منتديات منابر ثقافية - عرض مشاركة واحدة - دكتور مشالي... شعر بالعامية المصرية

احصائيات



الردود
4



المشاهدات
1730







ياسر السعيد الششتاوي

من آل منابر ثقافية



المشاركات
83



+التقييم
0.07



تاريخ التسجيل
Nov 2020



الاقامة
مصر



رقم العضوية
16316

11-27-2020, 12:36 PM

المشاركة 1

11-27-2020, 12:36 PM

المشاركة 1

دكتور مشالي... شعر بالعامية المصرية

دكتور مشالي
نقطة فارقة
في سجلات الإنسان
كان قلبه ساكنه
طوفان إحسان
أجمل شيء في الدنيا
إن قلبك
يبقى بالخير عمران
حرر نفسك
من حب الفاني
واعمل للخالد
كن فارس يجري ورا الحسنات
زي الرهوان
أوعى تتحجج
وتفعل سوء
وتقول
ده كل الناس غيلان
أوعى
تقتل جواك نور
أو تدبح إيمان
أوعى
تمشي ف سكة
زيغ
أو زيف
وتقول دا شيطان
دكتور مشالي
كان ممكن
يبقى عنده قصور
وفلوس أطنان
بس الراجل
مرضيش انه من لحم الفقرا
ياكل
وعلى حسابهم يبقي حوت
م الحيتان
كان ممكن
يبقى عنده عربية
أحدث موديل
وعمارات ياما
وأراضي وأطيان
بس الراجل
كان حاسس أنه أغنى
بخدمة ناسه
حاسس إنه كسبان
كان ممكن
يبقى ف عيشة
يحلم بيها الناس
وتكون لنجاحهم هيه المؤشر والميزان
بس الراجل
مخلوق من طينة سامية
من طينة فرسان
كان ممكن
يبقى واحد تاني
ويكنّز أموال
لا فارقة معاه يوم محتاج
أو شقيان
لكنه اختار
إنه يبقى ظل
لكل كسير
اختار يبقى بستان
زاهد وبسيط
مش غرّاه الدنيا
ولا عايز سلطة
أو سلطان
احنا اللي بنخلق
جوانا ديب
علشان ياكل عمرنا
ناب أحقاد
وصراعات ألوان
لو نعرف مقدار الدنيا
لا كنا نقتل بعض
ولا نحارب
إلا الأضغان
لو نعرف مقدار الدنيا
كنا نخدم روعتنا
ونتقابل بالأحضان
دكتور مشالي
كان تطبيق فعلي
بيقول
فعل الخير
دايما في الإمكان
دكتور مشالي
كان تطبيق فعلى
لمعاني
لازم نلزمها
ف كل الأحيان
كان حجة
على كل جشع
عايش لذاته
وناسي إن فيه غلبان
***
دكتور مشالي
واحد فاهم
لحقيقة دنيانا
عارف إن الباقي
هو المعروف
كم واحد
لابس بدلة
حاطط برفان
لكن من فعله
تحس بأنك منه مقروف
هو الجوهر
هو الفارق
بين الإنسان الصح
وبين إنسان حلوف
لازم نتكلم
في حاجات ياما
ع المكشوف
ممكن
نسقى جوانا شر
وممكن خير
ليه الخير
بيكون جوانا
هو المحذوف
دكتور مشالي
عابر برشاقة
للأشياء اللي ممكن
بسهولة ترمينا
ف أوهام
تبقى ف إدها
زي المخطوف
دكتور مشالي
كان نَفسه
كان اللي مؤمن بيه
لا خاضع لتصور ناس عنه
أو نافق لقطيع غرقان
بين التزييف
وارث لوصية والده
إن يعالج كل الفقرا
من غير تأخير
وبدون تكليف
فيه ناس
وجودها ع الأرض
يخضر نبض معانيها
ويكون ليها تشريف
***
دكتور مشالي
صعدت روحه
خيالي شايف إن فيه
طوارئ سماوية
وملايكة جمال
شايله روحه
والجنة بتنادي
وتغني
لجل حضور واحد
كان للخير قدامنا
أروع مثّال
يا طبيب
كن رحمة
دا الرحمة بتخلي
ع الوش جمال
أوعى تنسى لضميرك
وتّاجر بوجع
لفقير
عايز يرجع باللقمة
دا مستنيه ع الباب
من قبل المغرب
بطن عيال
محتاجين نبقى قدوة ومثال
هو الإنسان أيه
غير سيرة
هو الإنسان أيه غير أفعال
شعر: ياسر الششتاوي

رد مع الإقتباس