الموضوع: ملك درب القطة .. مسرحية كوميدية
عرض مشاركة واحدة
قديم 12-28-2015, 01:59 AM
المشاركة 5
الصورة الرمزية رضا الهجرسى
رضا الهجرسى
من آل منابر ثقافية
  • غير موجود
افتراضي
المشهد الخامس
ترفع الستارة

مكتب فرغلى وزوبة فى المصلحة تجلس زوبة تأكل ويدخل عبده بالشاى ويضعه أمامها ويخرج يدخل فرغلى
فرغلى :صباح الخير يا زوبة يا أروبة
ينظر لمكتبه
فرغلى : والله وحشنى المكتب
ترد زوبة بأرف
زوبة : ميوحشكشى غالى يا خويا
فرغلى : مالك يا أروبة ع الصبح ,
تصرخ فى غضب
زوبة : مش كنت تصبر شوية لما أجوز الراجل وبعدين أطفش براحتك ,
تدخل المديرة مبتسمه وظهرها لفرغلى
المديرة : صباح الخير يا زوبة يا قمر انتى , تعرفى يا أروبة انا بقيت احب المكتب ده , من ساعة ما غار منه اللى ما يتسمى
يقف فرغلى ويرفع يده بالتحية
فرغلى : صباح الخير يا ست المديرة
تلتفت المديرة فى ذهول
المديرة : أنت
فرغلى : تمام سيادتك ,اللى ما يتسمى
المديرة: لأه .. أنت تانى لأ .. أنت يابنى مش سبت المصلحة وقدمت استقالتك وانا قبلتها ..ايه اللى رجعك تانى ..
فرغلى:مظبوط سيادتك ,وأنا سحبتها ,فى الفترة القانونية التى يسمح بها القانون لسحب الاستقالة
المديرة : ليه ..ايه اللى حصل
فرغلى :ياااه . يا فندم .. دى حكاية ولا حكايات الف ليلة وليلة ..
المديرة:مش عايزة اسمعها ..عايزة أعرف حاجة واحدة بس
أنت ناوى ترجع المصلحة خلاص ,
فرغلى:طبعا يا فندم ..والطلب آهه جاهز على توقيع حضرتك
سيادتك عارفة طبعا إن المصلحة محتاجة واحد زى عبقرى وصاحب رسالة ..عشان يطورها ..
تصرخ المديرة
المديرة :يا عبده , انت يا زفت يا عبده
الفراش:أيوه يا ست المديرة ..
المديرة :تنزل حالا ع الاجزاخانة اللى جنب المصلحة ..
تشترى لى حالا طقم الادوية اللى كنت بآخدها لفرغلى..
فاكرهم طبعا ..
الفراش: طبعا فاكرهم وحافظهم كمان ..تحبى سيادتك اسمعهملك
دوا الضغط والسكر و..
المديرة: والاعصاب ..متنساش دوا الاعصاب .. ده اهم واحد فيهم يالا بسرعة ..
الفراش :الف سلامة يا فندم .. سيادتك كنتى بطلتى الأدوية دي..
المديرة:روح يا عبده بسرعة..كل حاجة رجعت مع رجعته ..روح
بسرعة ..
الفراش : فريرة سيادتك ..حمدالله بالسلامة يا أستاذ فرغلى ..
فرغلى: الله يسلمك يا عم عبده ..وألف سلامة يا فندم ..
ربنا يشفى سيادتك..أتفضلى سيادتك طلب عودتى للعمل..
المديرة:ثانية واحدة يا عبقرى .. فيه طلب لازم أكتبه قبل ما اوافقلك ع الطلب..
فرغلى: طلب ايه ده يا فندم..
المديرة:إستقالتى .. ماهو يا انا .. يا انت فى المصلحة دى..
واحد مننا لازم يسيب المصلحة..
فرغلى:انا عن نفسى مش هسيب المصلحة ..
لأن المصلحة محتاجة عبقرى وصاحب رسالة زى ..
تضرب الأرض بقدمها بغيظ وتغادر المكتب
تبكى زوبة بحرقة
زوبة :بأه كل ده يحصلك يا ملك .. يا عبقرى ..يا صاحب الرسالة
فى غضب
زوبة: بس تستاهل .. لو كنت صبرت لما ألقط راجل أى راجل من الدرب ,حرام عليك يا عبقرى والله ,طب ده انا الوحيدة اللى فى الكون كله مؤمنة بعبقريتك ..مكانش العشم يا ملك ..صحيح أخلاق ملوك ..أخص عليك ..أخص
يذهب لمكتبها ويربت عليها
فرغلى :خلاص بأه ,خيرها فى غيرها
يتسلل عطية ويلزقه على قفاه يضع يده على قفاه وهو يستدير
فرغلى :القفا ده مش غريب عليا ,حبيبى عطية ,تعالى فى حضنى يا ولا ,وحشنى وحشنى قوى
عطية :لأ مفيش حضن ,هه ,أنا سعلان منك ,
فرغلى :ليه بس ,ده انا مقدرش على زعلك ,
شلتوت:أدخل يا عبقرى ..ولا أنا ضيف تقيل وغير مرغوب فيه ..
فرغلى: يا خبر يا عم شلتوت..ده أنت تشرف المكتب وتنوره.. أتفضل ,استريح تشرب أيه الأول ..
شلتوت: إزيك يا ست زوبة ..
زوبة : أهلا يا عم شلتوت ..تشرب أيه ..
شلتوت: أنا مش هشرب أى حاجة ..ألا بعد ماعرف ..
العبقرى هرب وسابنا ليه ..
زوبة : اسكت يا عم شلتوت ..ده أهل الدرب كانوا هيقطعوه ويرموا لحمه لكلاب السكك ..لو كانوا طالوه ..
شلتوت:وخال عليك الكلام ده وصدقته ..وقلت أنفد بعمرى ..وهربت ,يا خسارة يا عبقرى ..هى دى رسالتك ..تهرب أول ما الغولة حمرت لك عنيها ..
فرغلى: غولة أيه بس يا عم شلتوت ..
فى أسى وحسرة
شلتوت:غولة الجهل والتخلف ..وزبانية إبليس اللى عايزين أهل
الدرب يفضلوا عايشين فى الجهل والفقر والمرض ..لو كل واحد
صاحب رسالة ..هرب من قدامها ..أول ما تحمره عنيها
هتسمن وهى بتاكل أيامنا ..ومستقبل عيالنا ..وحياتهم
على العموم أنا جيت أريح ضميرى .. وأقولك الكلمتين دول
وأسيبك تفكر وتراجع ضميرك ,واللى يدلك عليه ضميرك
أعمله..
زوبة : يوه ,رايح فين يا عم شلتوت ده أنا عملالك الشاى بأيدى
شلتوت: أديه للعبقرى يشربه ..يمكن يعدل دماغه ..وينور بصيرته
يمسكه من كتفه ويجلسه
فرغلى :استنى بس يا عم شلتوت واسمعنى وافهمنى ,
شلتوت :اسمعنى انت الأول,انت وانت فى كلية الآداب مش درست فلسفة
فرغلى :طبعا
شلتوت :ودرست كهف سقراط
فرغلى : وحفظه صم
شلتوت : حفظه بس مفهمتوش ,وهفكرك بيه
أظلام وبقعة ضوء على شلتوت
تخيل معايا ناس بتعيش فى كهف تحت الأرض اتولدوا وعاشوا فيه طول حياتهم ومسجونين جواه ومتسلسلين بالحديد من يوم ما اتولدوا ,وطول حياتهم مبصوش حواليهم ,شايفين بس ,خيالات على حيطة الكهف , وأى حيوان صغير بيمر خارج الكهف ,بيشوفوا خياله ع الحيطة , وحش عملاق ,بيزرع الخوف جواهم
لأنهم شايفينه على غير حقيقته ,وأى قزم معدى ,شايفين خياله على الحيطة قدامهم ,مارد جبار مرعب ,وطبعا هما مصدقين اللى شايفينه بعيونهم وطول حياتهم واتربوا وعاشوا بالخوف منه ,ويكدبوا أى مخلوق يقولهم حاجة غير اللى شايفينها بعنيهم ,أفرض معايا أن واحد منهم قدر يفك قيوده وقدر يبص وراه وشاف النور لأول مرة ,طبعا عينه هتوجعه لحد ما يتعود عليه
وأفرض كمان أنه قدر يفك قيوده وخرج بره الكهف وشاف بعينه كل حاجة على حقيقتها , شاف الوحش العملاق قطة صغيرة ,والمارد الجبار عبارة عن قزم قصير ,مش ساعتها هيكتشف الحقيقة , ويروح الخوف من جواه ,بعد ما عرف الحقيقة وبصيرته اتنورت ,تصور معايا بأه لو رجع لأهله وحاول يفك قيودهم ويفهمهم الحقيقة ,فكرك هيصدقوه كده ببساطة ,ويتخلصوا من خوفهم ورعبهم اللى اتربوا عليهم طول حياتهم
ده بالقليل هيطلعوه مجنون ولا مخرف ,واذا حاول يطلعهم بالجبر يمكن يقتلوه من الخوف اللى جواهم ,
فهمت يا عبقرى
ينير المسرح
فرغلى : فاهم يا عم شلتوت ,بس ايه علاقة اللى حصل معايا بالكهف وناسه
شلتوت : هو بعينه اللى حصلك فى الدرب ,أهل الدرب طول عمرهم جوه الدرب وصدقوا عمك وتوكل أن دى دنيتهم ولازم يرضوا بفقرهم ومرضهم وجهلهم ,جيت انت وفتحت عنيهم فلازم يقاوموك ويقاوموك ,وكنت لازم تفهم وضعهم ,وكان لازم تسقيهم الدوا واحدة واحدة ,
فرغلى : كنت عايز اصحيهم من غفلتهم
شلتوت : جرعتك كانت زايده ,فجسمهم رفضها وعقلهم مستوعبهاش ,وكان لازم تصبر عليهم ,وتشربهم الدوا ,
نقطة نقطة
يقف ويمسك عطية من يده
شلتوت :انا كده ريحت ضميرى واللهم ما بلغت ,اللهم فاشهد وحسيبك لضميرك ,وأفتكر كلام ربنا لما قال ,
أن الله لا يغير ما بقوم ,حتى يغيروا ما بأنفسهم
يعنى لازم انت الأول تتغير وتقتل الخوف جواك من الغولة ,عشان تعرف تغير أهلك وناسك اللى حطوا كل آمالهم فيك , فكر ومستنينك فى الدرب يا ملك
أظلام وبقعة ضوء على فرغلى
فرغلى : ليك حق يا عم شلتوت ,الأول لازم انا اتغير ,وأقتل الخوف جوايا ,عشان أقدر أواجه الغولة واحط عينى فى عينها
وازعق بعلو صوتى ,انا مش خايف منك ياغولة ولا من عنيكى الحمرا ..
يصرخ عاليا
جايلك يا غولة ,جايلك يا توكل
راجعلك يا درب القطة ,
ويا انا يا الغولة
يغنى

ما انا فرغلى
صاحب رسالة وعبقرى
ودوغرى أكتر م الألف
وفى زمنى هذا المفترى
عايز فى وش الغول أأقف
أنا فرغلى وبقول للبشر
بالبلدى أهو وبالمفتشر
فى كل حاجة أنا هتحشر
لحد ما القى الكون نضف
الجاى أصعب م اللى فات
وخلاص ما عادش يجوز سكات
هفضل أقاوم للمات
ما انا عبقرى وصاحب هدف
ومهما تضلم جاى نور
وستر اللى مستور يتكشف
وصدقونى
مهما تضلم
جاى بعد الضلمة نور
جاى بعد الضلمة نور
يفتح ذراعية ويرجع بظهره للخلف وهو يصرخ عاليا من قلبه
جايلك يا غولة
راجعلك يا درب القطة
جايلك يا غولة
راجعلك يا درب القطة
(تسدل الستار )