منتديات منابر ثقافية

كائن جديد
............

أتولد النهارده كائن جديد
بلسان طويل ينحت في الحديد
أيديه ملفوفة حولين رقبته
محفور على قفاه ختم العبيد
له عين واحدة تحت الجبين
يشوف الصور مقلوبة والشمال يمين
ما يعرفش ينطق غير كلمتين
تمام يافندم أمرك يا بيه
ما يفهمش هو رايح فين
بيتحرك بس لما تدوس عليه
..
وفيها إيه ما البلد ولادة
أحرار وعبيد
وشموس وبيادة
نخيل وجريد
بيظلل غابة
عساكر وطراطير
بتمحي إرادة
نسور ودبابير
على دم غلابة
الكائن أتولد عشان الحاجة
في وسط الهوجة
ولما ينفض المولد
حتشيله الموجة
حتوصله معانا بشكل جديد
أو تبلعه ويكون حدوتة

,,

أحمد عبد العظيم