**المطر .. راس القلم
الشاعر : خالد الذيابي
المطر راس القلم والطرس للامطار جاعـد = والقوافى كنها ضـي اللهب والنـار حيـّه
ياحبيبى لا تقول الحظ الاقشر مـا يساعـد = شفت عاد شلون صبري قدّم لجرحي هديـّه
والله إني من زماني ما هقيت الحظ واعـد = لين جابك هكذا صدفه وحطـك فـى يديّـه
أسهمك فى بورصة صدري غلا دوم إتصاعد = شوفها قدّام بدع البيـت وانظرهـا شويـّه
باني ٍلك جوف قلبـى للهـوا عـدّة قواعـد = كلّها تنقشـك فـى قلبـي حيـاةٍ عاطفيّـه
أشهد انـك بالمحبـه حاجـزٍ كـلّ المقاعـد = يوم غيرك مـا حصل لـه لاكثيـر ولا بليـّه
جعل ربي ما يقوله لو تمنيت انـتباعـد = كل شي ٍ لك يصيـر إلاّ القطيعه والجفيّـه
كلّما ضاقت عليّه دنيتـى جيتـك مواعـد = بحضنك بعيوني الثنتين هـاذي قبـل ذيـّه
ويش أسوي وأنت إلك بالجوف برّاقٍ وراعد = والخليقه في نحيّه وأنت قدرك فـي نحيـّه
ما يداوي علّتي ياكـود ضمـّك بالسواعـد = فوق صدر الّى كويته بالغلا مليـون كيـّه