الموضوع: ملك درب القطة .. مسرحية كوميدية
عرض مشاركة واحدة
قديم 12-07-2015, 03:21 PM
المشاركة 3
الصورة الرمزية رضا الهجرسى
رضا الهجرسى
من آل منابر ثقافية
  • غير موجود
افتراضي
المشهد الثالت

(تفتح الستارة )
صالة شقة فخمة الباب فى منتصف المسرح وصالون مذهب وترابيزة سفرة وباب جانبى يدل على غرفة النوم
يفتح توكل الباب
توكل :أدخل يا ملك برجلك اليمين وسمى.. دى بأه شقة عمك الله يرحمه.. واللى بقت شقتك .. بعد ما خده ربنا عنده ..
يمد فرغلى رجله اليمين ويدخل ويصفر بفمه
فرغلى : يااه .. دى حاجة فخمة قوى ..
توكل : اصل عمك كان راجل نزهى فنجرى ..ويحب ينزة
نفسه ويدلعها .. وكان يحب يعيش كملك ..
فرغلى :واااو ..اللى يشوف درب القطة من برة والفقر
اللى معشش فى كل ركن فيها عمره ما يتخيل العز اللى انا شايفه بعنيه ده كله ,يعنى الملك فى وادى ..ورعاياه فى وادى تانى
خالص ..
توكل يهمس لنفسه
توكل : ما كله من دم الغلابة والاتاوات والنهب والسرقة ..
وكله يبلعه فى كرشه ويلهفه لوحده ..الله يجحمه مطرح ماراح ..
ثم يصرخ فى بكاء و خبث
توكل :كله ده من تعبه وكده وشقاه . الله يرحمه كان راجل شريف وميقبلش القرش الحرام أبدا..
فرغلى :الله يرحمه ويبشبش الطوبة اللى تحت راسه..
توكل : والحمد لله ربنا عوضنا بيك.. فأنتم خير خلف لخير سلف .
جعلك الله زخرا لدرب القطة وناسها الغلابة
فى تفاخر
فرغلى : الظاهر إن عمى كان عبقرى وصاحب رسالةهو كمان ..
توكل يهمس لنفسه
توكل : عبقرى فى النهب والسرقة .. وصاحب رسالة
فى ضياع مستقبل الشباب وإستغلالهم ..
ثم صارخا
توكل : سبحان الله .. تقولش فولة وإنقسمت نصين ..الأخلاق واحدة والعبقرية كمان واحدة ..وإن شاء الله تكمل رسالته العظيمة دى فى عهدك الميمون ..
فرغلى :إن شاء الله .. بنفسك إنت وأهل الدرب هنحل
سوا كل المشاكل ..ونخليها جنة ..
توكل :إن شاء الله .. دلوقتى أنا عايزك تنام وترتاح ..ومن بكرة إن شاء الله هاخدك أعرفك بأهل مملكتك ورعاياك علشان تبتدى حكمك الميمون ومش عايزك تقلق خالص..ومتفكرش فى حاجة
خالص .. ما دام عمك توكل معاك.. نام وحط فى بطنك بطيخة صيفى ..ياللا اسيبك دلوقتى تنام.. وبكرة نعمل جولتنا فى
مملكتك يا ملك ..وتزاول مهامك الجليلة..
فى مملكتك الجديدة..درب القطة .. يا ملك درب القطة ..
يتجه توكل للباب ويفتحه فتخرج امرأة جميلة ترتدى قميص نوم
وتشرب سيجارة فيفزع فرغلى ويجرى على الباب صارخا
فرغلى : عم توكل .. الحقنى يا عم توكل ,
يدخل فرغلى ساحبا توكل من يده ويشير للمرأة
توكل : مالك يا فرغلى وايه الهيصة اللى عاملها
فرغلى : يعنى مش شايف بعينك مالى ,
توكل : تقصد فيفى , مالها
فرغلى : مالها انت مش شايف بعينك مالها,لهو انت منهم
توكل : يا ابنى دى مسئولة المزاج فى المملكة ,وشغلتها تسرح البنات وتلم منهم وتدى الملك , يعنى موظفة عندك ,
فرغلى : وبتعمل ايه هنا ,
توكل : ما هى مسئولة بجانب مهامها الجسيمة,عن مزاج الملك وراحته ,فاهمنى وراحته ,
فرغلى :يا عم توكل أنا راجل صاحب رسالة
توكل : صاحب رسالة على عينى وراسى ,بس المزاج حاجة والرسالة حاجة تانية خالص ,
فرغلى :انت بتشتغل ايه بالظبط يا عم توكل
توكل : لا يا ملك ,متفهمنيش غلط , أنا صاحب رسالة زيك بالظبط , بس كل واحد يؤدى رسالته بطريقته ,وعلى العموم
متزعلش أنا افتكرت ان العرق دساس ,وعمك ماكانش يعرف ينام
ألا بعد ما تدلكة فيفى والذى منه , وبدال انت مالكش فى التدليك والذى منه , بلاها فيفي, بس طمنى يا واد يا فرغلى ,وبينى وبينك كده ومتخافش ,سرك فى بير ,
فرغلى : سر ايه وبتاع ايه
توكل : تكون عندك مشكلة كده ولا كده ,قولى وانا بعون أحلهالك وخليك غضنفر ,سبع
فرغلى : اطمن يا خويا , مفيش أى مشكلة ,وانا تمام التمام ,
توكل : كده ,ماشى انا حبيت اطمن عليك بس ,
ينظر للمرأة
توكل : ما لكيش نصيب يا فيفى يا بنتى ,الملك الجديد صاحب رسالة ,أسبقينى على الشقة عندى
تضحك المرأة بميوعة وتخرج من الشقة

أظلام المسرح

صوت شخير فرغلى عاليا وصدى صوت كأنه عفريت
الصوت : هوووووووو .. يووووووووو ..هييييييييي..
نسمع صوت نقر على زجاج شباك الصالة
يتوقف الشخير ونرى فرغلى فى الظلام كشبح وصوته مرتعش وفى خوف
فرغلى :ايه ده بأه كمان ..يا ساتر يا رب ..
الصوت :هووووووووو .. ووووووووووه..هيييييييييييييي
صارخا فى خوف
فرغلى : مين .. مين .. أنت مين..
الصوت:انا العفليت .. هاهاها ..أنا العفليت ..هاهاها ..
فرغلى :يا لطيف اللطف يا رب ..عفريت..أنا يطلعلى عفريت أنا
أنا اللى بخاف م القطة..يطلعلى عفريت فى درب القطة
وعايز ايه منى يا عم العفريت ..
الصوت:عايز أكلك هم ..هم هم هم..
فرغلى: عايز تاكلنى .. هم هم هم ..بس أنا طعمى وحش قوى ومش هيعجبك ..
الصوت :طعمك وحش ..يععع.. طب أأقولك.. أسخطك..أيوه
أسخطك قلد(قرد )..لا ..لا.. أسخطك حمار احسن.. عشان أنا
بحب الحمير..واغنيلك ..باحبك يا حمارى ..
أنت تحب اسخطك ..قلد(قرد) ..ولا حمار ..
تزداد النقرات على زجاج شباك الصالة
فرغلى :الحقونى .. الحقونى .. العفريت هيكلنى .. عفريت ..
عفريت ..
صوت صفعة شديد وفرغلى يفتح الباب
فرغلى: العفريت لزقنى على قفايا .. الحقونى .. الحقونى ..
قفايا ورم ..
يدخل توكل ساحبا فرغلى من يده ويقاومه فرغلى
توكل : تعالى يا فرغلى متخافش كده .. أهدى..أهدى وشيل ايدك من على قفاك ..عفريت ايه بس اللى لزقك على قفاك
فى فزع
فرغلى:عفريت يا عم توكل عفريت .. لزقنى على قفايا
وكان عايز ياكلنى هم هم ..وبعدين يسخطنى قرد ..لا لا يسخطنى حمارأيوه حمار..أصله بيحب الحمير ..
توكل: عفريت ايه يا بنى بس ..
فرغلى:أنا شفته من قزاز الشباك .. عينيه بتطق شرار.. وبقرنين
وبيطلعلى لسانه ..بيغظنى ..
يدخل شلتوت بجلباب النوم
شلتوت: في ايه يا جماعة .. فى ايه يا فرغلى صوتك صحى الدرب كله..خير.. حصل أيه ..
فرغلى :عفريت يا عم شلتوت عفريت..كسر قزاز الشباك وهجم
عليا .. وراح لزقنى على قفايا ..وكان عايز ياكلنى مش كده وبس
شلتوت :فى ايه تانى..
فرغلى :ده كان عايز كمان يسخطنى حمار ..حمار يا عم شلتوت حمار ..
فى تلعثم وأرتباك
شلتوت:أهدى بأه خلاص .. مشى .. أطمن انصرف خلاص ..
أدخل كمل نومك ..
فى خبث
توكل :أيوه خلاص .. أهدى واطمن ..عمك شلتوت صرفه و حبسه فى قمقم خلاص ..
ينفجر شلتوت فى بكاء شديد
فرغلى: فيه ايه يا عم شلتوت .. هو لزقك على قفاك انت كمان..
شلتوت:أنا مش عارف اتأسف لك ازاى يابنى .. أنا تعبت ..
والله يابنى أنا فى نص هدومى منك
توكل:مش وقته الكلام ده يا شلتوت ..ياللا يا ملك متخافش خلاص العفريت صرفهولك عمك شلتوت .. تعالى ..وشيل إيدك من على قفاك ..
يضحك
توكل :خلاص العفريت اللى بيلزقك على قفاك ,انصرف ..
يدخل شاب فى العشرين سمين على أطراف أصابعه ويصفع توكل على قفاه
توكل : آى..يا بن الكلب..هي حصلت يا شلتوت الكلب أنت وابنك
ضاحكاويصفق
فرغلى : لزقك يا عم توكل ..العفريت لزقك على قفاك ..
فى غيظ
توكل :طيب يا اهطل يا ابن الاهطل..أنت رجعت تانى تلزقنى على
قفايا ..
يمسكة من قفاه
توكل :مسكتك ..ومش هسيبك ..
الاهطل:سيبنى يا ابن الكب(الكلب) .. يا ابن الكب يا توكل ..
سيبنى ..سيبنى ..
فرغلى : يبقى مين الواد العبيط ده ..انت تعرفه..
توكل : طبعا أعرفه ..واعرف ابوه كمان .. ده بقى العفريت ..
اللى لزقك على قفاك ..
فرغلى:معقولة ..المتخلف العبيط ده ..هو العفريت ..
الاهطل:سيبنى يا ابن الكب انت .. سيبنى .. هالبك ..
هالبك على قفاك ..
فى صوت حزين
شلتوت:سيبهولى أنا يا توكل..تعالى يابنى الله يهديك اروحك ..
سيبه يا توكل..
الاهطل :لا .. هه .. انا عايز العب مع الواد ده .. قفاه كبير وحلو
وعاجبنى ..اصل قفاه بيطرقع جامد ..
فرغلى : تانى .. ده انت هريته ..ده أنت أيدك أتقل من بتوع أمن
الدولة ..
شلتوت:تعالى يابنى الله يهديك .. تعالى يا حبيبى ..عارف لو
سمعت كلامى وجيت معايا ..هجيبلك عزيزة ..
الاهطل فى فرح
الاهطل : هتجيبلى عزيزة ..ماسى ..ماسى ..هات عزيزة..
فرغلى : يااه ..ده فرح قوى لما سمع اسم عزيزة ..
توكل :العبيط الاهبل ده بيحبها ..
الاهطل:آه بحبها ..بحبها وشلتوت هيجوزهالى ..
يغنى
الاهطل: انا احب عزيزة وعزيزة تحبنى ..
أركب العجلة وهى تزقنى..
يسحبه شلتوت فى حزن وهو يغنى
الاهطل:هيه .. هيه .. أنا عزيزة اللذيذة .. والبوسة منى ببريزة
فى صوت حزين
فرغلى :لا حول ولا قوة ألا بالله ..اللهم أما أحفظنا ..اللهم ما
أحفظنا .. مين ده يا عم توكل..
فى سخرية وخبث
توكل : ده بأه يا سيدنا .. ابن معلم الأجيال وصاحب الرسالة
اللى عملته مستشارك الخاص ..
فى إستغراب
فرغلى:أبن الأستاذ شلتوت..معقوله..الراجل الوقور ده وصاحب
رسالة زى..ابنه متخلف عقلى ..
فى خبث
توكل :مربى الاجيال اللى سلمت له دقنك ..أهو معرفش يربى
ابنه الوحيد .. ومش بعيد تلاقيه هو اللى مسلطه عليك
يلزقك على قفاك فى الطلعة والنازلة عشان يطفشك م الدرب ويحكم هو مكانك .. ده راجل سو وخبيث ..خد بالك منه وفتح عينك وفنجلها ع الآخر.. ده راجل العوبان ..
وأعرف بقى مين اللى بيخدمك بأخلاص ومين بيغشك ..
فرغلى :معقولة الكلام اللى بتقوله ده .. انا مش مصدق ودانى ..
عم شلتوت..بيغشنى انا ..و طالق أبنه المتخلف عليا
عشان يطفشنى ..ويحكم مكانى .. كلام معقول برضة..
توكل :ما هو كان عايز يبقى الملك ..مكان عمك الله يرحمه ..
فرغلى : معقولة عم شلتوت.. بالأخلاق الوضيعة دى ..
توكل :صدقنى يا ملك .. عمك توكل هو المخلص الوحيد ليك
فى درب القطة كلها ..وباخدمك باخلاص لوجه الله تعالى
أى والله .. لوجه الله ..وأنا الوحيد اللى حفيت رجليه
عشان يلاقيك ويجيبك تاخد حقك..وتستلم مملكتك..
فرغلى:اخص عليك يا عم شلتوت .. وانا اللى آمنت لك..
وصدقت انك صاحب رسالة زى ..
أشكرك يا عم توكل أنك شلت الغمامة من على عنيا..
وعرفتنى ..مين عدوى ..ومين صديقى .. وانت من دلوقتى مستشارى الخاص ..
فى خبث
توكل : العفو يابنى العفو..عمك توكل دايما هتلاقيه فى خدمتك
ورهن أشارة من صباعك الصغير ..يا ملك درب القطة ..وحاميها
ومبعوث العناية الآلهية ..صح الكلام ..
فى تفاخر
فرغلى :صح الكلام ..
أظلام المسرح



صوت جرس الباب يضئ فرغلى النور وهو يتثائب ويتمطع فى كسل
فى فزع صارخا
فرغلى : مين .. مين..
شلتوت :افتح يا فرغلى يابنى.. انا عمك شلتوت..متخافش افتح ..
أنا لوحدى ..
فرغلى :لو انت عم شلتوت بصحيح .. أدينى أمارة ..
شلتوت :بإمارة العفريت اللى لزقك على قفاك ..
يفتح الباب وفى ضيق
فرغلى :خير يا عم شلتوت .. فيه أيه تانى .. عايز تلزقنى
على قفايا تانى ..أتفضل يا سيدى ..قفايا ..آهه ..ألزقنى
ألزق ..ما انا خلاص فهمت الفولة..وقاعد.. مش ماشى ..
شلتوت :يا بنى أرحمنى ..متبقاش أنت والزمان عليا .. ده انا
فى نص هدومي منك ..ومن اللى حصلك ..و مقدرتش انام ولا يغمض لى جفن .. قبل ما افهمك واحكيلك حكايتى مع الزمان ..
وما صدقت النهار طلع وجتلك على طول ,
فى ضيق واستهزاء
فرغلى:لأ ماخلاص يا ست وردة ..انا فهمت كل حاجة ..
وعرفت ليه سلطت ابنك الشحط ده..يعمل اللى عمله
بس فاتك حاجة مهمة قوي..إن اللى قدامك ده ..عبقرى ..
وصاحب رسالة ..ومتفتوش الفوتة .. وولا عشرة زى إبنك
الشحط ده يهزونى ..ويخلونى اسيب الدرب ..
شلتوت :شحط ايه يابنى بس .. ده طفل صغير ..
فرغلى :الهلف ده طفل..أنت فاكرنى أهبل ولا عبيط.. ده عمره
ميقلش عن عشرين سنة بالميت..
شلتوت :اتنين وعشرين يابنى ..اتنين وعشرين ..
فرغلى: وقعت بلسانك أهو.. هو في طفل..عنده اتنين وعشرين
سنة ..هنكدب من أولها ..
يحدث نفسه
فرغلى : كلامك طلع صح يا عم توكل.. طلع راجل كداب وملاوع
فى حزن
شلتوت : اسمعنى يابنى الله يخليك .. خلينى أبعبع معاك و ارتاح . فرغلى :هتدافع عن نفسك تقول ايه ..هه.. سمعنى يا سيدى ..
أشنف آذانى..اطربنى ..أشجينى ..
فى صوت حزين
شلتوت :حكايتى ابتدت من أربعين سنة.. كان ليا بنت عم ..
اتربينا سوا.. وحبينا بعض حب كبير قوى لمااتخرجت م الجامعة.. اتقدمت لعمى ..وطلبتها منه.. رفض..عشان انا فقير ولسه مكونتش نفسى ومش هقدر اسعدها ..وجوزها لتاجر غنى عشان يضمن لها مستقبلها ..
كانت صدمة كبيرة عليا قوى .. على ما فقت منها كانت
السنين عدت والزمن سرق عمرى.. وحبها مكلبش فى
قلبى ..ومفيش ست تانية قدرت تحل محلها فى قلبى ..
فى رقة
فرغلى :ياااه .. ده انت كنت واد حبيب كبير قوى .. وبعدين يا
روميو..حصل ايه ..
شلتوت:سنين مرت.. ووراها سنين.. و عرفت بالصدفة
انها اتطلقت من جوزها عشان مبيخلفش ..
مشعرتش بنفسي ..والدنيا مسعتنيش م الفرحة..
جريت عليها وعرضت عليها الجواز.. وافقت على طول
واتجوزنا
فى رقة
فرغلى : ياااه .. ده أنت ولا قيس فى زمانه .. وبعدين ..
شلتوت:ونسيت سنين الحرمان اللى عشتها .. وربك اراد واحنا
فى السن دي انها تحمل .. والدنيا مسعتشى فرحتنا ..
الدكاترة كلهم نصحونا بعدم الخلفة فى السن الكبيرة و دى
لخطورتها على الأم وع المولود.. مسمعناش كلامهم .. وقبلنا حكم ربنا وكان حلم الأولاد وعزوتهم .. نستنا عمرنا اللى جرى بينا ..
فرغلى: طب وهو الخلفة ليها سن..
شلتوت:كل الدكاترة أجمعوا خطورة الحمل للست اللى تعدى
الأربعين.. ده مش كده وبس ..ده فى الأخطر ..
فرغلى: أيه كمان .. ده انت حكايتك كلها مآسى وتقطع القلب ..
شلتوت: قالوا ..إن احنا قرايب .. ولاد عم يعنى ..
فرغلى: ودى فيها ايه دى كمان..
شلتوت:قال ايه.. جواز القرايب بينقل الامراض الموروثة من
الجدود ..
فرغلى: صح .. حتى احنا بنقولها بالبلدى كده ..
العرق يمد لسابع جد ..
شلتوت:المهم..رمينا كل كلامهم ده ورا ضهرنا..
والنتيجة اهه شفتها بعنيك .. ولد متخلف عقليا ..امه ماتت وهية بتولده جالها تسمم حمل ..وراحت فيها عند خالقها ..وسبتهولى أتعذب بيه
فرغلى يبكى بشدة
فرغلى :كفاية ..حرام عليك يا شيخ ..قطعت قلبى ..
شلتوت يبكى بشدة
شلتوت :على الله تكون سامحتنى .. وعفيت عن عطية ..
فرغلى : عطية ..عطية مين ..
شلتوت: عطية الله ابنى ..العفريت اللى لزقك على قفاك ..
فرغلى :متفكرنيش.. حرام عليك .. قفايا نقح عليا ..
لما جبت سيرته
نسمع صوت نقر على الزجاج وصوت عطية فيضع فرغلى
يده على قفاه بسرعة ويدخل عطية مسرعا ويلف حول فرغلى
ويقف شلتوت بينهما فيبعده فرغلى برقة
فرغلى : سيبه يا عم شلتوت
شلتوت : ياابنى أنا خايف عليك وعلى قفاك
فرغلى : متخافش على قفايا وسيبنى اتفاهم معاه ,
عطية : هووووووووه .. يوووووووووه
انا العفليت
فرغلى: ها ..خلصت ..تعالى جنبى هنا,
عطية :لا مس هاجى ..هه ..
يقلد عطية
فرغلى :هجيب لك حاجة حلوة ..
الاهطل :مس عايس حاجة حلوة ..
فرغلى:طب عايس ايه يا حبيبى ..
الاهطل :عايس ..أخوفك م العفليت..
فرغلى:ماسى ..ماسى..يا امى ..يا امى ..هيييييييه أنا خفت هييه أنا اتخضيت م العفليت ..يا امى ..
يضحك عطية عاليا مع كل كلمة
فرغلى:يااااااااااه ..ضحكتك حلوة قوى يا ابن الأيه صافية ومن قلبك تعالى يا حبيبى أأقعد جنبى..باينك الحاجة الوحيدة اللى لسه طاهرة ونضيفة فى الدرب الملعون ده ..تحب تلعب معايا ..
عطية :آه ..العب معاك ..العب معاك..
فرغلى : نلعب ايه..نلعب ايه ..ايوه ..تيجى نلعب الاستغماية ..
عطية:مس بحبها ..مس بحبها ..أنا عايس العب فى قفاك..
فرغلى: تاااانى ..قفايا تانى..قفايا لأ ..
فرغلى: ماسى ..ماسى ..نلعب ايه ..نلعب ايه يا فرغلى
اه ..نلعب ال..
ينظر فرغلى لشلتوت
فرغلى : خلاص يا عم شلتوت روح انت وسيبلى عطية معايا
شلتوت : متأكد يا ابنى من كلامك ,ماشى ربنا يحبب فيك خلقه
يغادر شلتوت الشقة ويغلق الباب خلفه وفرغلى يلعب مع عطية
يرن جرس الباب يجرى عطية ويفتح الباب .

فرغلى : مين يا عطية
عطية :دى بت وحشة
تدخل عزيزة حاملة صينية طعام ومتزوقة وتلبس فستان جميل
عزيزة :اخص عليك يا عطية ..بأه عزيزة حبيبتك ..وحشة ..
عطية :لأ ..انتى مس عسيسة ..عسيسة حوة ..أنتى وحشة ..
يصفر فرغلى بفمه
فرغلى : معقولة ..ايه الحلاوة دى كلها .. كنتى مخبية الحلاوة دى كلها فين ..بأه انتى عزيزة انتى..
فى غضب
عطية :لأ يا عبيط انت ..دى مس عزيزة ..دى بت وحشة عزيزة
حوة ..
فرغلى :بأه الطعامة والحلاوة دى كلها وحشة ..
فى خجل
عزيزة :متكسفنيش بأه يا ملك ..ما هو لبس البوصة تبقى عروسة ..وانا نفذت أوامرك ..وبعدين نستنى انا كنت جايالك ليه آه ,عمك رجب باعت لك سندويتشات بدنجان مقلى وشوية فول
وطعمية ..يستاهلوا بقك ..
يخطف عطية الصينية منها ويجلس على الأرض يأكل
عزيزة :يوه الواد خطفهم ..
عطية :انا آكلهم انا ..
فرغلى :طب على مهلك يا حبيبى لتزور وتفطس ..بالراحة يا وله..خد نفسك ..
يدخل شلتوت ويرى عطية
شلتوت :الله يكسفك يا شيخ ..انت مركب زمبلك فى بقك
ينظر لعزيزة
شلتوت : ومين الأمورة دى ..انا أول مرة اشوفها فى الدرب ,
عزيزة :ايه يا عم شلتوت ..معرفتنيش ..انا عزيزة ..
شلتوت :لأ ..قولى كلام غير ده ..كنتى مخبية الحلاوة دى كلها فين يا بت
عطية :لأ يا عبيط انت ..دى مس عزيزة ..عزيزة حوة ..دى وحشة
شلتوت :يوه.. نستونى أنا كنت جاى ليه , ايوه أيوه ,يالا يا فرغلى ياابنى غير هدومك أهل الدرب كلهم مستنينك
عزيزة :ينزا ازاى يا عم شلتوت ,ده الجدع يا كبدى مشقش ريقه ببق مية حتى ,
شلتوت : يا ستى انا هبعتله ساندويتشات من تحت ,يالا يا ملك غير هدومك واجهز عشان تستلم مملكتك ,
يخرج شلتوت ويدخل فرغلى غرفة النوم تحاول عزيزة اللعب مع عطية فينطر يدها
عزيزة : كده يا عطية ده عزيزة حبيبتك ,
عطية : لا يا ختى انتى مس عسيسة , انتى وحشة ,عسيسة حلوة
يدخل دنجل وهبو وهم يمسكون زوبة من ملابسها وهبو يمسك جوزة فى يده يحاول أن يضعها فى فمها
هبو : اسمعى كلامى يا بنت الناس وخديلك بوسة
زوبة : يا خواتى , يعنى أول ما ابوس ,ابوس جوزة ,
هبو :يا بنت الناس اسمعى كلامى وخديلك بوسة ,عشان متحسيش بالتعذيب ,
زوبة : تعذيب يا سنة سوخة
هبو :طبعا ما هو دنجل لازم يقررك الأول قبل ما يتويكى
زوبة : يتوينى كمان,يا سنة مهببة بسماخ اسود غطيس عليا وعلى اللى خلفونى فى ساعة واحدة
هبو :متغلبنيش وخديلك بوسة ,ده عايز اخدمك ,
زوبة : تخدمنى
هبو :طبعا , ما انتى ساعتها ,مش هتحسى بالنار اللى هيكويكى بيها , ولا بالكرابيج اللى هتنزل تلسوع وتقطع فى جتتك ,
تخطف الجوزة وتسحب نفس عميق
زوبة : هى فيها نار ولسوعة , لا يا خويا ,هات البوسة
تصرخ بالصوت الحيانى يخرج فرغلى مسرعا فى فزع ويقف مذهولا حين يرى زوبة يقترب منه دنجل
دنجل :احنا مسكنا الجاسوسة دى على حدود المملكة وهى بتعس وتطقس عليك يا ملك , قبضنا عليها , ومستنين أوامرك ,نتويها على طول , ولا نعذبها لحد ما ما تقر مين اللى بعتها عشان تفجر نفسها فيك ,
يشير دنجل على زوبة
دنجل : بصيلها كويس يا ملك هتلاقيها , أرهابية بنت أرهابية ,
فى سطل وهى تهتز فى سطل
زوبة : أنا بيقولولى يا أروبة ,مش أرهابية
دنجل :شفت يا ملك ,أهى اعترفت من غير تعذيب
فرغلى :اعترفت بأيه
دنجل : بأسمها الحركى فى التنظيم الأرهابى , أروبة ,انا بأقول نتاويها على طول
فرغلى : تتاوى مين يا مخبول انت ,دى زميلتى فى الشغل والمؤمنة الوحيدة ,بعبقريتى , يلا انت وهو سيبوها وتوكلوا على الله
دنجل : أمان يعنى
فرغلى : ايوه أمان
هبو يشير بالجوزة لفرغلى
هبو :أى أوامر يا ملك
فرغلى :لا يا خويا مستغنين عن خدماتك ,اتفضلوا مع السلامة
تجرى زوبة فى سطل وتسحب فرغلى وتشير على دنجل
زوبة : هو ده , هو ده ,
فرغلى :هو ده مين ,
زوبة :هو ده اللى عليه العين ,أفهم
فرغلى :أفهم أيه ,الله يخرب بيتك يا هبو ,لبيت بوستك ,الولية راحت فى البلالة ,
زوبة :ماليش دعوة , انت قلتلى أول ما استلم المملكة ,اختارى اى راجل هجوزهولك على طول ,والراجل العجوز ده ,
فرغلى :توكل
زوبة :ايوه ,توكل ,شاهد عليك ,
فرغلى :طيب أهدى كده , يا عزيزة خديها وحطى دماغها تحت الدش ,يمكن تفوق , واعمليلها قهوة سادة دوبل
تسحبها عزيزة وتدخل بها غرفة النوم
يدخل رجل فى الخمسين من عمره حاملا صينية عليها ساندويتشات مظهره قذر ملابسة ملطخة يده وسخة وجهه ملطخ
ببقع سوداء علامات المرض بادية على وجهه يسعل ويكح أثناء كلامه ينظر يتحرك ببطئ إليه فرغلى فى أرف وهو
عم على الكبابجى
على: صباح الخيرات يا ملكنا الهمام..
فرغلى :أنت مين يا عم ..وتعرفنى منين..
الكبابجى :مين فى درب القطة كلها ميعرفكش يا ملك ..
أنا عمك على الكبابجى ,عمك شلتوت أمرنى أطلعلك سندوتشات الكبدة دى لحد عندك ,آمال ايه ده انت ملكنا وتاج راسنا , ولازم نخدمك بعنينا ,أنا بأه عملتلك سندوتشات وصاية ,وحبشلك شوية كبدة بالفلفل الحراق والليمون .. يستهلوا بقك ..
فرغلى: بصراحة انا كنت هموت م الجوع ..وريحة الكبدة الموحوحة فى ايدك دى جوعتنى أكتر..بس لما شفت منظرك المأرف ده.. نفسى أتسدت عن الأكل ,
الكبابجى:ليه يا ملك بس .. دى كبدة زى اللوز..وهتدعيلى
طب دوق الحتة دى من أيدى ..
فرغلى :لا أدوق ولا أتنيل ..أأأأأأأف ..أبعد ..ريحتك غطت ع الكبدة أنت أيه مبتستحماش .. مبتغسلش أيديك حتى ..
اكل من ايدك الوسخة دى ازاى..
ضاحكا
عم على:والنبى دمك خفيف والله .. اسكت يا ملك ع اللى حصل
لى من يومين .. جاتلى دوخة ووقعت وشالونى هيلا
هوبة ع المستشفى الميرى .. وعينك ماتشوف ألا النور
.. تحاليل وحقن ومحاليل ونقل دم..وفى الآخر يقولولى عندك أبصر أيه كده ..
فرغلى :وتطلع ايه الأبصر ايه دى.. طلع عندك ايه يعنى ..
عم على : حاجة كده فى الكبد .. قال ايه الكبد تعبان..
ضاحكا
عم على:قال أيه .بياع الكبدة.. كبده تعبان .. مش نكتة دى والنبى
فرغلى :كبدك ماله يعنى .. فيه ايه ..
على:مش فاكر.هم قالوا أيه بالظبط ..حاجة زى ماتقول كده ..
سيم .. سين ..
صارخا فى فزع
فرغلى: يا خبرك اسود..ومتنيل بستين نيلة ..تقصد فيروس سى .
ضاحكا
الكبابجى:أيوه ,الله ينور عليك وعلى حواليك.. طبعا الملك .. ولازمن ,ولابد تكون عارف كلتها حاجة ..هو فيروز سيم ده ..
يضع الصينية على السفرة
الكبابجى:اتفضل يا ملك بالهنا والشفا ..تحبيشة هتدعيلى عليها .. يطيح بالصينية على الأرض فى غضب صارخا فى غضب
فرغلى :هنا ايه وشفا ايه يا متخلف يا جاهل أنت .. عندك التهاب
كبد وبائى وفيروس سى ..وبتأكل الناس من ايدك ..ده انت كارثة على درب القطة كلها.. لأ ..لأ ..أنا رسالتى لازم تبتدى بيك ..
أحميك الأول ..وبعدين ..اسلمك للمستشفى بأيدى..
يجرى على بسرعة وهو يصرخ
على :ألحقونى يا خلق يا هووه ,الملك عايز يحمينى ,
يحدث نفسه فى صوت فخيم صدى صوت
فرغلى : راجل جاهل.. متخلف..ايه ياعبقرى حظك المنيل دى ..
مرض وفقر وجهل وتخلف وشباب تاهت سكته وأطفال شوارع اتقتلت طفولتهم ..وناس عايشة فى غيبوبة ,وناس عايشة ومش عايشة ,وبنات ليل انتى ايه حكايتك معايا يا درب القطة ..
انتى مش محتاجة عبقرى وصاحب رسالة أنتى محتاجة معجزة
لأ .. دى أنتى عايزة رحمة ربنا تنزل عليكى م السما ..
يركع على قدميه ويرفع يده للسماء داعيا بصوت عالى حزين
رحمتك يا رب .... رحمتك يا رب ... رحمتك يا رب
(تسدل الستار )
وإلى لقاء قريب مع المشهد الرابع