الموضوع: ملك درب القطة .. مسرحية كوميدية
عرض مشاركة واحدة
قديم 12-10-2015, 12:22 AM
المشاركة 4
الصورة الرمزية رضا الهجرسى
رضا الهجرسى
من آل منابر ثقافية
  • غير موجود
افتراضي
( المشهد الرابع )

تفتح الستار

نفس ديكور القهوة والبيت وفى منتصف المسرح وفى الخلف
يوضع كرسى ملوكى مذهب على استادج يرفعه
أهل الدرب يقف فى صفين على يمين ويسار الكرسى
تبدأ موسيقى عايدة بالأبواق
يدخل فرغلى من على يمين المسرح مرتديا عباءة حمراء كعباية
الملوك وطاقية حمراء مذهبة وعلى يمينه شلتوت وعلى يسارة توكل . وخلفه زوبة وعزيزة يزغردون ويتجه فرغلى للكرسى وسط تهليل أهل الدرب ويجلس على الكرسى فى عظمة ويقف
على يمينه شلتوت وعلى يسارة توكل وخلفه زوبة وزينب
مع تصفيق وتهليل أهل الدرب
يشير لهم توكل بيديه ليصمتوا وينحنى لفرغلى قائلا
توكل :هل يسمح مولانا وملكنا المعظم بالبدء فى مراسم الحفل
يشير له فرغلى أن يقترب منه ويهمس له
فرغلى : أأقول أيه
توكل : قول فلتبدأ مراسم الحفل
فرغلى : فلتبدأ مراسم الحفل
ويبدأ استعراض راقص يستعرض فئات مجتمع أهل الدرب

الأستعراض الأول

(يتكلم عن أطفال الشوارع وتغنيه طفلة أو طفل تعدى العاشرة)

احنا ولادعايشين ف الدرب
عشان لقمتنا نمد الايد
من يوم ماوعينا على الدنيا
معرفناش ولا ام ولا اب
ولا مره حسينا بالعيد
واهو عايشين راضين شاكرين
مابنرميش حملنا على حد
مين هايفكر يسأل عنا
اويحسبنا بنى ادمين
لوف مرة تسألونا
والاجابه من الطريق
كنا هانرفض نتولد
محرومين من كل شىء
لوقدرتو تحسو بينا
وياعنى ايه نومة الرصيف
ياعنى ايه اطفال بريئه
حلمها تلبس نظيف

يقف فرغلى ويشير لهم صارخا
فرغلى :حياتكم قرف .. وعيشتكم قرف
روحوا جتكوا القرف
يصرخ توكل : اللى بعده















الأستعراض الثانى

يؤديه شباب ويتكلم عن البطالة والمخدرات

احنا شباب ...الخرجين
ف الدرب أديناعايشين
بيقولو علينا..عواطليه
بنمد إيدينا لأهالينا
وجيوبنا دايما فاضين
إحنا شبابها التعبانين
مش لاقين وظيفه تنفعنا
والشهادات ملهاش ولامعني
مابتسترش بني أدمين
لويرجع عمرنا من تاني
ولاكنا قلنا ..ياتعليم
كنا هانتعلم صنعه
ولا كنا استنينا..تعيين
احنا شباب الدرب
يعني احنا شباب الخرجين
بيقولو علينا عواطليه
وجيوبنا دايما فاضين
----------------------------------
مجموعة أخرى من الشباب المدمنين يرقصون بسطل
ومعهم هبو يحمل جوزة ويضعها فى فمهم واحد واحد

واحنا شباب الدرب المهييسين
المتكييفين
واللى مماشينها شمال ف يمين
الكيف واكل دماغنا
وبحياتنا مش حاسين
احنا شباب ف الدرب ضعنا
من اشترانا
وم ن اللي باعنا
مش فارقه محناش فايقين
الكيف سيطر علي نفخونا
سيبو مستقبل بكره لغيرنا
وسيبونا نشد السطرين
الحياه مش سكه سالكه
ويا شبابها المدمنين
ماتقلوش ابدا حلول
كل كلامكم مش معقول
ماهو لو كان بإدينا شئ
كنا باقينا من الفايقين

يتوسطهم هبو حاملا الجوزة فى يده ويغنى

واحنا تجار المزاج
بنوزع لشباب غاويين
لا بنضرب حد على ايديه
الكيف اصلوا يا ناس غلاب
هيا دى شغلتنا يا سيدنا
وده اللى اتربينا عليه

يتقدم دنجل ويغنى

واحنا رجال الدرب يا سيدنا
كل مكان يلاقونا واقفين
نقتل نحرق نخطف نجرى
نسرق الكحل من العين
احنا رجالها العفيجية
بيسمونا قال ايه بلطجية
لو حد بنلقاه فى طريقنا
يبقى يا حظوا سموا عليه
ما هو اكل عيشنا يا سيدنا
أذى السالمين

يقف فرغلى ويشير لهم صارخا
فرغلى :حياتكم قرف .. وعيشتكم قرف
روحوا جتكوا القرف
يصرخ توكل : اللى بعده


تتقدم فتيات الليل فى تابلوة راقص

واحنابنات الدرب السكر..
و هوا بيتنا اللي متاوينا
نشقي نتعب ف الليالي
النهار شمس تعرينا
إحنا ينات الليل ياسيدنا
ع الشغلانه خلاص أخدنا
مين هايجي ياخد بإيدنا
واحنا ف الوحل إتحطينا
مش بكيفنا غصب عنا
كان مقسوم لينا ونصيبنا
مين يحس ومين يحاسب
مين يهمو ف الاصل عارنا
احنا بنات الليل ياعني
غصب عنا مش اختيارنا

يقف فرغلى ويشير لهم صارخا
فرغلى :حياتكم قرف .. وعيشتكم قرف
روحوا جتكوا القرف
يصرخ توكل : اللى بعده



يتقدم بعض الرجال فى ملابس ممزقة ورقع كالمتسولين

واحنا يا سيدنا
اللى الفقر عايش فينا
جوة الدرب اخدنا عليه
نتعب نشقى عشان لقمتنا
ويبقى تمنها اهانة وذل
ومننطقش ولا نقول ليه
دى اللقمة على قد اليوم
وف بكرة دايما مهموم
هيعدى ونكفى عيالنا
ولا ها نقضى الايام صوم
حتى الحلم غلبان ضعيف
ما بيقدرش يبص لفوق
كل امالنا هدمة ورغيف
لو نتمنى فجأة نفوق


يتقدم رجال يلبسون ملابس الموظفين النمطية

واحنا يا سيدنا الموظفين
( يخرجون جيوب البنطلون )
وجيوبنا فى أخر الشهر فاضيين
ندعى يا رب ادينا الصبر
العمر خلاص مبقاش فيه
وبيحكوا ويقولوا حوافز وعلاوات
وبنضحك ونقول .. جايز
ويعلوا الاسعار من نحية
طب هنكفى هنكفى عيال ومدارس
قولولنا ازاى ولا قلولنا هنعمل ايه
ده الخارج اكتر م الداخل
ومرتبنا مبقاش فيه
حسوا يا ناس الرحمة شوية
لو هانروح ونمد ايدينا
ما تسألوناش عملنا ده ليه
ما هى حياتنا جوة الدرب
فقر وغلب وهم وكرب
حالنا يا سيدنا
ربك وحده يعلم بيه

يقف فرغلى فى غضب ويغنى وينقسم الجميع إلى فريقين على جانبى المسرح ويغنى فرغلى

وأنا فرغلى
صاحب رسالة وعبقرى
ودوغرى أكتر م الألف
وفى زمنى هذا المفترى
عايز فى وش الغول أأقف
للقطة درب .....ودربها
ما يحس بيه غير ربها
وإن خربشت
مش ذنبها من غلبها
هبطت عليا مملكة
من غير فكاكة وفذلكة
ولله بس المشتكى
مين اللى يحس ومين يصون
أنا فرغلى وبقول للبشر
بالبلدى أهو وبالمفتشر
جتكوا القرف .. جتكوا القرف

يخلع العباية ويرميها ويلقى الطاقية من على رأسه على الأرض
وهو يصرخ
جتكوا القرف .. جتكوا القرف


يقف توكل ويغنى بشماتة

قال أيه ..
صاحب رسالة وعبقرى
مصدق نفسه ياعينى
وعامل عبقرينو
وعليه شويه افكار
ربنا بجد يعينو
ورامى نفسه فى اى حاجه
وعامل فاهم فى كل حاجه
وفاكر الناس غلط فهمينو
قالولو ورثت ورث كبير
فرح وفكر ورث خطير
وماكنش مصدق نفسه
ولما جه وشاف بعينه
درب القطه وال فيه
صرخ وقال مش عايزه
مش عايزه جتكوا القرف
(يشير توكل لأهل الدرب بيديه )
قال أيه ..جتكوا القرف.. جتكوا القرف
يشير لدنجل وهبو صارخا ويشير على فرغلى
توكل : عايزينه
يصرخ بعض أهل الدرب ويقودهم دنجل وهبو
- مش عايزينه .. مش عايزينه
والنصف الآخر من الشباب والفقراء ..
-عايزينه .. عايزينه
يهجموا عليه وهو يهرب مسرعا خارج المسرح


( تسدل الستارة )