أخواني ؟
لحزنوا ربعي على فرقاي شاللي تستفيده ؟
أنت منت اللي عشقته أنت أكيد انسان ثاني
ليه صرت بهالبرود وبهالاحاسيس البليده ؟
وين حبك للزعل .وين العناد الأولاني ؟
وين حنّية زمان وفرحة العمر الرغيده ؟
وين ذاك اللي اليا أقبل مايبات إلا بمأني ؟
وين راح اللي اليا أقفى مايروح ألا فقيده ؟
واحد ٍ من جابه الله بس يامر ويعصاني
الوحيد اللي أخافه غصب وأمشي معه سيده
(مابغيت أطيح بيده) لين ماربي بلاني
ولا أنا لو هي بكيفي (مابغيت أطيح بيده)
ذاك بس اللي يامن جيته يلخبط كياني
اللي بنظره ينشف دم قلبي في وريده
قبل أشوفه أجمع اله أحلى القصايد والمعاني
وأن لقيته ماعرفت أقول لي جمله مفيده
الف مره قبله أعد القصيده من لساني
ولعنبوه أن جيت عنده قمت أخربط بالقصيده
أمدحه وأنا أدري أنه لو تباطاني نساني
أنطحه وانا أعرفه مجنون وأفكاره عنيده
من يسوي بي سواتك يالرهيف الاسمراني ؟
منهو من الناس غيرك غلطته ترفع رصيده ؟
من يقص(جناح طيرك)وأنت أعز أنسان جاني ؟
ليه أخاف(رماح غيرك)وأنت ضرباتك سديده ؟
ان تبعتك .أتبعك من طيبي وواسع بطاني
ولا أنا لاجيت أكيد انسان عزالله بكيده
أقدر أنزع لك ثيابي وألبس ثياب الأناني
وأقدر أطلع من عذابي والعب بدورك وأجيده
ومستعد أكسب رهاني لو بغيت أكسب رهاني
وأخدعك بحساس كاذب وأتحدى من يصيده
أبك أنا لي شفت خلّي حط غيري في مكاني
والله إني لتركه وأن صد لعشق سيد سيده
جيت مابيك تحقرني جيت أبيك تعز شاني
جيت أبي فزعة ظلوعك من مشاعرك البليده
خلني داخل (حدودك) وأجبر بخاطر زماني
أكذب بباقي (وعودك) وأصدق بلحظه سعيده
أنتشلني من (برودك) لو تولّع بالمحاني
عطني أحساس (بوجودك) وأخذ كل اللي تريد
تكفى واليا قلت :تكفى بيع خلق الله عشاني
لاتضيّع من يديني فرصة العمر الوحيده
يعلم الله شفت منك ومن غيابك ماكفاني
كان ماتقدر تخفف هم قلبي !! لاتزيده
شف غيابك وش يسوي بالصدور وبالمباني
وأنت تدري كيف كانت صدمت غيابك شديده
والله أنك لو وصلت البيت متأخر ثواني
مالقيت إلا بقايا من حصاه ومن حديده

//

09-13-2010, 04:54 AM

المشاركة 50

أمل محمد

مشرفة سابقة من آل منابر ثقافية



حد علمي

حد علمي بالغلا يوم كنت أسوى كثير
يوم كانت ضحكتي طبع وعنادي سمه
وحد علمي بالغلا يوم خفاقي ضرير
قبل أهدم العشق وأبنيه وأرجع وهدمه
وحد علمي بالبكاء يوم لي قلب وضمير
قبل أشوف المسلم يموت بيد المسلمه
إيه عدّت من يدي بس ماعدّت بخير
ليلةٍ عيّت تجيني وجتني مظلمه
من عرفت إحساسها كن في قلبي نذير
والنهار المكتئب باين ٍ من مقدمه
ليلةٍ حسيتها لاتجور ولاتجير
مثل طفل ٍ ماحقرته وعيّت إحشمه
وأصبحت مثل شعره وأقصمت ظهر البعير
وأبتدى في موته الجرح من حيث إختمه
صارلي بالعشق مالا هقيت أنه يصير
أنظلمت بعشرت أنسان ماكنت إظلمه
العشير اللي تبرى من ضلوع العشير
الحلا عزّز خطاياه والحظ إخدمه
لاتبسّم يكسر النور بعيون البصير
وكن شمس المغربيه تبات إبمبسمه
معتدل في قامته لاطويل ولا قصير
ممتلي بالزين من معصمه لي معصمه
فيه بلوان الهدب لون غير ولون غير
مثل ما للرمش بالعين قصه مبهمه
كنها نكس البيارق على شط وغدير
ومثل لملمت الشتات بشتات اللملمه
مع سواد مجدّل ٍ مايثور إلا يثير
كنه اللي ينهم الريح ثم ٍ تنهمه
ماتجمع لين قيّد حرير ٍ مع حرير
في ضلام ٍ علّم الليل مالم يعلمه
ماهقيت إن الهدب صلف وأجفانه تغير
لين سلهم لعنبوا جد ذيك السلّهمه
ماعتقني لين ساق البشاير للبشير
يوم صد وجاه قلبي بشحمه ولحمه
والله إنه حط قلبي تحت رحمت شطير
في يديه وكل ماراد يقسمه قسمه
ياعساني ماعدم إرضاه في برد وهجير
ولوعدمت مروّته ياعساني معدمه
إن طلب عيني رضا قلت ماغيره نظير
وأنشرب دمي غضب قلت يستاهل فمه
واهنيّه يرقد الليل مرقاد الغرير
كن نومه لابغى يهزم الجفن إهزمه
وإلنا من صفرة عصير الى صفرة عصير
والسّهر يايلزم العين وإلا تلزمه
لو صحيح إن الحبيبين يجمعه مصير
كان نفس اللي حرمني من النوم إحرمه
والله إن مروّتي ولّعت فيني سعير
يوم شفته تل قلبي وداسه بقدمه
مارحم زهرة شبابي وأنا توّي صغير
لين ضيّق خاطري ضيّق الله إنسمه
إيه عدّت من يدي بس ماعدّت بخير
ليلةٍ عيّت تجي بس جتني مضلمه
حد علمي في عناها عذاب وزمهرير
يوم قمت أوحي بالاضلاع صوت وهمهمه
وحد علمي بالرجا من نصير اليا نصير
يوم شفت النّفس تذبح وهي مستسلمه
وحد علمي بالبكا يوم لي قلب وضمير
قبل أشوف المسلم يموت بيد المسلمه

//