تقدُّمي
 

(( قوللي إيه وفين يوجعك))
(( احكي لي انا كُلِّي باسمعك))

انفتاحي…..وتقدُّمي
وبقُدرة امريكا احتمي
وعِلِّتي... يجوز في دمي
((في الراس دا لو... مُخّك معك))

وعصْري شيك... ومتحرَّر
وعقلي هوّا اللي يقرَّر
اذا كان دا صح… ولَّا غلط
وبنص تاريخي ما اتربط
ورغم دا... دماغي اتخبط
من التخلف اللي احنا فيه
عايزين طريق… به نتزبط
حاسس علاجي الشانزليزيه
ولو غيره ممكن أضيَّعك

وظلامي لُمته وأقصيته
وفضانا بالضيِّ مليته
ولازهّرت بلدي وأبصرت
نموّ غير فقر لاغيته
بالعلم وحده….. مصنعك

انا قلت ابيع وابقى حضاري
وفي الغرب قدوة لأفكاري
وعلقه سخنه ادَّاني جاري
وزْهِقت شغَّل لي أتاري
(( الحقنه دي... رح تنفعك))

انا قصدي عيشه زيِّ الفل
هيصة وعُرْي يفيد الكل
وانجرِّت الست وخانت
اكتب دوا يصيبها بالسل
(( ايه تاني كان... بيمتّعك))

تريقتي عصحاب العِمَّة
لو ايد حرامي قطعوها
ولبسْت انا فليلة العمه
وخزنة فلوسي شفطوها
آه لو اطول واحد فيهم
لاصفي دمُّه ملوش ذمه
وبين الكلاب جثته رِمَّه
الاقيش سلف كاسة وشمَّة
أنهي عقوبه رح تردعك

وبادعو لسلاح الحكمه
مع العدو وورده ونسمه
اصل الجهاد جهل ومصايب
وحتى دي بقيت فيها خايب
نسا وشيوخ واطفال بريئين
طيران بيحصد روحنا منين
ماحاربنا في بيوتنا امنين
وقوَّه فاقتنا بملايين
قُوّه وطبيعي... تلسعك
لسّه الجناة... في مدفعك

طمِّني حالتي تشخيصها ايه
فتحت مُصحف!! دا طب اجيه
شَكْلي لِدُكتُر رينيه حروح
الصدر ضاق ونومي في تيه
ودراويشك انت... بتخدعك

ُُُُُُُُُُُُُُُّّّّّّّّّّّّّّّ