قنعت نفسي وكلت عن روحي فاسق
نعم انه انسان فاسق
فاسق لحد النخاع
حتى لا واحد يجيني
يصير للباري محامي
ويحجي باسلوب الدفاع
حتى ليكلي النظر
بوجوه التحبهم حرام
والحجي ويالمايعرفونك حرام
وحتى لا يلزكلي ثالث
لو توصلت لنتيجه
وحصلت منهه اجتماع
وآنه وين الكالي ثالث
خل يجي الثاني لطريقي
وآنه ابيع الدنيه كلهه
وارفع جفوف الوداع
جنت اوصفهه البريئه
المامشت درب الخطيئه
ولا مشت درب الغرام
وجنت احس حتى الحمام
الجان بالكاظم يجيهه
يأمن بسدهه وينام
وجنت ألاكيهه أتعثر
بالخيال
ومن خجلهه
تعلمت مثل النعام
بالارض تطبع وجهه
وهذا هو العالمرام
هذا هو اللي اريده
بنيه من تكبل وجهه
يزيح عن دربه الظلام
بيهه نور
وبيهه رحمه
وبيهه اخلاق
اتمنى تنالهه اولاد الكرام
بنيه جن طيرة سلام
بنيه بيهه هواي من طبع الحمام
تصلح الغلطه القديمه
وتكطع الشجره اللعينه
حتى آدم يرجع لفردوسه
ويبطل بعد
ياكل حرام
وهيه هاي العالمرام ؟؟؟
ويامرام ؟؟؟
وهيه أول يوم عشره
أتبينت تاكل حرام
بيهه من طبع العكارب
تلدغ بوكت التزاوج
بيهه كل هذا الدهاء
وآنه مو أول ضحيه
تنادي تبا للوفاء
وآنه مو تالي الملوك
الكاعده بعرش الغباء
هواي كبلي الاغبياء
الجان تخشاهم جيوش
وسقطوا بمكر النساء
هواي كبلي الاتقياء
اللي مشوا درب الرذيله
وناموا أبيت البغاء
وآنه مو أول غشيم
اليربط لحيته بعباة الماشيه
بدرب الفناء
وصاح تبا للوفاء
نعم تبا للوفاء
وللمشى بدرب الهلاك
للغفى بشاطي الاماني
يتاني شيطانه يندهه وكاسه بيده
يكله هاك
للتبع خيط السراب
وكلبه يصرخ
بالك تباوع وراك
وحتى لو شفت الوراك
جامك تكسر شظايا
وما بقت كطره بجبينك
ونهدر كل مستحاك
وهذا آني الهدمت محرابي بيدي
وطاوعت
شيطانتي الجانت ملاك
بقلمي
محمد عبود العبودي