غزل فلم النمس /أحمد الجرجيس
انته همسة شوگ وبإذني تدور
وانت دگة نبض وبگلبي تجس
وانت حمس تقهر گلوب الرجال
ماشايف آني گبل عينك حمس
إنت تفطر عالعسل والبيتي فور
وآني خبز الشعير إفطوري علس
وانت عمرك عايشو ورَيـد وزغير
وآني ختيار وشعر عمري يهلس
وانت لك إجرين من شغل الهنود
كامش كبودي ومارسهن مرس
انزف حزن وانت تعصرني نبيذ
واغفي واشوفاً بيك نظرة مفترس
أشعر واهيم احساس ليحد الشعور
وادري انك حيل بإحساسي تحس
بس الغرور البيك تكتم في هواك
إعترافك بحبك تفكر إنو نقص
هايم وافكر بيك من ساع الغروب
واستحظر بروحك تحظر مو انس
يرگص دليلي حيل بس المح اطيوف
وتصيبني الدوخة مثل فلم النمس
حي الله بالچان سارق دواوين
عشگي وبشفاه حابسهن حبس
فتـّحـتّ بيبان گلـبي إلمـلگــاك
درسني إني اهواك عيدلي الدرس
وابقى اتلمس بيك چن احنه عميان
واشاورك بذنك واحچيلك همس
واتــغازل ويــاك نــتبادل نــكات
واجدّل بشعرك حد طلع الشمس