منتديات منابر ثقافية

على كيفك يالاسمر من تمر بالحي
لا تتبختر بممشاك
من دم ولحم مثلك خلقنا الرب
مو احنه بشر وانته بذهب سواك
كلنا اولاد ادم وكلنا من حواء
وكلنا الموت تالي ڴلي شنهي ارجاك
تريد تصير خالد لو اله تعيش
لواسطورة تبقه انته الزمن خلاك
لو انته تعيش بلا اكل لا ماي
لو هذا الهوى عاشڴ الك يهواك
على كيفك تهده لا تطيح بساع
تره اليتهده ما يعثر وحك عيناك
واذا احنه نذوب بعطرك الفواح
لان انته جميل ومن الجمال افلاك
لان احنه بشر والبشر طبعه يحب
ويعشڴ من ضمير ومن صدك يهواك
وربك هم وضع نسيان عند الناس
والتنساه انته هوه هم ينساك
لا تغتر يالاسمر بهيده بسك عاد
اخاف تطيح طيحة منهو يتلـﮝاك
ربك من خلق مو بس جمال البيك
يوسف صورة اجمل يوسف شمحلاك
اصابع ڴطعن من طب على النسوان
ولا حسن بديهن تدري يوسف ذاك
ولان يوسف نبي ورغم الجمال البيه
من جته زليخه صاح ربي رضاك
مو يوسف غلط لو غره حسن البيه
بس يوسف اتنزه من المكيد هناك
شكد رادت تغره وحاولت وياه
بس يوسف رفض وناده ربي حماك
لذلك اني انصحك والنصح مو عيب
لا تغتر بحسنك يا جميل كفاك
لان حته الورد هم بيه عطر ويفوح
بس كل الورد بالخلق بيه اشواك