حوسة
 

يادي الحوسه يادي الزّنقه...عالصُّبح كدا تهل مصايب
هاتوا الدكتور حاسّ بخنقة...يارب يروح واحنا حبايب

جانا سعادته ياد منَّك ليه...حيُّوا فخامته أُقفوا لمعاليه
وافضلوا ادعوا ان الله يخليه...وبالمرّه كمان بوسوله ايديه
رايك ايه نسيت انا حاجه يا بيه…( كُلّك ذوق أديت الواجب)

هوّا اللي بيشقي ويسعدنا...مين غيره يحقق آمالنا
نطلع ايه قدّامه احنا...مالك ياد كشَّرت السّحنة
مفصول من يومه مغلِّبنا…( ما استبعدش اننا نتصاحب)

لو يؤمر غنُّوله بحاضر...لو يُفجر جننّا الساحر
وان حكى لينا موقف ساخر...إضحك كركر خليك فاكر
يُخطب نهتف مزبوط شاطر…( ابقى تعالى عشان نتحاسب)

كتَّر خيرك كتَّر خيرك...بسّ ما علّقتش غير صورة!
( مضطرّ أجيب واحد غيرك)...لا يا فندم غلطة ومقدورة
نِملا الحيط بما يرضي ضميرك…( آسف برَّه أصلك خايب)

يادي الحوسه يادي الزّنقه...عالصُّبح كدا تهل مصايب
هاتوا الدكتور حاسّ بخنقة...يارب يروح واحنا حبايب

الله عليك
ذووق جميل

اسعدتني بحضورك أخي الكريم

تحيه وتقدير