منتديات منابر ثقافية

يا فرات الله وأكبر
طاحت أركاك شلم
البيت من يفتل أساسه
السور حتماً ينهدم
قوم وكّ انفض عباتك
واشحن جروحك عزم
***
صيح صوتك مو تعبنه
الصرخة مكفولة بزلم
جفت بطون الحناجر
واندفن بيها الحلم
صيحة البسكوت تذبح
تاكل بلب العظم
***
كافي يا صوت الحضارة
الذلة مرهونه بحزم
وصلت الذلة أعلى بابك
داست العتبة افتهم
بكيس ينحط أعلى راسك
تمشي ويقودك قزم
***
ها فرات لا عله بختك
تنتظر فزعة شهم
حبلى مطعونه بشرفهه
وعارهه بقصتك وشم
قوم شد حيلك تحزّم
واكرب رباط الحزم
***
الخيل تسرج ظهورها
تبين المن تنلجم
قوم فّك كتاف غيظك
وارزم كتارك رزم
العين وحده تهل الدمع
بيوم ينطق الخشم
***
يا فرات الموت واجب
لأجلك وياحيف الزلم
وروحك الداسو قيمهه
جبارة وما تقبل تنهزم
الموت مرهون بصبرهه
وروح أهل الفرات بعزم
***
قوم وارفض ضيم قلبك
واركض للموت يهابك وينهزم
الزلم مكفولة لثلاث
الكاع والمال والشرف ما ينلثم
وأنت يل حقوقك خذوهه
ما تثمن عند الشهم
***
خطفوا خبزة جهالك
وساوموك تسكت تنلجم
للشرف وصلت تراها
لا تسكت مادم الخشم يشم
اعلنها وكّ صراحة
هاي الكاع وميدان الحسم
***
الكاع كاع أبوي وجدي
والعريضة بالدم تنختم
أجنبي ما يفوت الوطن
ولامسموح يقعد بثلم
هذا ترابك يا فرات
انخه ونادي الزلم
***
أنت العودتنا من خيرك
تشحذ بينا الهمم
وأنت يافرات الخير
الزرعت بينا القيم
وأنت القلت ما نطخي
الراس وعندنا علم
***
شلون يعن ويصرخ
الوطن وأنت تعد نجم
إياك تتوانى لعداك
هذا العدو ما ينرحم
الله بكتابه قال
البادي ردّله الظلم
***
لأن بعادة الفرات
ما يتأقلم أبد وينسجم
طهر ترابك يا فراتي
نادى الوطن ماضل سلم
اعلنها بصراحة مانهزم
نهوس ونشد العزم
***
لا بد الظلم اش ما مد
تاليه بأعماله يقع بالظلم
خلّ الغازي الحاقد
يفتهم ما ضل غشم
كود التاريخ يردّله
ماضل عبيد بالسوط تنحكم
***
احنا أهل الحضارة
المحكومة بعادات الشهم
واحنا تاريخ وفكر
الما يقرانا يفتهم
خلّ نعلنها بصراحة
صاحب الحق ما ينهزم
***
شعر
خالد عبد الجبار الفرج