أبو العربي _ قصيدة للشاعر محمد أبو زيد الأسيوطي

أبو العربي
من الساعة
اللي تحت الصفر
إلي الساعة
اللي لسه مجتش
وأبو العربي
ده نازل هتش
بخرطوم الوعود
بيرش
علي صحرة أمانينا
يمنينا بوعود بالغش
يخش
أراضي احلامنا
ويزرع من جديد
خضرة
وطاقة نور
في بيت مهزور
وكان عشش
فيه الغربان
لعب علي جرحنا
العطشان
و أرض آمال
سنين بايرة
سبوني بس أترشح
وأكون نائب
عن الدايره
في مجلس شعب
راح أمثل
أمانيكم
وأكمل خطوتي لبكرة
وادي الضي تاشيرة
رحيل لليل بلا عودة
واهد جبال من الوحدة
تسافروا
خارج أحزانكم
وختم الجودة لأمالكم
وشمس زمان كانت راحلة
هترجع من جديد تحلي
دأنا منكم
هزلل كل مشاكلكوا
واحل اللغز
قدامكم
دانا واد عز
وابن الوز عوامه
بأيدي أهز
مصباحكم
أصبحكم
بأحلامكم
وقف واحد
من الطوابير
وكان بينز
من غيظه ومن كيده
وقال عجبي
بقالك كم سنة بتمز
في كلامك وبتعده
يا ابو العربي
هقول كلمة من نفسي
كانت واقفة
علي لساني
فوق الكرسي
مشفتش الا مصلحتك
وعدت كتير
برصف طريقنا
للفرحة
وتشجيره
تحلي بحور دموع مالحة
وبكتيروا
يومين نتجح
وتنسانا
وحتي داخل المجلس
بتتمجلس
ونومك حلو تشخيروا
كما الغفلان داخل
زفة
بتصحي بس علي يدك
بترفعها علي
موافقة
وصفقة
بس خسرانه
عقدناها مع سيادتك
وانا عن نفسي مش عايزك
ولا هديك
في يوم صوتي
سنين شايف معاك موتي
وبعد سنين مع الغربة
بلا استحياء
راجع تطلب بكام كدبة
حقوق ووفاء
وقف واحد من الأتباع
وقال يا عم
حقاني كفايا صداع
رماني زيف
بكام تهمة
وقال تخاريف
ومش فاهمة
كلاب تعوي
لكن هنسير وهنكمل
وايه تعمل
فقير شكلك كما التربي
وبالعربي
عشان ضعفك
هنفضل عمرنا نزفك
وهنتفك
علي الارض
اللي جيت منها
وبالطول وبالعرض
طالما انت مستغبي
هينجح غصب عن أنفك
ابو العربي
ابو العربي
وقف بيكمل الغنوة
قصادنا سنين
كتير حلوة
وهنغني وهنغي
هيجي بكرة
متحني
باحلي ربيع
ولو بكرة مجاش
وحدة
انا اوعدكوا يجي بعدة
ماهش طايرة
هييجي كله ويا الصبر
وادعو ربي يلهمكم
مرارة وصبر من عنده
دانا منكم
انا ابن الدايرة
انا منكم
هرشح نفسي علشانكم
مفيش غيري يمثلكم
ولا يصلح
لامثالكم
وده دوري ودة واجبي
ابو العربي


رابط للقصيدة فديو علي اليوت يوب




رابط صوت للقصيدة اديو

http://www.ziddu.com/download/11770509/.wma.html[/QUOTE]