التـقــــويم
عملت غير القديم تقويم جديد وبهيج
أربع فصوله ربيع أخضر بديع وأريج
يخلي حس السعادة عادة بالتدريج
يتحقق الخير ويبقى العدل طقس وحيد
في كل بيت عيد وعش جديد والمواليد
ييجوا بدال البكا بيكركعوا الضحكات
نابت لهم كلهم من فرحهم جناحات
ونفوز ما بين الملايكة والبشر بمزيج
الأعـــــداء
للنور ولائي وأعدائي سبع ظلمات
المنع م الشوف وزرع الخوف في الطرقات
وعتمة الروح إذا ما عششت ع الذات
والجهل باللي حيجرى والسكوت ع الذل
وصلصلات القيود لما تسود الكل
وكره مخصوص أكنه للعدو السابع
أعتى من التاني والسادس وم الرايع
ده الحب إذ يجلبوه م السوق مشتريات
المـوقــــعـة
جلبت بوصة طويلة قد رمح كبير
ورشقت في طرفها دبوس مصدي حقير
وببسكليته بتلات عجلات لطفل صغير
نزلت وسط الميدان باصرخ ومش هازل
هل من منازل ما بينكم للدما بازل
ورغم إن الجميع ضحكوا على الصفين
كريت عليهم جروا ... واتكعبلوا ألفين
ورجعت تارك ورايا م الضحايا كتير
العــــزلة
داريت بكوخي رضوخي للسنين البور
وخلقت ويا المكان لغوة لسان وشعور
وجعلت بالفكر مرتع بكر في المنظور
وصنعت والبدر غافي كل أطيافي
ولا كانش رغم انصرافي سمتكم خافي
أرسل شريط الرؤى في وحدة موصولة
وتو ما تفك مني يد مغـــلولة
أقطع بمقطع يسطع من حروفه النور!