"فز من الصبح
بويا مثل السهم
ألتفت لأركان البيت
ودع إخوانه وعزم
نحنى جدامي بخجل
حضني وعلى جبيني لثم
أرخصيلي وداعتج يايمه
تراب الوطن مشتاك أشم
*****
خطا يبتعد عني
ومالي بيدو وأبتسم
ناديت وليدي خذ
أخوك التواه انفطم
شنسوى بلا وطن
الغازي بخيرنا يحلم
روح وليدي لقن
المعتدي دروس وحكم
*****
آنا وأخوانك فدى
لاتندهش وتوكف صنم
أحلف أبد ما ينهم
ماطول الخشم يشتم
الغالي يرخص أسكي
ترابه من وريدي الدم
طبطب على جتفي
وشد على إيدي بعزم
*****
شخبرج يا يمه
وطنا بضيم وعدم
غزا أمريكي الوطن
وداس على الخشم
حرك يايمه النخل
من حرايرنا أنتقم
لربعي وأخواني كتل
لشرايعنا سب وشتم
*****
باك لحضارتنا وإرثنا
هم عالحجر إلتأم
حاقد يايمه وهجم
ثكل دمر وهدم
إحنا بشدايد يايمه
لازم على المحتل نلتم
نطردوا من ديرتنا
وعلى مافعل يندم
*****
وداعت طاهر حليبك
هاماتنا أعلا من اللقمم
ابنج يايمه الماخاف
ولادنك الراس وانهزم
صفن ارتعش همس
لسانه جدامي لجم
*****
شعر
خالدالفرج