الوصولي
 

تغش تكدب وتنافق
غايتك تعيش مرتاح سليم
وتبوس ايدين اللي يرافق
المال ويرميلك ملاليم.

وعامل لي فيها صاحب مبدأ
ولو يؤمروك على طول تبدأ
وعادي اوي انك تتهزأ
وتقول انا استاهل يا كريم

الدنيا عندك ماديات
والحكمه خد زي بعضه وهات
ما هي الكرامه نايمه فسبات
لو وكّلوك جزمة وبرسيم

تفيد بايه بس الاموال
والنوم في قصر بأحسن حال
مدامت اخلاقك تقرف
حتى الكلاب يابو وش دميم

اما اللي محترِم وصاين
النفس مع مين من كاين
تتسد نفسك في وجوده
وتقول عليه انسان يا بهيم

أصلو ما يتخطى حدودو
ولا يختلفشي في وعودو
وان مره جه يضرو حسودو
ما يعودش ابدا تاني سليم


وفضّلت بوس البياده
وقلعتها كمان بسعاده
وديموقراطية واراده
حتطهّرك يا وسخ يا لئيم

يا سيدي امثالك جُبنا
بعتوا وشرّايين احنا
بالدم والروح الجنه
طالبين رضاك يا أحد يا عليم

وقال ايه بيتكلم في الدين
بالذمه دول مش مكسوفين
دا لو يشوفك بنيامين
يقول اخويا وبعدو اليم

بتفرق ايه انت عنهم
المصلحه دينك ودينهم
متقولشي وحشين كارهينهم
هوا انت تعرف معنى الضيم

ورغم دا اقولك مبروك
حال اليومين دول بيسروك
زادو اللي تنبح ويبرّوك
لحد ما تنعض يا رميم

اما بقى صاحبنا الشاري
كم قرش في جيوبو مداري
واهو رزقو من عند الباري
يضرب ليه للواطي تعظيم