قصيدة مهدة إلى أرواح الشعراء الشهداء من أبناء محافظة الأنبار الذين كانوا حاضرين لأقامة حفل شعري بمناسبة ولادة الرسول الأعظم محمد ص وقام أحد الكفرة وزنادقة العصر المتسترين بالدين أحفاد مسيلمة الكذاب بتفجير نفسه بينهم وقتل سبعة منهم .. بعد أن تقدم عليهم وهو يهتف بالتكبير .. لا حول ولا قوة إلا بالله العلي العظيم ..
بعيون المنصة انشاهد الدمعة .. وجن صوت القصيدة الراح شيرجعه
بدعه اليحتفل بالمولد الميمون .. بس ذبح الشباب ابغدر مو بدعه
بري منك محمد أنته والوداك .. محضرلك حميم وباجر اتجرعه
محمد تمم الأخلاق مو إرهاب .. يشتل بالورد واجفوفك اتشلعه
تطور افنونها كل البلاد اشبيك .. يا غصن التشوفه امخضر اتكَطعه
قرعه وعله أرواح الناس تلعب جاي .. باجر توصلك وءتبين القرعه
إذا دينك قتل وأخلاقك التفجير ..كلام أهل العقل ما ظنك اتسمعه
تعرف جم كَلب مفجوع صار ءبهاي .. وجم أم ابنعيها اتحولت فدعه
وجم اخت وحبيبة الغفت بيها الآه .. جام أرواحهن ما تحمل الصدعه
تدري ءجم قصيدة التندعي بياريت .. الكسر قلم الكتبني ينكسر ضلعه
ولك باقة ورد وأشعلت بيها النار .. وللإسلام منك ما بقت سمعه
يقلام الشعر في جنة الفردوس .. ءشوفنكم نجوم مكحله ءبلمعه
بقصايدكم حضرتوا الحفل ملهوفين .. تفرحون بولادة والد البضعه
وكافأكم أظن طه الرسول ءبهاي .. وألبسكم ردائه المحد ءينـزعه
لبستوها الشهادة ويم حبيب الله .. قريتوها القصايد ليلة الجمعه
صح صوت أمهات اعله الكَبور ءيحوم .. وءتفت الصخر وحدتهن التنعه
بس ذني العراقيات معروفات .. أبنها اعله الشهادة اتفطمه وترضعه
يزهور الشعر رغم الفخر بالصار .. بس كَلب اليحبكم بعد شيهجعه
وصل لينا الخبر بالعين شبت نار .. وعلينا من المصيبة ضاكَت الوسعه
جرعنه ءفراكَكم سوو سياسيين ..لكن موتكم ما نكَدر ءنجرعه
صفكَنه الأيد بيد وزادت الحسرات ..نتمنى نعشكم احنه النشيعه
ونهوس عليه ءونلطم ءونبجيه .. وبدمعة كَلبنا الحارة ءنودعه
نطلب ثاركم لا بد يمر فد يوم .. والجذر الخبيث ءبكَاعنه انقلعه
ونطرد كلمن ءيلون العراقيين .. واليصنف شعبنا الواحد انطلعه
نعم قلعة سكر بالأصل جانت طين .. صارت للمصيبة من الحزن قلعه
***********
رحم الله الشهداء وأسكنهم فسيح جناته ولعنة الله على قاتليهم إلى يوم الدين
« آخـــر الـــمـــشـــاركــــات »
إلى الشهداء .. شعراء الولاء .. في أنبارنا الحبيبة
