إنسانية
 

يا ريتني جهة سيادية
حدّش يعصي لها أمر
لأمرت بالتسوية
بين اليابس والبحر
وعدلت في العطية
بين السايل والصخر
ووهبت لكل بائس
نعيم ما لهوش حصر
وشحنت الإنسانية
باجمل أماني وفكر
ولكل من يعاني
من مرض أو فقر
أوفر كل راحة
من غير دلال أو قهر
الدنيا فيها يا ما
ناس ملهمش ضهر
بيعض الشوك حشاهم
ما فايتش ليهم سطر
يتهنو في اي جملة
أو ليهم يبني عذر
ليه الظلم في كوننا عم؟
وكاسرنا شر كسر؟
حارمنا من الغناوي
ونازل فينا عصر؟
يا رب اديني قوة
واوهب أحلامي نصر
نفسي ابقى قمر فتوة
فارس نبيل وصقر
أرسم بالنور طريقي
وأعبي الدنيا طهر
واسكب شهد المحبة
في كل طريق ونهر
واغذي الناس مودة
فيسيروا في كل جسر
حاضنين الخير في دنيا
ما فيهـاش أيّ شـرّ