|
|
|
الشاعر / حامد زيد ~
http://www.adab.com/photos/folk/27.jpg
الاسم : حامد زيد سعدون فارس العازمي مواليد 4/فبراير/1977 للميلاد الحاله الاجتماعيه : متزوج ولديه ثلاث ( اسماء-ساره-ريم ) حاصل على شهاده دبلوم تجاري من كلية الدراسات التجاريه عضو ديوانية شعراء النبط الكويتيه بدرجة شاعر ممتاز موظف في وزارة الشؤون الاجتماعيه والعمل كانت بدايته الاولى في الظهور عبر وسائل الاعلام من خلال البرنامج التلفزيوني (ديوانية شعراء النبط ) وذلك في اواخر عام 1996 للميلاد . والبدايه الفعليه بالصحافه من خلال مجلة المختلف في احتفالية العدد المؤوي وكان في نوفمبر 1999 للميلاد . له أربع إصدارات ... _ ديوان مقروء ويحمل اسم أربع خناجر _ والبوم مسموع يحمل أسم شعر حامد زيد _ وآخر يحمل أسم السفينه _ والاخير شريط مشترك للشاعر حامد زيد والشاعرخالد المريخي _ واسمه امسيةهلا فبراير ... ~ |
مختارات من قصائده :
// على ذاك الطريق على ذاك الطريق اللي يسمونه غرام أحباب وطت رجلي على دربه ولا أدري وش نوى فيني تبعته لآخر دروبه .. ألين أن القمر قد غاب تعب قلبي ، ولا تعبت مسافاتٍ توديني لقيت الليلة الجردا : هدب ظل وسما واعشاب بعد ذاك الظلام اللي يتوهني عناويني صدفتك معجبه فيني وياليت .. الغرام : اعجاب وتراك انتي الهنوف اللي هقيتك تستحقيني عطيتك عشق من قلبي .. وسلمت لغلاك رقاب وغيرك يحترق قلبه ولا يقدر يحاكيني أنا قبلك صدفت عيون لكن ويش جاب لجاب؟ ترى كل العيون اللي لقتني ما تكفيني رماني حظي العاثر عليك وجيت لك طلاب ولا أنتي اللي عشقتيني ولا انتي اللي عتقتيني تعالي واعتقي ذاك الخفوق المولع المرتاب مهب لاجلي ، عشان الله يجازيك ويجازيني تعدي في سما عشقي ولو عشقي خراب أصحاب وصوني بالهوى نفسك قبل لا انتي تصونيني وشيليني على متنك : خفوقٍ باريٍ منصاب ومن فوق الغرام العذب .. شيليني وحطيني ولا منك هقيتيني شجاع وما يطيق يهاب أنا لك بالهوى والله مثل ما انتي هقيتيني أنا ما أمشي ورا غيرك ولو أنه يطق الباب وترى عيبٍ عليّ أطعن .. ولو كثرت سكاكيني زهودٍ ما يطيق الدم لا داين ولا طلاب شجاع وعارفٍ نفسي وأظن أنك تعرفيني غيورٍ ما عرفت أضحك مع العذر ببّرود أعصاب أبيع عيوني الثنتين قبل أنك تخونيني إذا شد الغرام .. اترك خفوقي : بين ناب وناب لفرقىً تكسر ضلوعي .. ولا عشقٍ يوطّيني أنا رجلٍ ولي غيره .. وإذا شفت الهوى كذاب تثور بقلبي الفزعه ولا تهدى شياطيني سؤالك لو يزعزع بي كياني ما قبلت عتاب اجي لك وأسالك نفس السؤال اللي سألتيني عن العشق القديم أبواب .. تقفيها كثير أبواب بعد ذاك الحبيب اللي خدعني وانخدع فيني أبي عشق تحسب له كل نظرات العيون حساب وابي قلبٍ علي قلبي ، وابى دينٍ على ديني وابي نظرة عطا توفي ولا تخلف بدون أسباب وابي منك قبل لا نتي تصديني .. توديني وابي دربٍ على العذال صعبٍ متعبٍ غلاب وابي نفس الطريق الصعب يبعدهم ويدنيني ترى لو للقلوب عيون ولدموع العيون أهداب حشى ما تنزل الدمعه لغيرك لو تركتيني أنا أول من عرف قدرك وأنا توي صغير وشاب وابي منك ما دام أنك عرفتيني تحبيني ما دام أني لقيتك في طريق أسمه غرام أحباب دخيل الله ، وبعد الله دخيلك .. لا تخليني ما دام أن كل من يحيا على وجه التراب تراب عسى تنساني الدنيا مادام أنتي ذكرتيني // |
ثامن السبع العجايب
اسمعي والكل منا له هواه وله ميوله لاتمسين بكلامك شعرة بروس القرايب ان حكيتي ماوفيتي وان تحديتي عجوله تحسبين ان كل فعل تفعله يمناك صايب تحسبين انك خذيتي بالحشاء صولة وجوله تحسبين اني ذكرتك مع نسانيس الهبايب والله انك لو ذبحتي خافقي لالقاك حوله عاشقه تشقىبفلب من طريق العشق هايب كم رضيت اسكت عليك من القهر وانتي زعوله خايف اضحك واستفزك واهجرك واعيش ذايب ادعيت انك خجوله وادري ان منتي خجوله وادري انك تخجلين الشمس من فوق السحايب مايحببني بقلبك يالهنوف الا فضوله وماينسيني غرامك غير تكرار المصايب عاشقه جيتي ورحتي يالحبيبه يالعذوله مابنيتي لي طموح ولاتركتيها خرايب تستبيحين القلوب وتستحقين البطوله واستحق بعدك تايب واموت تايب ياكثر ماشال قلبي شيء اكبر من حموله ولاعفيتي عن غلاه ولابخلك بالوهايب كنه ارحم من همال المزن للزهر بذبوله وانتي اقسى من سموم القيض وكفوف اللهايب وانتي ادرى في غلاك بداخلي شاللي يزوله وادخلي دخله على الله واحفظي ذيك السبايب ماخبرت اللحظه اللي حللت قربك تحوله ولاهقيت اني بشدد للجفا قلب وركايب ماهقيت انك تحسبين الزلل وانتي جفوله وماهقيتك تكرهيني كثر حبك للطلايب كن قلبي في وصالك وابل لحظة نزوله وفي فراقك مثل دمعه تنحدر من عين شايب كنت ابي وقفه حبيبه تنهض القلب بخموله طافح بالعشق وانتي عايبه والحظ عايب كنت عصن كل كف غير كفك مايطوله كنت درب ودمعتين وقلب وجروح عطايب كنت ابيع العمر كله وارخصه عرضه وطوله للعيون اللي هدبها ثامن السبع العجايب بس ابرضيلك غرورك واكسر القلب بذهوله وقتها ماكنت افكر صايب او كنت خايب والرجل لو ماعلى بالشهامه والرجوله صدقيني صعب يقدر يملك قلوب الحبايب صدقيني مايوالف خافق البنت بسهوله بالهوى يابنت حواء غير طلاب النشايب والسهر والعشق الاول والهوى واللي ينوله شيء اقسى من همومك وألعنه حاظر وغايب والهموم اللي دعتني من بعد سن الطفوله كلها من تحت رأس العشق ملعون الصلايب // |
أربع خناجر
مـشكلة .. لا جـات حاجتك بيدين البخيل مـا يـفكك لـين تـدفع كـثر مـا يدفعه ومـشكلة لا صرت مطعون بكفوف الدخيل فـي ظـهرك أربع خناجر وبالصدر أربعه ومـشكله لا ضـاق بـالوقت رجالٍ ثقيل يـطـلب أحـبابه وعـيا زمـانه يـنفعه لـيت ربـي مـا يحاسب خليلٍ من خليل دام مــا لـلحظ فـزعة ولـلوجه أقـنعه دام مـاللعذل تـالي ومـا بـالحيل حـيل الـغـلا سـمٍ نـذوقه .. ومُـرٍ نـجرعه نحتري فيه اللقا .. والحصيل اهوَ الحصيل مـثل حـلمٍ مـا تحقق .. وعييت أقطعه ! كـني الـلي حـط بـشفاه من جمر المليل لا قـدر يـرميه لـلناس ، وازرى يبلعه ! والـظروف الـلي حـدتني لنيران وفتيل عـرضت دمـع الـمحاجر لـشيٍ يجزعه والـمدامع بـالغلا.. لا تـحال ولا تـحيل والـمشاكل كـل مـاجات .. جات مجمعه أعـذلوني عن هوى النفس وعيوني تخيل فـي حـبيبٍ مـا تـركته ولازلـت اتبعه مـغرمٍ فـي حب مثله ولا أرضى له بديل عـيني تـشوفه .. وقلبي يجوع : ويشبعه ذاك كـل مـازان بالي ، وطالعت النخيل مـا ذكـرت الاّ ثـباته بـوقت الزعزعه مـا هـو إلا قـطعةٍ مـن حشا قلبٍ عليل ومـاني الا قـطعةٍ مـنه مـخلوقٍ مـعه لا جـميلٍ شـفت قـبله ، ولا بعده جميل الـعذاري رهن رمشه ، وانا رهن أصبعه والله انـه لـو طـلبني طـلوع المستحيل ل اطـلعه .. مـنّيه ، مناك .. يعني لطلعه مـا عـلي مـن الـملامه ولا هرج الهبيل مـا أشـجع الرجال لا ثار غيره ماأشجعه فـي عـيون اللي عشقني ولا جاني هزيل الله الـلي حـط عـشقه بـقلبي ، وازرعه لو سكت .. ينطق له الصم ، والدنيا تسيل وان حكى .. لو يمشي المزن يوقف يسمعه سـلسبيلٍ مـن شـفاته يـخالط سـلسبيل مـعمعه بـسكات واحـلى سـكات بمعمعه مـا هقيت ان أكثر الليل يمرح بالجدايل : لـين شـفته شوف عيني (( بكفه يرفعه )) وإن حـييت ومـا بـقى لي معه كود ليل لـسهره بـأول غروبه .. واموت بمطلعه والله ان العشق جمره : وطاحت بالشليل ! وان حصل ما طاعك الوقت بحبابك .. طعه ومـنهو الـلي عـلم أعداي نكران الجميل ومـنهو الـي خـان خـلي وحاول يقنعه كـل عـاذل ردنـي عنك يالطرف الكحيل يـاعسى الله يـقلعه .. يـا عسى الله يقلعه يـامعرض قـلب الأحباب للدرب الطويل الـسعه . لا بـارك الله بـالضيق . السعه والله أن الـوقت قـاسي وأنـا ماني ذليل وأشـهد ان الـرجل مـرات ظـنه يخدعه وأنـتم تـعذلون خـفاق بـعيون الـعديل مـا رحـمتم نـار جـرحه وغيرة مدمعه والـسوالف لـيلها لـيل والـحايل يـحيل والـمـشاكل مـشـكله مـشكله مـتجمعه مـشكله لا خـانك الـوقت بالحمل الثقيل لـو زرعت الزرع هوج العواصف يشلعه ومـشكله لا صـار عـاذلك مايبرد غليل لا تـرده طـيب كـلمه ولا حـدٍ يـمنعه ومـشكله لا صرت مطعون بكفوف الدخيل فـي ظـهرك أربع خناجر وبالصدر أربعه // |
تزعلين وتقعدين
عـافت الـشمس المدينة وأعلنت وقت الزوال رغـبةٍ لـلنوم مـنها مـع عـيون الـناعسين أبـعدت مـن يـوم شـافت بالسما ضيّ الهلال كـنّـها كـانـت تـهزّا بـالهلال وتـستهين كـفكفت صـبح التلاقي من ورا روس الجبال واسـتخارتني وراحـت وابعدت عن كل عين وانـتي أخـطيتي خـطاها وانعزلتي بالوصال ولا رحـلتي مـن سـكات ولا وعدتيني تجين عـشت عـمري بـالمحبة في سبيل الاحتمال وانـتي تـعيشين عمرك ( تفرحين وتجرحين ) مـن غـرورك فـي جمالك ما عطيتيني مجال وأدري إنـك تـفهميني لـو بـغيتي تـفهمين كيف أشوف الشمس تشرق بالسما وانت ظلال ؟ ومـن يـعيش بـوسط غارٍ للذياب الجايعين ؟ كنت أحسب الكره زايل والجفا لو ( طال زال ) ولا بـديتي بـالغرام ولا بـقى فـيني حـنين أشـهد إنـي مـا خـطيت ولا نويت الانعزال ومـا خـدعتك فـي غرامي لين شفتك تخدعين اصـدقي بـالوعد مـرة لـي ولـو فيها سؤال مـن عـرفتك مـا أذكر إنك توعدين وتصدقين كـنت أشوفك من عيونك تأمرين أقوى الرجال والله إنـي قـبل أعـرفك مـا هقيتك تخضعين كـنت أشـوفك تـبعدين وقلت من باب الدلال وإن بـعدتي عـن عـيوني قلت باكر ترجعين كـنتي أكـثر فـي عيوني من عدد وبل الخيال ويـن أنـا ما الد وجهي كنت أشوفك تضحكين وإن بـغيت أصد عنك من ( يمين ومن شمال ) مـا قـوت عـيني تلفّت ( لا شمال ولا يمين ) عـاشقٍ والـعشق بـلوى وأشهد إن الحال حال ولا تـركتي رحـمة الله ولا عـرفتي ترحمين وأدري إنـك فـي غـرامي للأسف نلتي منال افـترقنا فـي دقـايق والـسبب لـعنة لـعين حـبك أشبه في غرامي ( بالوصال الانفصال ) ويـلعب الـخفاق لـعبة كـبرياء الـخاضعين بـالهوى مـاهي غـريبة نـكبة عيال الحلال ولانـي أول من يصون ولا انتي آخر من يهين الـصداقة فـي عـيون الـناس مـنفى للعدال وكــان ردّت لـلـصراحة كـلبونا مـذنبين الـمـحبة شـبه زالـت والـصداقة لاتـزال بـس أبـبقى في عيونك ( حامد ) اللي تعرفين عـلّميها يـا قـصيدة واضـربي فـيني مثال عـرفـيها بـالـبداوة فـي طـباع الأولـين عـلّميها كـيف نـصنع صـبرنا والاحـتمال عـلّميها كـيف نـفلح بـالعمل ( دنيا ودين ) عـلّـميها فــي سـوالف حـلّنا والارتـحال عـلّـميها كـيف نـظهر جـورنا لـلجايرين عـلّـميها يــا دقـايق ، عـلّميها يـا لـيال عـلّميها يـا عـصور وعـلّميها يـا سـنين إن عـشقنا مـا بـغينا غـير عـشقٍ بالحلال وإن نـويـنا مـا لـفينا كـود نـاس طـيبين كـامـلينٍ فــي عـطانا بـس لـله الـكمال والـرجل فـينا غـرامه لـو يـعين ويستعين ابــدويٍ مـا يـقوده لـلردّى شـد الـحبال يـعسف الـيدّ الـشحيحة لـلعطا حـتى تلين هـمنا فـعل الـرجولة رمـزنا لـبس العقال وانـتي الـمكياج كـله صار في وجهك سجين عـندك الـمكياج مـوضة تـحسبين إنه جمال صـار هـمك فـي حـياتك تكشخين وتطلعين والا أنـا قـلبي بـقى لـي بالمحبة راس مال والله الـلـي مـبـتليني بـالهوى والله يـعين إن بـغيت أعـشق أبـالقى كثر حبّات الرمال لـكن انـتي لـو بـغيتي صعب مثلي تعشقين قـلت لـك كل الصراحة وأختم أطراف الجدال وإن زعـلتي مـن كلامي ( تزعلين وتقعدين ) // |
قدها وقدود
أنـا ربـتني الـدنيا عـلى جـزل العطا والجود ونـفسي لـلوفا والـطيب وفـعل الخير جزامه وأعـارض مـنهج الهابط وأوافق للصعود صعود وأسـيّر نـفسي بـعقلي مـدام الـنفس هـدامه ولا تـثّر بـي الـبسمة ولا كـحل العيون السود ولا يـقوى عـلى قـلبي صغير الحسد وأجسامه أردّ الـجود بـأمثاله وأقـابل بـالجحود جـحود وتـرى لا خـير فـي رجلٍ يوطّي للردى هامه وعـندي مـع أهـل العِليا مواثيق وثلاث عهود أوفــي لـه مـطاليبه وأودّه وأرفـع أعـلامه أعـايش مـركب الـدنيا عـلى متن القدر مولود أبـعرف هـو صـحيح إنّ القدر بالناس دوّامه ؟ ومـن ويـن الزمن مقبل وإلى وين الليال تقود؟ ومـن فـي هـالزمن يقدر يوجّه خطوة أقدامه؟ ومـن له بالزمن غاية ومن عنده هدف منشود ؟ ومـن مـنّا قـدر يـعرف خـفايا مقبل أيامه ؟ عـرفت إنّ الشقا باقي ، عرفت إنّ الحسد موجود عـرفت إنّ الـقدر يـفرض علينا بأسوأ أحكامه لـقينا الـعرب حـاسد وشـفنا بالعرب محسود وبـه نـاسٍ لـنا ضـامت ، وبه بالناس منظامه ويـنقص بـعضنا خـوّه ويـنقصنا وفاء وعود مـدام الـحسد بـاقي وبـعض الـناس نـمامه ولا تـرجى بـها الدنيا من ربوعك يجيك اسنود ولا تـشره عـلى رجـلٍ عـيونه خانت أقدامه وقـابل خـطوة بخطوة وجازي بالصدود صدود تـناسى غـلطة الصاحب عليك بلحظة اخصامه ولا تـخطي تـرى لصبر الحليم اليا سلاك حدود تـروّى واعـرف بـضرب الحديد تفكك لحامه تـجنب كـسرة الخاطر ولو حبل الزعل مشدود تـراك بـكسرة الـخاطر حـكمت القلب بعدامه ولا تـزعل عـلى رجلٍ بذل لك ولرضاك جهود ولا تـامن مـن الـحاسد رضـاه ورفعة ابهامه نـبي نـصبر عـلى الـدنيا قلوبٍ بالحياة زهود مـدام إنّ الـبخت عـيّت تـوّفق رمـعة سهامه وأنـا مـا قـلتها راجي ولا أطلب بعدها مردود ولـكـن الـفـتى ودّه يـحقق جـملة أحـلامه وبـمشي لآخـر الـدنيا ولـو كـلّ الأنام اقعود وعـن وجـه الـزمن بكشف حقيقه وأرفع الثامه صـحيح إنـي صغير السن ولكن ( قدها وقدود ) وأنـا عـندي مـع الـدنيا مـواقف ترفع الهامه طـموحي يـملي الـعالم ولابـه لـلطموح قيود مدام إن الأمل طبعي ( عرين وصرت ضرغامه ) خـلقنا الله مـن تـرابه ولأحضان التراب نعود تـحت رمـل الـثرى نبقى تغطي جسمنا خامه سـلفنا مـا لـحقناهم تـحت قـاع التراب رقود ولا يـبقي مـن الـميت سـوى ذكراه وعظامه ولـو طـال العمر فاني وترى عمر الفتى محدود وكـلٍ يـطلب الـمولى يـبيحه يـحسن ختامه وأنـا بـلّغت بـلساني وربـي والأنـام شـهود وصـحف الـبيّنة جـفّت وعـنها رفعت أقلامه // |
يقولون ما لا يفعلون
سافرت ضيّ المدينه واسلبت روحي بلاهـا أهجرتني وهجفتنـي تايـه مضيّـع دليلـه هزّت ركون المباني... حسبي الله من جفاها فرحةٍ جيت أحتضنها واثرها منـي جليلـه ماهقيت ان القمر يعشق من الدنيـا حلاهـا لين هوّن من سماه أليا طرا العالـم رحيلـه مابقا حتى الشجر عزّل من جـذوره قفاهـا والسحاب المعتلي صرّح من العالي مجيلـه سافرت نفح العفافه واحتضن قلبي شذاهـا سافرت كل المحبـه والأساطيـر الجميلـه مركبي ضيّع مسيره بين تجديفـت غلاهـا القلب ينوي جداها .. والعمر يرجي سبيلـه واصبحت أرضٍ شحيحه ترتجي ديمة غلاها ترتجي مزنة لقاها ترتجـي نسمـه هزيلـه عبرتي عالخد تجري والعمر يجري وراهـا والحزن خيّم بداري زارني وقت الأصيلـه هلهلت دلة سنيني " مرحبا بمن هو لفاهـا "وامرحت تسقي همومي من فناجيل ٍ هميلـه سافرت زهرة شبابي بالسلامه يـا عساهـا سافرت معها المشاعر والأحاسيس الجزيله // |
غدر الخناجر
عفا الله عن خطا غدر الخناجر والضلوع ابطال بسامح واتركك تحت الظلام الحالك لحالك دخيلك وفر دموعك ترى هدر الدموع اذلال وترى ما فيه أحد يصبر مثل صبري بغربالك انا عيب علي أنقض كلامي والرجال افعال واذا قلت اقطع احبالك تراني بقطع حبالك عشان اكسب هدب عينك تجرعت العذاب اشكال وليتك ترأف بحالي علشان ارأف بحالك مسوي في حياتي شي ما يذكر ولا ينقال حشا حتى العدو وهو العدو ما يعمل اعمالك تمسيني على الهم وتصبحني على الغربال تقلطني فناجيلك وتقصر عني دلالك تحملت التعب لجلك وانا حملي يهد جبال رحلت من العذاب وما وقفت الا على جالك علامك كل ما جيك متواضع جيتني تختال؟ معاك اليا متي بصبر وصبري معك يحلالك؟ مثل ما اقبلت لعيونك لزوم تلد لي باقبال ومثل ما قد حشمتك حس واحشم قلبي اشوى لك أنا محدن بجابرني أساير معك هالمنوال ترى لاني تبيع لك ولا ني باصغر عيالك أنا جيت اعشقك نبض ومشاعر ما اعشقك (تمثال) أنا جيت اسكنك واحياك وابقى فيك وابقى لك أنا جيت بظما عاشق تعب يطرد سراب اللال أنا جيت استفز رضاك من فرقاك والجا لك أنا ما همت بك عاقل أنا كنت اعشقك بخبال أنا ما كنت احبك حي أنا كنت اعشقك هالك تخيل من كثر ما اخاف تلقى للزعل مدخال أخاف اخطي على طيفك وادوس برجلي ظلالك تبعتك والعرب تتبع رعود البارق الهمال وانا شفت المطر يتبعك في حلك وترحالك كأن اللي خلق حسنك خلقني مع جسدك ظلال وصرت اقرب جسد يمشي معك باقفاك واقبالك أبي قلبك يحس انه فقد بمحبته رجال ملكته من هدب عين وخسرت رضاه باهمالك صحيح ان الفراق اقسى ولكن الوصال محال أنا صعبن علي أرضي غرورك واضعف قبالك بعد ما حققت عيني فبعدك للرقاد امال أعود للسهر؟ -- يا خوي فال الله ولا فالك ببدل نظرتك فيني واجي لك كل يوم بحال بكون اقرب من ثيابك عليك ولا تهيا لك بلمك وانثرك واجمعك وارجع وانثرك باهمال بخونك وازعلك وارضيك وازعل منك وارضى لك أبرسم بالثرى وجهك وابدفن صورتك برمال أبشكي للعرب فرقاك واضحك عند عذالك أبهديك الوصال فراق واهديك الفراق وصال بسوي مثل ما شوفك تسوي وافعل افعالك عشان تعرف من فينا الزعول ومن وسيع البال أبيك تذوق فنجالي وانا بذوق فنجالك نصيحة واحتفظ فيها قصر معك الزمن أو طال أبي تسمع كلامي زين وتحطه على بالك اذا حبك هبال اطفال لك عندي هبال اطفال ولا !! وابشر بعد بهبال حب ٍ ما هو بهبالك واذا قصدك تهين اسمي عشان تشمت العذال ترى لا انته ولا غيرك !ولا عشرة من اشكالك // |
الريم
واعيني اللي كل ماذعـذع مـن الغربـي هبـوب يحلا لهـا لـون الغـروب اللـي يـذوب قبالهـا ويا ويل حالي كل ما يحـلا لهـا لـون الغروب تطـري لـي الريـم اللعـوب وسالفـة ترحالهـا وياجرّ قلبـي كـل مـل تطـري الريـم اللعـوب حرّمت أمد ايدي على حاجة وأنا مـا اقـوى لهـا من سافرت ريم الغلا صدّيت عـن كـل الـدروب ماهـو قصـور بالعـذارى, بـس ذيـك لحالهـا من فارقتني ما خطف قلبي مـن الحـور محبـوب ولا لقيـت الجـادل اللـي تستحـق أحيـا لـهـا لان القلوب إن ما وفت لأحبابهـا ماهـي قلـوب والعشرة اللـي ماتـرد الـروح مـا نسعـى لهـا أما الوفاء الل يستر الرجّـال مـن كـل العيـوب والا الجفاء اللي يستر عيوب العـرب ف رجالهـا مـا أقسـى مــن فــراق أهــل الجـنـوب ويلي على اللي كـل مـا تزعـل تشـد رحالهـا اللي مذيّرها العتب.. لا شبّـت بصـدري شبـوب عيّيـت أراضيهـا وهـي عيّـت تطـول بالـهـا كانت معي مثل النصيب يحدّني مـن كـل صـوب كانت دروبـي مـن متاهـات الضلـل.. لظلالهـا كانت هروبي لا شعـرت إنـي بحاجـة للهـروب كانت سماي اللي ليا ضاقـت علـيّ ألجـا.. لهـا ليه اتحداني وأنـا فـي كـل الأحـوال مغلـوب ؟ ليـه حرمتنـي مـن قهـر عـذالـي وعذالـهـا ليـه اتجاهلنـي وأنـا مانـي جبـان ولا كـذوب ليه ارخصـت دمعـي وأنـا مـا بكيـت إلا لهـا ما ترحم اللي له سنه كنّه علـى النـار محطـوب مـا هزهـا دمـع الفقيـد اللـي بكتـه أطلالهـا ما خافت تهدْم السنين اللي بنتنـا طـوب طـوب ما فكـرت تشفـق علـى حالـي وترحـم حالهـا قولوا لها لـو مـا تـذوب أنـا بخليهـا تـذوب قولوا لها لو ما عنـت لـي مستعـد اعنـا لهـا اليا ادمحت لي هالخطا بدمـح لهـا كـل الذنـوب وإن جابت الحسنة معـي تبشـر بعشـر أمثالهـا افرش لها صدري وطن واجمع من ضلوعي شعوب وارقـى لهـا مكانـة محـد قـدر يرقـى لـهـا إن كانّي مخطي فأنـا مانـي خلـيّ مـن العيـوب الذنـب يغفـر والبشـر تجـزا بقـدر أعمالهـا البعد قاسي والفـراق يضيّـق الصـدر الرحـوب وأنــا تعـبـت أدور الحيـلـه وارد احتالـهـا قولوا لها ترجع ترى ماني على البعـد مغصـوب وإلا تـرى نـذرٍ علـيّ أنـه مهـوب أشوالهـا أمـا تجنّـب هالهبـال وتتـرك البعـد وتـتـوب والا بتبشـر بالهبـال اللـي مـا هـوب هبالهـا كافي زعل ترى الظروف مقفّلة مـن كـل صـوب وأنا حملـت مـن الهمـوم أنواعهـا وأشكالهـا يكفيني أني كل ما هبـت علـى صـدري هبـوب تحـنّ عينـي للجـنـوب وتلتـفـت بلحالـهـا والمشكلة أني كـل مـا حنّـت عيونـي للجنـوب تطـري لـي الريـم اللعـوب وسالفـة ترحالهـا وعز الله إني كل ما تطـري لـي الريـم اللعـوب حرمت أمد ايدي علـى حاجـة مـا أقـوى لهـا // |
يجيني يوم و اعطيهـا
انا ما اخطيت في حقك ولكن الكلام عتاب أعاتب والعتب كلمة تفسرها معانيها اعاتب واحسب بهرجي الا مني حكيت حساب وكلمه يستحي منها لساني يبتدى فيها واذا انت من العتب تزعل علينا وابتصك الباب ترى ما نيب قاصدها ولاني فيك ناويها ولا ودى على الفرقا وقلبي داخلي مرتاب اشوف ان الهوى خدعة واشوف القلب راضيها واشوف ان الهوى فرقا مواليف وعناد احباب واشوف ان الجفا خطوة ولاني قادر اخطيها وقلبي لو عشق يخلص ولو طالت عليه رقاب وتشهد له دروب الحب حاضرها وماضيها عشقنا والهوى حسرة،مشينا ولاأمل كذاب بدينا نانبني منها قليل من بلاويها عرفت الحب من عمري صغير بالغرام وشاب وقلبي للحبيب اكبر من الدنيا وما فيها صحيح انى نويت ابعد ولكن الهوى غلاب وهي رحلة بديت بها ولا ادري كيف بنهيها تحريتك شروق الشمس وشفتك للشروق غياب ولا اضنك تبيع العشره اللي كنت شاريها بقى لي بالهوى نظرة وتغريبة ودمع اهداب وقصة بترك لسانك على العذال يرويها واناجي باقي حروفي وبألف للفراق كتاب قصايد تملي اوراقي ارددها واغنيها واذا مرتني الذكرى وجرحي بالحشا ما طاب بتبعدني وتدنيني وببعدها وابدنيها وانا عيب علي اشكي من الدنيا بدون اسباب مدامي ما خذ منها يجيني يوم واعطيها .. // |
الدنيا بخير
الظلام اليا تبرى من مدرات النهار يبتدي عمره ضرير وينتهي عمره ضرير والعيون اليا عماها حقدها تبقى صغار ماتهادي مستواها غير للعقل الصغير والدروب اللي نهاية وصلها ذاك المسار ماتساوت مع طموحات الفهيم المستنير من يميز في طريق الشر حسن الاختيار من صرخ في كل قلب مظلم بصوت النذير من قدر ياخذ بحق التايه الضايع قرار من دفع عمره لحب الناس لو يبقي فقير من يقيد لكل فزعه للندم همسة شرار من يطفي بالقلوب المدمنة نار السعير من خلقنا ماعهدنا غير حب الافتخار نملك الصبر الكبير ونعشق الدرب العسير همنا نرفع بلدنا مع صفوف الازدهار ونتذكر يوم كان ترابها فرش وحصير وللاسف عشنا وشفنا حرب درب الانحدار حرب تشتيت القلوب وحرب تأنيب الضمير حرب اقسى من حروب النار وحروب الدمار حرب ابشع من نزيف الدم وبالسيف الشطير بالسموم اللي تروج بالكويت بكل دار السموم اللي تردوا من سبايبها كثير والشباب اللي تمادوا في دروب الانتحار اصبحوا فيها رهينة لعنة السم الحقير يستغيثون بعمار النفس من نسف العمار يرتجون وداع ظلما الليل للصبح المنير صرخة المدمن تهيم وترتجي رفع الستار رددت عند الهدف كلمة يصير أو مايصير أشعلت بين الضلوع العوج بعد النور نار وأدمعت كل العيون المشفقة دمع غزير وامتلت كل الحناجر من صدى الصرخة مرار وارتوت كل القلوب الضامية من زمهرير آفة الإدمان زادت وابتدت بالانتشار والوجوب إنا نحدد في تلاحمنا مصير ناخذ اطراف القضية في عيون الاعتبار ونرسم دروب النجاة وخطة الفوز الكبير ونرسم خطانا وتكفي دمعة المدمن شعار ويكفي إنا من ربوع المجد وأخوان الاسير إن نوينا ما بغينا غير حرب وانتصار وان ضمينا ما رضينا غير نروى من غدير إتحدنا قلب واحد للهدب والاختيار والفضل يرجع لربي ثم يرجع للامير وعلموا من يفقد احساس الامل بالانتظار الهدف لازال حي وتوها (الدنيا بخير) // |
عشّاقَه وجمهـوره
انا والليل والعبرة وجرح وخاطر ٍمكسور ونفس من هجير البعد والحرمان مقهورة وقلب ظامي لشوفك ولايروى ظماه بحور وعين تحتري لحظة غياب الطيف وحظوره ونار تنطفي مره ومره تشتعل وتثور واقول النار مقدورة وهي ما هيب مقدورة حسبت الليل بغيابك يمرن الليال دهور وكني شايل بقلبي ليال الوقت وشهوره تصبرت وتقدرت وبنيت من الخيال قصور إلين ان الجفا شد الركايب وانتهى دوره تحريتك على درب القصيد من ثلاث شهور وحشا ما مات لك غصن يشف الماي بجذوره تخيرت الغرام وجيت لا راضي ولا مجبور وجيتي تسبقين خطاك مرضيه ومجبوره وانا ما كان لي رغبه أبين واكشف المستور ولكن الجمال أكبر من الخفاق وشعوره جمال وود وعيون ودلال وكبرياء شعور وفتنة تخذل عيون النهار وينطفي نوره ولك في خافقي صوره تلاشت بين ضي ونور وأخاف اسكت من الفرحة وتنطق باسمك الصورة عرفتك وانتهت رحلة قساوة دربي المهجور والا يا جملة أيام الجفا والصد مشكورة خذتني للجفا عزه واخذني للعناد غرور واخاف اكون بعنادى حبيب ومات بغروره وإذا كانت مسافات الخيانة للغرام قبور وش اللي يجبر العاشق يخون ويحفر قبوره؟ وش اللي يجبر الشاعر يدور للشعر جمهور؟ مدام انتي محبينه وعشاقه وجمهوره // |
ردّ السؤال
انتبهت لدمعها بالهدب والكحل سال لين جفت عينها دمع والقاع ارتوى وابتدت لحضة جفا ونتهت لحضة وصال وأنطفى نور السعادة واحسب انه ضوى ما اكتفيت من الهوى والغرام أربع ليال واقفت أيام التلاقي وجا وقت النوى كنت ابلسى وابتسم والتفت عنها شمال لا قويت الصد عنها ولا قلبي قوى ما هقيت ان الهوى عذب قلوب الرجال لين ضاع القلب مني وتفكيري سوى رحت أدور دفوة الشمس ضيعت الضلال جيت اطفي شعلة النار والقلب انكوى ماهقيت ان السعادة خيال في خيال تروى قلوب الحبايب وقلبي ما روى كنت ابشتال الهوى والهوى ثقل الجبال وان تحملت الجبل ما تحملت الهوى كنت ابسلى بالهوى والهوى صعب المنال ما رضا لي حظي اللي طواني وانطوى قلت لا فراحي تعالي ولا قالت تعال والخفوق ان قلت ابقبل على صدي نوى الله أكبر لا شرقت شمس يتلاها زوال كيف ابفرح في صباح مع الليال استوى؟ لاحصل بالحب قسمة ولا جا لي مجال غير اشوف معاند الجرح وعناد الدوى شبت النيران واقفت وجاء رد السؤال ما تشب النار يا كود يوصلها هوى .. // |
من تحت لي تحت
لو تعرف الخطايا كيف كنت محروم كان سود الليالي يوم طحت سمحت لو هموم المفارق مثل كل الهموم ماتشوفون عيني بالدموع سبحت ولو تحن المشاكل عقب حب الخشوم كان حبيت خشم المشكله واستحت بين صدة عزيز وكبرياء مهزوم عين شحت على وعينٍ استسمحت بس مالله خلقني من بكاي معصوم وادري انه المحاجر لو تفيض افضحت والله اني على جرحي صبور وكتوم لكن ان الدموع ان روحت روحت اعذلتني ظروفي وانهكتني عزوم والوجيه احزنت لي والقلوب افرحت اشهد ان الليالي ماتعرف السلوم قلب جافي لقاه ووجه صافي بحت راهنتني تبلل بالدموع الكموم ويشهد الله عليها راهنت واربحت احرمت نور عيني من غلا ريم قوم بذرةٍ وارتوتني واثمرت واطرحت جادلٍ دوم ماهي مثلها كل يوم استضاحت غموض وبالغموض اوضحت دورت بين قلبي والهدب درب نوم وامرحت وين مدري المهم امرحت تنحت اسمي بقلبٍ جيت فيه معزوم واسمها بين جلدي والعظام انحت مثل جفني لعيني بالنعاس محكوم كل مانمت نامت كل ماصحى صحت ماتعارض كلامي غير عند اللزوم بس لا قمت اسولف واندمجت سرحت دايم ازعل عليها بس قلبي رحوم وهي تموت بعذابي من تحت لي تحت مثل وجه العلاقه في ثياب الخصوم ان تطيبت طابت وان جرحت اجرحت خصها الله بوصفٍ من خيال معدوم لا اذان اسمعتبه ولاعيون المحت كن ربي خلقها من بياض الغيوم ومن كفوف السحابه بالورد القحت عن سواها فرقها بالقمر والنجوم وكل عذرى تباها بالجمال انزحت بالحلا هي كوم وباقي الناس كوم كفتٍ عادلوها بالبشر وارجحت حسبي الله على اللي مابغاها تدوم من بعد كيف كانت شوف كيف اصبحت لاتحقق وصال ولا فراق محتوم خطةٍ قربتني للفشل وانجحت لعنة العشق تبقى مثل ضرب السهوم لو محى الوقت جرحه صورته ما انمحت كيف ابنسى وانا اللي من جفاف لسموم ماحشمت العيون ولا الدموع فلحت كانها بالحميا كل ربعي قروم لو يلدون لاصعاب الظروف صلحت اجزم ان كنت ياقلبي شجاع وجزوم لد لعيون بنتٍ لا التفت الفحت ماتهين البخيل الا يدين الخدوم دام كف الخطايا بالجفا لوحت نطح الباس باس ونطح اللوم لوم وان تهدت تهد وصيح ان صيحت ياتعيش بمعزه ياتموت محشوم ودك ان الليالي لافعلت امدحت عمر ضعف الاراده مايسر الرخوم ضربت السيف لوبيدين الشجاع ذبحت .. // |
الشعراء
مابقى الا سود الايام تحرمك الرقاد كيف الاوهام اتجرأ اتسريك مغبون من متى تجزع من الدمع وتخاف البعاد؟ من متى تقفي بك ظنون وتجيبك ظنون؟ صرت تاخذ كذبتي صدق، ومزاحي وكاد لو بقول اني بخونك تحسب اني بخون ماتعرف ان كل شاعر يهيم بكل واد؟ وانهم دايم يقولون مالا يفعلون؟ ابك انا لاقلت ابنساك وانكرت الوداد والله اني مانسيتك وولاهم يحزنون من جزع من صفعة الشمس يطمع بالبراد ومن فقد وجهاته الخمس يلقى بك ركون اعتبرها هفوة انسان او كبوة جواد لو بتسمح فانت غالي ولو تجرح تمون عد صداتك مروة وطعناتك ضماد خلهن لاراحن طعون ولا ردن طعون خنجرك يستاهل الطعن ومتوني شداد ومنك يازين الخناجر ويا بخت المتون ردلي حنية المزح باحساس الجماد خلنا واحد يجي صلب والثاني حنون موت فيني واندفن فيك بثياب الحداد وان حييت أموت لرضاك واحيا بك بهون مره ارقد بالكفن وانت ترقد بالمهاد ومرة ارقد بالمهد وانت ترقد بالكفون ادري ان شجونك شجون واعنادك عناد والبلا ان عنادك عناد وشجونك شجون ربك اللي سخرك لي تقود وما تقاد والله الخالق ولله في خلقه شؤون ازرع ضلوعي من رضاك وابشر بالحصاد لعنبو من جيت ترضيه وترد امحزون بس تسوالك بلد ؟ قول تسوالك بلاد انت كل العالم بكون ولحالك بكون مابعد محبتك حب ومرادك مراد غير كونك سيد حشاي تدري من تكون ؟ نعمتين اختصوا الخلق من جود الجواد كافل الأرزاق من حيث مالا تعلمون البنون ونعمة المال بعيون العباد زينة الدنيا بلا شك في كل العيون مثل زينة دنيتي بس عندي شي زاد من عرفتك صاروا المال وانت والبنون انتشي بك نشوة التيه لعناق الرشاد وافزع الك فزعة القرم لشهاب الزبون واحصنك تحصين الأرزاق عن درب الفساد واعشقك عشق المظاليم لفراق السجون لو تزيد الشوق جمرة تحولني رماد لو يزيد العشق شعرة بوصل للجنون خل هقواتك كبيرة ونظراتك بعاد كانك انت بكبرك تهون من اللي ما يهون ؟ ازعلك وارهن حياتي تحت رحمة زناد تهبى لا والله الا انت والموت تهبون عاد اذا ما ارضاك هرجي ولا اللي قلت فاد اننا لله وانا اليه راجعون وانت باكر بتعرف على ناس جداد والكلام يجيك من كل شكل وكل لون لاتحسب ان كل كلمة بتسمعها وكاد ولا تصدق هرج شاعر وتخدعك الظنون دايم اعرف كل شاعر يهيم بكل واد وان هم دايم يقولون ما لا يفعلون حتى انا اللي قلت اعشقك وما اطيق البعاد يمكن اطلع ماعشقتك .. ولا هم يحزنون // |
الأوّلي والتالي
جا نهار ما ارحمتني جيته وقدومه شفت فيه الناس واجد واقفين اقبالي كنت احسب انها حقيقة والعرب ملمومه وقمت افضفض عن همومي واشتكي غربالي ويوم زال الحزن عني وانجلا بغيومه واثرني ما غير اسولف بالخلا بلحالي من عذابي قمت اعزي قصة مرحومة ولعت بيدين خلي وانطفت بهمالي قصةٍ لدت عيون صويحبي من نومه يوم شلت الموت بيدي وابتلوا عذالي ما رضيت اكسر غلاي وما قدرت ارومه وعاذلي ما صد عني وما قوى منزالي إبتليته لين جتني خنجر مسمومة وابتلاني لين جاب الاولى والتالي والله انه ما عذلني لين شق هدومه ولين خانتني عزومي وانكسر تمثالي والا انا ما كنت ابين لا أمطرت ديمومة بالمدامع من فراق المخلصين امثالي كنت اوقف واتذكر نفخة اليشمومة واذكر اني كنت غالي في عيون الغالي واحد كانت نسايم سيرته بسمومه وكان كل ما شاف ظلمي بالهوى يلجالي ذاك والله كل ما أرسل في حشاي سهومه انتهى ليل السكينة وأبتدا زالزالي ووالله اني كل ما اسمع سيرته وعلومه قمت اشوف الموت الاحمر واقف بظلالي واشهد اني كل ما اسهى وافتكر برسومه وما وعيت الا وانا ارمي غترتي وعقالي ليت ربي يحتميه ويحرسه ويدومه يومه اقرب من عروقي للجسد بوصالي وليتني لما عرفته ما عرفت خصومه وما وقعت بظلم ناس ماوراهم والي العذول اللي حرمني حاجة مقسومة ليه يحرمني قهوتي(والدلال دلالي)؟ وليه يسأل في غرامي وان بغيت اسومه؟ دام صار الجيب جيبي والريال اريالي والله ان العشق شي يستحق القومة واشهد ان عيون خلي تستحق افعالي يكفي انه لا نظرلي نظرة محشومة يرتجف كفي ويوقع من يدي فنجالي وان لمحت بطرف عينه دمعة مكتومة جيت كلي من عذابي عالي متعالي وان تبوسم لي بعينه والشفا مضمومة والله ان مدري وش اللي بعدها يجرالي ليت يومي قبل يومه أو معاه بيومه وليت حاله غير حالي دام هذا حالي إن غفيت الليل جتني بالمنام حلومه وان صحيت الصبح ناسي سيرته يطرالي والله ليبطي وعيني تسهره وتقومه والله ليبطي عذولي ما يفك حبالي دامني لا زلت احبه واعشقه بهمومه بذكره مع كل خطوة حللت ترحالي بذكره مع كل ليلة مظلمة مشؤومة نزلتني في حشاه ورفعت منزالي وبذكره مع كل دمعة نوخت بكمومه وعلمتني بان قدري في غرامه عالي وبذكره مع كل نظره بائسة مظلومة حسستني بانه اخر من نوى يصفالي وبذكره كا ما نسيته وان ذكرت سلومه قمت اشوف الناس واجد واقفين قبالي وان حسبت انها حقيقه والعرب ملمومة ما تحكمت بسكوتي لين طال جدالي ويوم زال الحزن عني وانجلا بغيومه واثرني لا زلت اسولف بالخلا بالحالي // |
أدلّعها وأولعهـا
بعد ماقابلتني عاتبوها على شوف الحبايب حاسبوها خذوها وأبعدوها غصب عني وعن وجهة طريقي جنّبوها وشالوها عن عيوني غصيبه عواذل وأغصبوني وأغصبوها خذوها من يديني شوف عيني وعن عيني تعدّوا وأحجبوها كلام وصدّقوا بالبنت كذبه وهم اللي من أول كذّبوها وهم وشدخلهم في مال بيّن لبوها والخلايق طالبوها وفيّه لاتخون ولاتعاند جسوره والمواعيد أرعبوها ملاكٍ كامله والكامل الله ولكن العواذل عذربوها وهي كلما دعتني تشتكي لي عن اللي سالفتنا سرّبوها تخاف وتلتفت مع كل كلمه تظن أن العواذل راقبوها تلفّت من عقب ماهي جريئه شجاعه ماتهاب وهيّبوها وأهدّيها وأنا حاير وثاير مصيبه ياعذابٍ عذبوها وهم كلما خذوها عن طريقي تراهم صوب قلبي قرّبوها وأنا ماتعّبت قلبي خيانه خيانه رتّبوها وأحسبوها ولا يعجز خفوقي لايقابل جفا من حاربوه وحاربوها وأنا لي عزّة ٍ تفرض عليّه أخاطب بالجفا من خاطبوها وأكسر لوحة الماضي وأزيله وأخرّبها مثل ماخرّبوها وأذوّقهم ندم ماصار فيها وأشرّبهم من اللي شرّبوها وأدلّعها وأولّعها بنفسي وأشرٌّقها بعد ماغرّبوها وأعوّضها عن اللي راح كله وعن ذيك الليالي كلّبوها غلاها بالحشى لازال ثابت ولو حتى بغيري حبّبوها وغلاي بقلبها مرّ وتعدى غلاها لأمها ولا لأبوها // |
الدعاء المستجاب
اشرق نهار ابوظبي واكتأبت بلاد الضباب وابتلت ارياق الدعا شكر ونحيب ومعمعه صحيح ما رد القضاء الا الدعاء المستجاب ولا تهز المسلمين الا الظروف المفزعه الله خلق للضيق باب وللفرج مليون باب ينزل بلاه اليا اشاء ولو اشاء بيرفعه ما يكتب لمؤمن ضرر الا وله اجر وثواب ياشيخ ربك ما يضر المؤمن الا ينفعه البارحه كشّر علي من الوله مليون ناب واختر للدرب الشراع اللي هبوبك تدفعه ولا دريت اني سريتك لين شدّدت الركاب من الكويت ولا حللت الا على رحب وسعه من لا حزم امتعه ولا اتنقالي ثياب فزيت لا ماخذ ثياب ولا ذكرت الامتعه دام الطريق لهامتك لوهو ذهاب بلا اياب لأجل افرح بسلامتك ماقطع طريقك وارجعه ياشيخ لو ان البكى يشفي من العلّه مصاب ما ظل واحد بالجزيره ما تفجر مدمعه من لا جزع من غيبتك ما عاد يجزع من غباب ومن لا تزعزع من مصابك ماحدٍ بزعزعه ان طحت طحنا كلنا وان طبت كل الشعب طاب نفس المصير اللي جرعته كلبونا نجرعه اللي يقاسمنا الضما بنقاسمه طرد السراب واللي يحس بجوعنا لامن شبعنا ِنشبعه الله خلقنا للظروف المفزعه خوّة ذياب ولا تبان الخوّة إلا بالظروف المفزعه لو يحصل (لزايد) مصاب نشاركه نفس المصاب ما نتركه يدفع ثمن إلا نتسابق ندفعه نغضب مدام انه غضب . ننهاب مادامه مهاب نضر من ضره ونخدع من يحاول يخدعه لأنه قريب لفرحنا نبقى لأحاسيسه قراب امّا سكن بضلوعنا وإلا سكنّا بأضلعه نحضر معاه اليا حضر ونغيب له مادام غاب وإن قام قمنا كلنا وإن فز فزينا معه إن ما اكتأبنا من غيابك.من يعرف الاكتآب واذا الخليجي ما سمع صوتك اجل من يسمعه؟ ما شاب حبّك للعمل وانت بسواعدنا شباب ياشيخ ماتفقد امل طاع الزمن وإلا طعه خذنا رقابٍ من ذهب وإضرب ولا تحسب حساب نفداك رد اللي ترده واقطع اللي تقطعه وشلون يركبنا الخطى وبطاعتك عين الصواب ؟ كيف يتعداك العطى وانت إنخلقت بمنبعه مخاطبك يا سيّدي ماهو بحيالله خطاب ومثلي مهو بكل القصيد اللي بمدحك يقنعه ماجيك وجه لوجه مابيني ولا بينك حجاب إلا اجمع الك اللي يعجز الجن الازرق يجمعه ماحب أوصّفك بشطر من غير ما اشقّق كتاب ياشيخ انا ما ابدعت شي.اوصافك انت المبدعه شوف الرجال وشوف نفسك.ويش جاب لويش جاب؟ هو فيه احد بالكون كله يصنع اللي تصنعه؟ شف وانت واحد بالبلد واسمك يعيش بكل شاب وشلون اجل لوفيه مثلك بالامارات اربعه؟ لو ما انخلقت انسان.لايمكن تكون إلا سحاب لأنك رفيع ولي عطيت الخير ما تسترجعه يا ذخر لصعاب الحلول وفخر بحلول الصعاب يامرجع شموخ المراجل يالشموخ بمرجعه يادرع حكام العرب يا شوق تلعات الرقاب يانافع الناس بزمانٍ قلّت إبه المنفعه سلامتك كثر البكا اللي ينزف بدعوة مجاب وسلامتك كثر الدعا اللي رحمة الله ترفعه وسلامتك كثر الغلا وكثر الملا وكثر العتاب وكثر الزهر وكثرالمطر وكثر الشجر وكثر أفرعه وكثر اللي ما بعده عدد.ولا يوصّل له حساب وكثر اللي ما اعرفه ولا اسمع فيه.ولا راح اسمعه سلامتك منّيه الى آخر شبر فوق التراب سلامتك منّك الى غرب الوجود لمطلعه من يوم نوّرت الوطن وأكتأبت بلاد الضباب ماجفّت حلوق الدعا شكر ونحيب ومعمعه صحيح ما رد القضاء إلا الدعاء المستجاب ولا تهز المسلمين إلا الظروف المفزعه // |
قالها حامد
تماديتي وأنا مثلك تماديت بهجر وبعاد وكلٍ مثّل عناده خفوقٍ ثابتٍ صامد وإذا عندك بعادي عيد ترى عندي جفاك أعياد وعسى طول الجفا مني يليّن قلبك الجامد أبضحك وأظهر البسمة ولو إن الجروح اجداد وترى قلب الحريقة ضو ولو وجه الحطب رامد بكون أكبر من الغلطة وبعلن للهوا ميلاد إذا كان الخطا منك مجرّد ثورة الخامد وإذا كان الجفا منّك مسافات وغلا وعناد تراي أكبر من عنادك وقولي قالها " حامد " // |
رسالة رثاء
جيت اخاطب صرح واحكي من مناره جيت اجدد جرح حزني واستثيره جيت اقاسم دين الاسلام المراره جيت اجرد حزن امه من جفيره جيت اصفق للتواريخ بحرارة جيت اوثق ذكريات الالف سيره عن صروح وعن طموح وعن ادارة عن قيادة عن ارادة عن بصيره عن وجود الحب عن صدق الطهارة عن حنان الاب وعن رحلة سفيره عن منارة كل بيت وكل حاره عن خسارة كل دار وكل ديرة عن رجل يصعب على الشعر اختصاره عن زعيم قل من تنجب نظيره لأنه اول من ثبت حبه لداره ولأنه اكثر من غمر هالارض خيره ولأنه اقدم حب يجمعنا شعاره ولأن دنيًا ما بها زايد مريره كل دمعٍ ما يساق له بغزارة والله انه ما يساق لموت غيره من رحل سبع الجزيرة عن دياره ضاقت الارض بعرب شبه الجزيرة يا ذراعٍ رد للطهر اعتباره يا رسالة رحلة الخير وبشيره يا سبب مجد الإمارات وعماره يا ذرا كل الشعوب المستجيرة يا صدارة ما بعدها من صدارة يا مسيرة ما تعدتها مسيرة غيبتك ضيعة وفقدانك خسارة والقلوب بلا جناحينك كسيرة الوطن يبكيك ليله مع نهاره والبشر تنعى جمايلك الغزيرة يكفي انك كنت للأمة بشارة يكفي انك سيد الحلم واميره يكفي انك واحد لسابع اماره يكفي انك ديره بمليون ديره من حدودك بدل العالم مساره من رعودك بلل التاريخ بيره من سجودك اثبت الدين انتصاره بعد جودك صابت الحكام غيره يا ملاذ لكل من لاذ بفراره يا مجير لكل من جوره يجيره يا مرسخ كلمة العدل بجدارة يا ميسرها وهي قبلك عسيره يا حضارة في زمن ما به حضاره يا ضمير لعالمٍ ميت ضميره من يعوض الخير عن غيبة وقاره من يلوم العرض في راعي الستيره من يطفي في ضلوع الشعر ناره من يشتت عن عقول الناس حيره عشت مثل الحب لا يمكن دماره كنت مثل المزن غيره تحت خيره كنت مثل الطيب نفرح بانتشاره كنت بالنسبة لنا حاجة كبيرة انت نورٍ ترفض الأرض اندثاره انت غيثٍ يروي الدنيا غديره انت جارٍ يفزع ليا ضاق جاره انت سيره مثلها ما فيه سيره انت غاية انت رايه انت شاره انت خوّه انت قوّه انت جيره انت كل المدح ما ينقص عبارة انت كل المجد ما تبقى مسيره باختصار انت الذي صعب اختصاره انت تاريخك من أولته لأخيره جيت أقاسم حزن شعبك وانهياره جيت أبستفزع قصيدي واستثيره جيت لك ببكي على القبر بغزارة جيت أجرد سيف حزني من جفيره شاعرٍ يكسب من وقارك وقاره ويعتبر مصير شعبك من مصيره من قناعة حب شعبك وافتخاره افتخاره عن قناعاتٍ كثيرة انك اول من ثبت حبه لداره وانك اكثر من غمر هالأرض خيره وانك اول حب عاشته الاماره وموتك اكبر حزن عاشته الجزيره // |
مفارق الفرسان
سلها سيف القدر والقرم حول عن حصانه عظم الله أجر كل الأوفياء المخلصين من رحل نبض القلوب اللي غمر شعبه حنانه ما بقى للناس نبض ولا قلوب ولا حنين عيب ما احزن والوطن يدفن جسد من عز شانه عيب ما احزن والحزن لمفارق الفرسان دين كيف ما نحزن لسيف(ن) عز دين الله وصانه كيف ما نحزن لدرع(ن) من دروع المسلمين كاننا ما نحزن لجابر من بنحزن عشانه العيون لو ما بكت لمفارقك تبكي لمين إن رحل حاكم يجي مليون حاكم في مكانه بس جابر اليا رحل يرجع لنا جابر منين يا منجي عزة الشعب الكويتي من هوانه يا مسجي فطرتك في نهج خير المرسلين كل دمعه كفنتك وما بكت بعدك جبانه كل عين(ن) ما شكت من غيبتك ما هي بعين كان لك في كل درب احباب واصحاب وميانه وكل لك في كل بيت انفاس واحساس وضنين كنت صبح(ن) ما تعلمنا الفلاح الا عشانه كنت صرح(ن) ما تزعزعك الرياح وما تلين بانتصارك زادت امجاد العرب قدر ومكانه من ديارك فاض خيرك للمخاليق اجمعين مع قرارك ادرك التاريخ من يطلق عنانه عقب نارك ولعت نار القهر بالطيبين إسألوا دمع اليتامى عن محبته وحنانه إسألوا التاريخ قبله كان وين وصار وين إسألوا مجد الوطن عن عهد من وحّد كيانه إسألوا حزن البشر عن قصة الخير الدفين إسألوا عن طيبته.. عن هيبته.. عن عنفوانه إسألوا عن فزعته في نصرة المستضعفين كيف حاكم يسكن الدنيا ويعمل للديانه يثبت إنّا خير أمه اخرجت للعالمين وش تكون الحكمه إن ما جات من منطق لسانه من هم الزهاد كانه ما هو من الزاهدين وش يكون الاتزان بجنب عقله واتزانه ويش هو الدين لو هذا الوَرَع ما هوب دين لا الوطن كأنه وطن ولا جنانه هي جنانه كل شي بالبلد يا شيخ مكسور وحزين شعبك اللي عاش فيك وعشت له بأمنه وأمانه النهار اللي جمع من وجهك الطاهر جبين الرحيق اللي زرعته في كفوف الزعفرانه والغرام اللي تركته في ضمايرنا سجين والسماحه.. والمروه.. والحميه.. والفطانه والكرامه والكرم واهل الوفا والمحسنين باب قصرك.. مسجدك.. منبره مأذنته.. أذانه المصلين.. الصلاة.. المؤمنات.. المؤمنين كلهم من يوم ذاك القرم حول عن حصانه والدموع تهلهم في كل وقت وكل حين لي متى.. لين الشعوب تعرف فضله وامتنانه لي متى.. لين السنين تروح من دون السنين لي متى.. حتى نحس ان الفرح مثل الخيانه لي متى.. حتى نزين حزن عمره ما يزين لين ندفع بالمدامع حزن لا يمكن دفانه لين نغسل بالجروح آلام كل المسلمين لين نثبت كيف كان بحبنا سيد زمانه وكيف لما مات جابر مات مرفوع الجبين كاننا ما نحزن لجابر من بنحزن عشانه العيون ان ما بكت لمفارقك تبكي لمين الزعيم ليا رحل نلقى زعيم(ن) في مكانه المصيبة ليا رحل جابر.. يجي جابر منين // |
فراق الأكابر
الله يعين العقل ويثبت الدين في حزن لا منسي ولا هو بعابر بصدورنا كأنه طعون السكاكين وفعيوننا مثل الكفن والمقابر حنا حزنا لشيوخ البعيدين واشلون ما نحزن على الشيخ جابر يا اكبر غلا تدمع على شانه العين يا اعز من ناحة عليه المنابر يا متعب بعطفك شموخ السلاطين ومثبت بزهدك سمو المخابر يا من خلقه الله وطن للمساكين يا اصدق قصيد سيلته المحابر رحت وتركت محبتك عندنا دين علمتنا معنى فراق الاكابر يا سيدي نلقى مثل طيبتك وين وانت اللذي تكبر وغيرك يكابر ان غاب جابرنا يجي جابر منين واحنا ملاهيفك مثل ما انت خابر حنا يبكينا فراق البعيدين واشلون ما نبكي على موت جابر // |
أول الغيث
بسم الله اكبر واول الغيث فرسان جادت غيومه وانبنى السور من طين كن الثرى ينبت مباني وجدران وكن السمى تمطر شيوخ وسلاطين نوِِ سكبه الله على قصر دسمان وامطرت ياغيث الضعاف المساكين ياشيخ جابر ياسلايل كحيلان انشهد ان اللي سواتك قليلين اقولها كلمه ولانيب ندمان لاعودت يم الرجال الميامين سافرت بلدان وتعديت بلدان ومروا على عيني نشاما كثيرين على كثر ماشفت بالناس شجعان ماشفت مثل الشيخ جابر لي هالحين الله جمع طيبة هل الارض بإنسان قرمٍ فطره الله على العقل والدين سلطان كنه مهو بأي سلطان واحد ويسوى في نظرنا ملايين ياشيخ طيبك يرهق عقول واذهان نظرة طموحك تتعب العقل والعين مدة يدينك طالت الانس والجان واعمال خيرك شيبت بالشياطين من شبه اسياد العرب فيك غلطان انت الوحيد اللي قلبت الموازين والله لو امدح طيبة فلان وفلان فزعتك وين.وفزعة ربيعهم وين الفرق واضح والرجاجيل شتان والناس صارت تعرف الزين والشين لو عند حكام العرب كثرك ايمان ماكان ضاعت من يدينا فلسطين يادرعنا اللي ما تزعزع ولا لان ياسيف عدل سله الوقت لسنين يافزعة المبلي ليا جاك منهان ياشوق تلعات الرقاب المزايين من لا نظر في وجهك السمح مازان ومن لا دعالك ماعرف قيمتك زين ومن لا تشرف بالحكي معك خسران ومن لا وصلك وقبل ايديك مسكين لولاك ما كنا ولا مجدنا كان ومن غير عدلك ماتدوم القوانين المدح في غيرك من الناس نقصان والخير منغيرك مثل مدة الدين ياكويت تفداك الخرايط والاوطان وتهون لمجادك تواريخ وسنيسن وترخص على شانك توابيت واكفان ويحلى على رملك نزيف الشرايين ياكويت حنا للشدايد والاحزان جينا عشان نموت وانتي تعيشين كرامتك تبقى وتحفظ وتنصان وان ضاعت نفوس العرب ماتضيعين الله خلقنا للعداوات عدوان وصدورنا تبرى بطعن السكاكين ولو ضرب حسادك يزعزع بالابدان حنا بضربه نقسم الجمع نصين وان كانهم وسط الميادين قشران حنا القشر فينا بليا ميادين واذا الحميا فيهم حمية اخوان حنا حميتنا حمية مجانين للهرج ميدان وللافعال ميدان وللمجد درب وللشهامه عناوين وللفخر ناس وللتواريخ بيبان وللموت سوق وللتجارب عناوين يابو مبارك والله انك كحيلان وانشهد ان اللي سواتك قليلين مرت علي الطيبه اشكال والوان وقابلت حكام وملوك وسلاطين على كثر ماشفت حكام شجعان ماشفت مثل الشيخ جابر لي هالحين // |
خطاك السو
لأن الدمع ما يسخي عطاه إلا على الأحباب ترى ما للهدب دمع صدوق إلا مع أحبابه ومدام أن الدموع أصدق تعابير الحزن بأهداب حرام أن الدموع تجف طليلة فترة غيابه هذاك اللي شعل شمعة ضوت كل الدروب وذاب فقد رمل الوطن دوسة قدمه وعطر ترحابه فقده من الثرى ضيق وتراحيب وسهل وهضاب فقده من الوطن حتى عذوبة ماه واعشابه يغيبه المرض عنا وكنه بيننا ما غاب بعيد وشعبه الوافي عليه أقرب من ثيابه سكن باهدابنا حتى يلامس رعشة الأعصاب فرش بدروبنا قلبه ولف الشعب بأهدابه تضيق ابنا الدروب ونرتجي في وجهه الترحاب حشا كن الشوارع ماتمر إلا على بابه من أول ما حكم وأسس ومسس للثبات أطناب سجد قلبه على ملة رسول الله وكتابه غرس فينا الوفا نبته مثل ماتنبت الأعشاب وقال إن الثرى له حق نشقى له ونشقى به وطن ما به وطن غيره....ولا غير التراب تراب مادام الله خلق دون البلاد سباع وذيابه عرفت أنه يهاب أنه يهاب وما يعرف يهاب يحفظ الدار يوم الجار ثار وكشر انيابه وقف للعالم بأسره وقوف الفاقد الطلاب خطب خطبة شجاع وفزز التأييد بخطابه عتق دمعة فرح تلبس لميعاد الرجوع ثياب حشا كن الدموع تعرف علم الغيب واسبابه خطاك السو وعيون الحسود وهرجة الكذاب وتعدتك المنايا يا ظلال الشعب وحجابه فبعدك يا طويل العمر يبقون القراب أغراب وترى يا شيخ ما كل القلوب البيض تتشابه يقولون الغلا واحد وأنا قايل: شجاب لجاب؟ هذاك الشيخ جابر غير..ذاك الشيخه أولى به هذاك اللي فقد لذة منامه لأصغر الأسباب هذاك يموت ما خيب هقاوي من تهقوا به هذاك إن لد للعذرا تغطرف له ولع وإعجاب هذاك اللي أسر عشق القلوب بطرف سبابه هذاك اللي من أفعاله عجز في مثله الا نجاب كأن الله منع بعده يجي شخص يتحلى به هو اللي شتت جموع الضياع وولف الأحزاب هو اللي جفف دموع اليتيم ويتم صوابه هو أول من حما شعبه من طعون الزمن وأ نصاب هو اول من نذر نفسه يرد الحق لاصحابه كأن الله خلق بينه وبين المستحيل أحجاب فلا يعرف محال إلا يكون أسهل من صعابه أبو مبارك تطامن له خشوم وتفتديه رقاب عريب إن ما زها بالمجد كان المجد يزهابه ودام الله خلق فينا جماعات وأمم وأنساب أبي هو بالجود انساب خلق أكرم من أنسابه؟ تحلى بالصبر يا شعب......لا تحزن ولا ترتاب ترى شعب الكويت أكبر من ان الشك ينتابه وعساكم أن تحبوا شيء كرها يا ألو الألباب وعسى أن تكرهوا شيء وهو خير لطلابه نبي نصبر على كربه ولو أن الصبر غلاب عزانا للبلاد أنه بيحيا له ويحيا به ومثل ما قد سجد بأرضه لوجه الباري التواب بعون الله بيرجع له وبيسجد على ترابه وتطير من الفرح بسم السلام من الحمام أسراب بعدها تكتمل فرحة رجوع الشيخ الأحبابه وعسى رب السما يفتح لدعوات القلوب أبواب وتكون أصدق دعاوى شعبه ملباه ومجابه ولأن الدمع ما يسخي عطاه إلا على الأحباب حرام أن الدموع تجف طليلة فترة غيابه // |
الأسرى
دار الزمان وجت ازمان وازمان ساعه بعد ساعه وحين بعد حين عشنا الحياه افراح وجراح واحزان حتى نهايت عام تسعه وتسعين كل تحرى عام الالفين شفقان متلهف للقرن واحد وعشرين يمكن تعبنا ظلم وهموم واشجان ويمكن قلبنا بالظروف الموازين صرنا انتناسى همنا قدر الامكان نسعى ورا جمع الذهب والملايين نستقبل الغلطة من كفوف غلطان ونتاجر بدمعه قلوب الضعيفين ماهمنا غير الدعاية والاعلان ماكننا شفنا القهر شوف بالعين ماكننا نفقد من الشعب شجعان وانا لنا اسرى في سجون الحقيرين ساعه وقفنا للخديعه بالايمان واستضعفونا من بعدها كثيرين عشرة سنين وانقضت دون نقصان من ليلة الغزو العراقي لي هالحين وحنا وقف شعارنا تحت عنوان متى على الله يطلقون المساجين ضاع العمر والناس رابح وخسران وضاع الامل ما بين باكر وبعدين عشنا نقص لسان ونجامل لسان نضحك وتطعنا ثمانين سكين ونضيع حقوق العروبة بنكرران مابين عقال العرب والمجانين وان كانت الجيرة تجافي وتنهان ملعون ابو جيرة بيوت الحقودين للظلم ميدان وللعدل ميدان وللحق ناس وللعروبة قوانين وصدام عاش العمر مذنب وخوان ومعاهداته مع وجيه كريهين لايعرف اخلاق ولا يعرف احسان وما مسح كفوفه على راس مسكين ساق التعالي للتواضيع بحقران من دمر ايدينه بدم البريين إستعبد شعوبه على نهج علمان من يفصل الدولة عن الشرع والدين شيطان لا ماينوصف وصف شيطان ماكنه إلا من عباد الشياطين وما سادت الغلطة على كل الاحيان مادام لظروف المواقف براهين وان كانت الدعوه حكومات واوطان حنا لنا حكم من اسنين وسنين لنا شيوخ تعقل الانس والجان ماهي علوم المقبلين والمقفين للحق طلابة وللشرك عدوان وللجود جود وللعطا مستعدين وللصد صد وللوصل حبل شريان وللخير درب وللمكارم كريمين وللسلم حلاله وبالحرب فرسان وللضيم درع وللزعامه سلاطين يا أم الاسير استبشري بالعرب كان باقي على عرش العروبة عريبين مثلك نذوق الحزن بأشكال الوان وصرنا نعاني مثل ما انتي تعانين ومادام قالو لامس الجرح وجدان لازم يجي يوم وتتفجر براكين يا أم الاسير الناس للناس خلان وقت الشدايد كلبونا قريبين حنا عيالك كلبونا له اخوان واكثر من اخوان قراب عزيزين لاتفقدين ادنى امل لجل حرمان وان قالها الله ابيرد وتشوفين وتجين ولهانه اذا جاك ولهان ساعة تضمينه بصدرك وتبكين ويقولك يمه اذا قلتي فلان وتصير فرحة في جميع الميادين بحق من نزل من المزن هتان قولي معاي آمين وآمين وآمين هذيك والله فرحة انسان بنسان ماهي بفرحة قرن واحد وعشرين // |
نار و بارود
حنا اليامنا وعدنا وفينا واليا عطينا نعرف الجود ونجود وما نذبح البسمه ليا من حكينا وما نفرض الغلطة على البيض والسود من طبعنا لا من عطينا عطينا جود من الموجود والجود موجود بعنا المذلة للضعيف وشرينا عزة نفوس وجد واخلاص وعهود نضرب خطانا بالعصا لاخطينا حتى ولوكان الخطا غير مقصود ومانزعل اصحاب الجمايل علينا هذا وحنا نجزي الجود بالجود يكبر غضبنا لاتعزوي حدينا نرضيه لو نبذل على ارضاه مجهود واليا انتخن المترفات اعتزينا نفزع ولا نرضى على البنت منقود نزعل ونغضب وان زعلنا نوينا كن الهدب والعين نار وبارود نرضى نموت ومدنا في يدينا ولانعيش بمجد ضايع ومفقود نعم خضعنا روسنا وانحنينا لله ولا غيره مع الناس معبود مثل الغصون اليا انثنت انثنينا وقلوبنا خشاع ركاع وسجود نتبع ونأمن وبالرسل واقتدينا بمحمد وعيسى وموسى وداود خفنا من اسباب الضياع ان قرينا باهل الجحيم وقصة اصحاب الاخدود نمشي على كف التراب وروينا من قلب مزن مرعد يرعد ارعود يكفي فخرنا بأصلنا لا انتخينا حنا عرب من واقع جدود لجدود ماقد تعلمنا الخطا واعتدينا ولا قف في صفنا شخص مضهود الصبر فينا مبتلي وابتلينا نصبر ولا نرجي من الوقت مردود لو يشكي منا التعب ماشكينا ولا تخلفنا ولا نخلف وعود حنا ليا منا وعدنا وفينا واليا نوينا قد الافعال وقدود غير القلوب الخاشعة مارجينا والدمعه اللي تجرح اوجان وخدود لا الكره قايدنا ولا الحقد فينا ماحنا من اللي يجزي الطيب بجحود هذي عوايد طبعنا واكتفينا الله خلقنا ازهود ونفني له ازهود اقولها والله وكيل علينا بسم العلم لاصار عالي ومرصود اقولها اقولها وانتهينا حنا الكويت قيادة وشعب وجنود // |
الملحمه الوطنيه
الله اكبر والخطا المقصود ما يدمح بتوبه والمشاكل دوم تاقف للبنادم عند بابه والبنادم تحت رحمة واحد يغفر ذنوبه والبشر كل بقدر عبادته يلقى ثوابه ما خلقنا الله نعيشك يالزمن عيشه كذوبه ولا خلقنا لليدين الخاينه ننهب نهابه انظلمنا في نهار عيبنا نجهل غيوبه والرجل لو انه آمن ما يصدق ما جرابه ما حصل بثنين اغسطس من شروقه لي غروبه يوم يبقى للعروبه جرح ما يبرى صوابه الخطا اللي ما تغفره بالحساب اكبر عقوبه ما سعينا في لقاه ولا سلمنا من عذابه ابتلينا والقدر غلاب والنفس امغلوبه في سفيه ما يعرف من العمار الا خرابه ارتدى ثوب الجهاد وقاد للظلما شعوبه يوم عجل في لقانا عجل الله في ذهابه بالردى خرب بلاده فوق ما هيب امخروبه زود صدور الخلايق مع كآبتها كآبه مجرم من خيبته يحصد نجاحه في رسوبه كن ما بالحقد درب للقلوب الا مشابه ادعى فرض الحموة والمروة في حروبه يحسب ان الناس تخشي زمرته والظن خابه من يقول ان الشجاعة فالرجل تمحي عيوبه والله ان الغدر ما زاد الشجاع الاعيابه الجهل بالحرب يحني هامة المذلول صوبه مثل ما يحني سبيب الصاهله قوس الربابة والبلاد اللي تبات وتصبح الصبح امحروبه ماتبنت فعل كاذب لجل تتحمل عقابه ديرة ولها سيادة شعب ما هيب امغصوبه تحتمل غلطه سفاهة حكم من حضرة جنابه الوطن دونه رجال للعدا صارت عقوبه ما تعرف من التفادي والخطر كود إرتكابه كا من حاول لقاهم ما اتقاهم عزروبه وان تلاهم وابتلاهم يسحبونه من ثيابه دمنا لا خضب تراب الوطن زاده خصوبه ودمعنا لا لامس القاع الوجل طهر ترابه وطبعنا لا ثارت الهيجا وشق السلم ثوبه من نصانا مرحبا به مرحبا به مرحبا به اجتمعنا والبحر قدام وايقنا ركوبه والليالي ما تثمن طعنة الرجل وصوابه وقتها ما نعرف امن الامتحان الا وثوبه نبتلا وضلوع شجعان العرب تحطب حطابه اتجهنا للكويت ولا عرضنا عن دروبه والعمر عيا يساوي عندنا جنح الذيابه اتحدنا للعمار جيوش لجيوش امعقوبه وانطلقنا من ربوع المملكة عز ومهابه ما ذخر عنا زعيم المملكة لو ربع طوبه بيض الله وجه ابو فيصل ولا فيها غرابه عادة الرجل الخليجي لا انظلم شبت شبوبه والتكاتف ما يزيد المسلمين الا قرابه تذكرون بيوم تحرير الوطن من من سطوبه كيف يمطرن الهمايل والوطن تروي هضابه دوبه يغسل القبور الطهر من الدم دوبه دمع عينين الكويت اللي تحدر من سحابه لا تكف الدمع عينك كل ما زود صبوبه البكا ما زاد حسنك بالعيون الا ذرابه يالقلوب الممحلة لا رحم ابو منتي قلوبه يا عداة المسلمين ولعنة الدين وكتابه يا لكلاب اللي تنابح بالشهر عشرين نوبه واقلعوا عنا غثاكم لعنبوا منتم كلابه الكويت... ولا بدال بلاد اخو مريم رحوبه من بعد ما صار مالا يحسب المسلم حسابه جنة الله في ثرانا صاغها الخالق عجوبه فتنة عيون البنادم كل ما طول غيابه درة البحر الخليجي من شماله لي جنوبه شجرة تكبر ويكبر ظلها عطف ورحابه وش يغيض الا هنوف تنذبح يوم الخطوبه ردها عقب الله..اللي لا انتهض للحق جابه جابر ولا غير جابر حاكم شعبه رضوبه الزعيم اللي يهاب الموت منه ولا يهابه قايد لنهضة ثبات الشعب نبراس العروبه جامع حكمه شداد الرأي واعراف الصحابه عقله اركد من ثبات طويق واخطاه امحسوبه كن نصف العقل ثقل ونصفه الثاني لبابه دامه الله قايد محبوب ف...بلاد امحبوبه وعزه الله عزوة للشعب من يوم اعتزابه والرواسي ما تهاب الريح لا هبت هبوبه والمزايا عند حكام البلد جات اتشابه يا سعد... يا سعد من خلاك حكمه تنوبه خصك الله ياطويل العمر في حسن الانابه انت ما تفخر بنسبك للكرام وانته جيوبه الكرم نفسه هو اللي يفتخر بك بانتسابه يا ولي العهد يا زبن الرجال اليا انتخوبه يا ذراع الشيخ جابر بالسلام وبالحرابه شعبكم رهن الاشاره سمع وعيون إمعصوبه كلنا يوم الملاقي لا به من دون لا به والولا لإخوان مريم بالفدا يفرض وجوبه مثل ما تفرض زكاة المال لا كمل نصابه ويالكويت الله يديمك طول الايام مهيوبه ويا عساها من شفاهي للسما دعوة مجابه قلتها والشعر كني تارك دوبي ودوبه يحرث قلوب الخلايق وازرع بذور الكتابه شاعر مالد شوفه للقريب وقال توبه التفت لا قصى طموحه وانطلق باول شبابه كلمة من وقت قيلت وامست سنين امحجوبه جيت ابنطقها عن لسان الخلايق بالنيابه بالعرب سبة ضياع العالم النامي شعوبه والتكاتف ما يزيد المسلمين الا قرابه // |
لا قبلك ولا بعدك سعد
أمسحوا دمعات الأعيان وارموا بالورود وأزرعوا بسمات الاشواق بأطفال المهد وأبشروا واستبشروا واستمروا بالصعود وابتدوا مرة جديدة على نفس العهد واستعدوا للقا حين غايبنا يعود يوم شرفنا بعد طول غيباته سعد اسفرت لك وأنورت وستهلت بالرعود وامطرت لك من حشا المزن هتان وبرد ياولي العهد ياشيخ يانبع الصمود ياحكيم المعرفة ياسناد وياسند لايقربك المرض للخمول وللركود ولايزعزع قلبك الصلب حساد حسد المرض يب ينجلي يوم يالقلب الزهود قدرة من خالق الكون والفرد الصمد مالنا عن قدرة الله وافعالة صعود مؤمنين ولم يكن للولي كفوا أحد داعين ربنا بالركوع وبالسجود مشغلين اقلوبنا بالوعيد وبالوعد مستخيرين العمر فيك وافين العهود مرخصين بعزمنا لجلك روح وجسد بالرخا شعب على حق وبالشدة جنود وبالعطا حنا على الطيب للطالب مدد ما وطينا روسنا للجبان وللرشود ومايهز شعورنا لابريق ولا رعد حاميين ابلادنا من الحدود الى الحدود ولو يزيدون العدا بالعتاد وبالعدد تحت ظل الي عن الشعب وبطاله يزود قايد الفرسان للمجد ربان البلد الأمير اللي على الحق والعزه يقود جابر اللي لآخر المجد والهامة صعد وصرخة تملي لك الكون لأطراف الوجود وصرخة من قلب شايب وصرخة من ولد اشهد انك ياسعد قد ماقلت وقدود ولا سعد قبلك ولا فيه من بعدك سعد // |
جابر الخير
من ربوع الفخر والعز والظل الظليل من زلال الحرف بالقاف للحرف الزلال من اصالة جد من جد من جد أصيل من وصال الشعب للشعب لأسباب الوصال للوفا للجود للفخر للقلب الدليل للأمير اللي جمع كل ذربات الخصال من سنة سبعة وسبعين والعمر الطويل لي سنة سبعه وتسعين حكم بالعدال ميزك رب السماوات بالفعل الجميل وخصنا رب السماوات في حب الجمال المهابة والفخر منك يالسيف الصقيل والشموخ بعزتك فوق هامات الجبال ماتميل بعزتك يوم لوغيرك يميل كامل ياسيد الشعب ولله الكمال منزلك بقلوبنا فوق ماعينك تخيل ومنزلتنا عندك تفوق توصيف الخيال انت عشق الشعب للشعب ياخيل الخليل وأنت شمس عاشت الوقت لعناد الزوال وانت نور الشمس للناس وظلال النخيل والنخيل ان ظلل الناس مايلقى ظلال زهد ما تلتفت للكثير وللقليل حاكم للشعب عشرين عام باعتدال مايعادل جودكم لاكريم ولا بخيل في كلامك لو تجادلت مامثله جدال بسم شعب مارضى غير حكامه بديل لو تثور اعداه وتصبح فتنه من شمال مايقابل جابر الخير قداح الفتيل والرجال ان رادت الموت تفداها رجال والقياده والولا للاصيل بن الأصيل والغلا بقلوبنا يفتح لجابر مجال من سنة سبعة وسبعين والعمر الطويل لي سنة سبعة وتسعين حكم بالعدال ماتميل بعزتك يوم لو غيرك يميل كامل ٍ ياسيد الشعب ولله الكمال // |
صوت الفلاح
البارحه يوم اكتمل صوت الفلاح بمرقبي سبت الكويت بكبرها تبكي ورا ظهري وجيت اسج رجلي للمسا والليل يسبيني سبي وانا من البارح معاه اسري ولا كني سريت ما ارتح لين اني قريت اهلا بكم في ابو ظبي في ذمتي ما كني الا وسط بيتي في الكويت لأني ليامني نويت اسعى لتحقيق طلبي ما ينثني عزمي على قولة لعل ولا يا ليت ما قد تعبت الا لناس(ن) يستحقون تعبي ولا عنيت الا لظل(ن) يحتويني لا عنيت نصيتها من عقب وجه الله لوجه اليعربي اللي ليا مني تذكرته ليا ضقت اعتزيت فلاح ابن زايد يزود وتقصر متون وعبي الشيخه اللي من دخلت لقلب راعيها دريت ان الرفيق اللي يجنب خوة امثالك غبي وان الطريق لباب بيتك يختصر مليون بيت وان البخيت اهو الذي ياصلك لو كان يحبي وان الذي يتعب قبل لا ياصلك ما هو بخيت وإنك وطن ما حس فيه اني مسير واجنبي وإنك نهر شربت منه ومن بعدها ما ضميت وجهك غناي وراحتك كنزي وخوتك ذهبي اغضب من اللي يغضبك وارضى ليا منك رضيت يا شيخ انا ماني ملاك ولا رسول ولا نبي انا الجميل اللي حفظك وبحتفظ بك ما حييت انا رفيقك لا غداك الحزن يا شوق الظبي انا شريكك لو حزنك ولو فرحت ولو سليت خذني ذراعك صاحبك درعك معك باللي تبي درعك ذراعك صاحبك انا معك باللي بغيت اللي يحمله منكبك كأنه يحمله منكبي إليا سهرت اسهر معك واغفى ليامنّك غفيت يا سيدي لو يمتثل وزن القصيد لمطلبي لاكتب فلاح بكل حرف وكل شطر وكل بيت اكتب فلاح بمشرقي واكتب فلاح بمغربي اكتب فلاح ليا ذكرت وبكتبه لامن نسيت فلاح في صدري.. فلاح بكل شبر بكوكبي فلاح فيّ وفي عروقي من هنيا للكويت لا هنت يا مخجل يدي يا عزوتي يا مكسبي يا شعري ليامن كتبت وصوتي ليامن حكيت من يوم ما اوحيت الندى يجتثني من مرقبي سبت الكويت بكبرها تبكي ورا ظهري وجيت ما ارتحت لين اني قريت اهلا بكم في ابو ظبي في ذمتي ما كني الا وسط بيتي في الكويت // |
الفيصلي
في ظلال الله ساعة لا ظلال الا ظلاله يالامير الفيصلي الوافي العف الامين ياعناوين المروءه والشهامه والشكاله يالرحيب اللي قريتك في وجيه الطيبين خص مني بالكويت لفيصل الخالد لحاله دون خلق الله وغيره من جميع المسلمين يوم غيرك عن عطى يمناه ما تقوى شماله انت طبعك بالعطايا كل كفينك يمين قدرك اعلى من سفوح المزن واكرم من هماله طيب والطيب يبقى لك على مر السنين انت عنوان الرجوله وانت نبراس العداله وانت للمحتاج يمنى وانت للعيا جبين دامك الله يا ذراع المبتلي يا راس ماله وعزك الله للصعاب وثبتك دنيا ودين والله اللي عزنا بالدين من بعد الجهاله حيث كنا خير امه اخرجت للعالمين ويا صلاة الله على اللي بلغ وأدى الرساله سيد الامه امام الأنبياء والمرسلين وبعد ذكره في صلاتي لي ذكروا صحبه وآله قلت : صلى الله على آله وصحبه اجمعين // |
كلمة حق
الحكم حمله حمل وأهواله أهوال والذود عن مصالح الشعب كايد ياليت كل شعوبنا قد ألامال وياليت حكام العرب مثل زايد الله خلق صرح البطوله للابطال وماللرياده عرش من غير رايد عديت كلمة حق والحق ينقال لاعودت يم الفعول الفرايد خلوا سواليف الحزاوي والاطلال وأخذوا من الواقع علوم وكايد الفعل والله فعل زايد ليا قال ماهوب فعل متبعين الجرايد أكرم من اللي يطعن البخل بريال والهب من احساس الحطب بالوقايد وأصدق من الدمعه على خد الاطفال وأثبت من اسوار الحصون السدايد فعله لحال وفعل خلق الله لحال قايد ويحسب عن ثمانين قايد الكامل الله بس هو كامل أفعال سموه زايد لانه انسان زايد رحمه من الله جت على شكل رجال عضيد لكن عن جميع العضايد لوما القصايد تكتبه فخر واجلال اجل من اللي تنكتب له قصايد يابعد عمر الشعب والجاه والمال ياذخر ربعك بالليال الشدايد يارهبةٍ هزت سراجيف الانذال ياشوق تلعات الرقاب الرغايد بنيت جيل وصرت نبراس لجيال عدلٍ على سبع الامارات سايد رغم الكلل علمتنا نيل الأمال ووحدتنا رغم اختلاف العقايد لك صرح حافل بالمحبه ولازال وان بادت صروح الغلا منت بايد لو بالأبوه ... كلبونا لك عيال ولو بالمروه ... كلنا لك سنايد ياشيخ درعك درع ورجالك رجال شعبٍ زرع لرضى زعيمه شهايد تعلموا من نخوته ضرب الامثال وصارت لهم تصرفاته عوايد ان قلت زايد .. زايد سلوم وخصال وان قلت قايد .. عن ثمانين قايد ماقول طيبه لي حظر يعمل اعمال ومحبته تجمع قلوب وبدايد اقول لو الطيب مخلوق رجال يحب الارض اللي تحت رجل زايد // |
قلوبنا معكم
فمان الله يالشعب السعودي يا ذرى الاسلام نودعكم بأمان الله ولا ودي نودعكم على ان نلتقي معكم على يومٍ من الايام وحنّا لو تركناكم تعيش قلوبنا معكم كرمكم في ضيافتكم على صدر الجميع وسام مثل ما تصبح الكف الكريمه رهن اصابعكم طبايع والطبايع مجد لو مرت كثير اعوام عساها للعمر تبقى ولا تفنى طبايعكم // |
فخر الامجاد
ياطيب شوف مروتك مع هل الطيب كانك تبي تعرف اصول المروه طالع فلاح وتقطع الشك والريب خلك معه واللي يسويه سوه إذا المراجل عندك تحظر وتغيب تغيب عندك وتحظر مع سموه هذاك ماتحسن به الظن وتخيب راعي جميل وخوته غير خوه اسلوب طيبه غير كل الاساليب حموته ماهي مجرد حموه فعله لحاله طلع براسي الشيب بأسبوع جدد نظرتي للإخوه تسمع سكوته تحسب ان الحكي عيب تسمع كلامه ماتحسد المفوه ان كانها بالمرجله والمواجيب أعز من شبت على الارض ضوه فلاح شوق المترفات الرعابيب تفخر به امجاد العلا من علوه واثق بخلانه ثقة عالم الغيب ويوفي بميعاده ولو مع عدوه النو يسرق من يديه التراحيب ومكارمه تسرق من الغيث نوه واغلا صفاته جابها بالتجاريب وطهر سماته من سمات النبوه ان جيت له بالطيب بيجيك بالطيب ومن جاه بالقوه يجيله بقوه اصلا حلاة الآدمي سهل وصعيب مثل البحر يخفي غضبه بهدوه مدح بغير عيال زايد عذاريب الطيب نابع من حنان الابوه ياطيب لو كثرو عليك المعازيب واحترت بين مزبنين الجلوه طالع فلاح ويطلع براسك الشيب خلك معه واللي يسويه سوه إذا المراجل عندك تحظر وتغيب تغيب عندك وتحظر مع سموه // |
سمو المجد
جيت أسلم لابقلبي لاطموح ولاتمني الوكاد إني عنيت مودع تراب الكويت ويشهد الله يوم جيتك ياطويل العمر كني زاير الشعب السعودي في محله بيت بيت قبل أشوفك من وصوفك غير فكرك مافتني وبوجودك مثل جودك لاسمعت ولارأيت جيت أبطويلك مسافات الدروب اللي طوني ماعنيت إلا لوجهك بس كني ماعنيت خطوتين من الكويت لي بحر جده وجمعني مع سموك ياسمو المجد يافيصل وجيت والقصيد إن مارهنته تحت كفينك رهني لأن لو للطيب مبدأ فأنت أول من بديت أنخلق لله وجودي وانخلق لرضاك فني لوتحب أكتب كتبت ولو تحب أمحي محيت وشبغيت أمر تمنى لايغرك صغر سني شايف أنجوم الثريا جبتها لك لو بغيت لو بعيش أعطي كفوفك مثل ماكفوفك عطني لاتحسب أني بوفي لو عطيت ولوعطيت أشهدني ماوفيت ولو وفيت أنشهدني قلت عن نفسي مقصرواشهدني ماوفيت لأنك أغلى من عروقي والوريد اللي سكني واعتزازك تاج يبقى فوق راسي ماحييت لأختلف فيك شخص لازم أخلف فيه ضني وأن رويت الماي بروى مثل ماأضمى لاضميت وأنزعلت أزعل وأبرضى لارضى قلبك لأني واجب أزعل لازعلت وواجب أرضى لارضيت انت مثل البحر تعطي والعطى ثقل وتأني بس هو يعطي وياخذ وأنت ماعمرك خذيت محتفظ بأسمى صفاتك ومتبنيها تبني وأمتداد الملك خالد معدن وصوره وصيت كن الارض تقول يوم أقدام خلق الله وطني بعد رسله والصحابه أنت خير اللي وطيت ياطويل العمر لولا المستحى لتمل مني وقالوا إن لم تستح من شي ففعل ماشتهيت ولا أنا لولا الملامه والنصيب اللي حضني كان مسري من محلك لين أشوفك سريت لو ينال المرء بأدراك المطالب بالتمني كان أجل هموم قلبي تنتهي لو قلت ليت مغترب جيت متعني لك ولاني بمتعني وقتها كني رحلت من الكويت الى الكويت بس والله يوم جيتك ياطويل العمر كني زاير الشعب السعودي في محله بيت بيت // |
المملكه عندنا غير
يا طير غرد وازهري يا نواوير يا شمس طلي وانزحي يا غمامه ويا نفس زفي للوجيه التباشير ويا جفن كف من البكى والندامه من هالدقيقه ما للأحزان تبرير برجوع ابو خالد لنا بالسلامه مادام سلطان الكرم حي وبخير معاد ننشد لو تقوم القيامه بشت يذري عن عجاج المعاصير ووجه يرد ارواحنا بإبتسامه وكف يجود بلا حدود ومعايير وشهامة ما بعدها من شهامه اكرم من اللي ماخذ الجود تبذير واصدق من عتاب الخوي في خصامه واشد من ظرب السيوف الشواطير واجل من وصف يحدد مقامه سلطان ياقرم يقود الطوابير ياسيد الجيش السعودي وإمامه ياشوق تلعات الرقاب الغنادير يا منبر الدين الحنيف وحسامه جيتك وفي صدري وطن من تعابير وبخافقي حب الكويت وغرامه لان الرفيق يحن ويحس ويغير والصف الاوحد مستحيل انقسامه شعب الكويت يكن لك كل تقدير ويبلغ الشعب السعودي سلامه ويعاهدك مهما تدور المقدير نبقى لكم مثل الفشق في حزامه لأن قدر المملكه عندنا غير المحترم يفرض عليك احترامه واللي يوفي بألتزامه مع الغير عيب علينا ما نحفظ التزامه ياجارنا اللي ما حصل منه تقصير يا كبر دروع اهل الجزيره ظخامه ارض الحرم .مهد الكرم.منبع الخير طهر الظبا ستر العبي واللثامه يا قصة الكوثر ويا زمزم البير ويا موقع اقدام الخليل ومقامه اغلى ثرى تاطابه الرجل وتسير واكثر عباد الله ورع واستقامه ان كبروا هز الفضا صوت تكبير ولسجودهم في ناصيتهم علامه طول اللحا لوقارهم زود توقير وقصر الثياب ابهم جمال ووسامه اصحاب نهج ودينهم دين تذكير وآمالهم تبني وطن من عدامه لأن العمل يجمع شعوب وجماهير عمر الجهل ما عز للدين قامه ومن يدعي الاصلاح لأغراض تدمير ماظن للرحمه صله بأهتمامه الموعضه تيسير ماهيب تعزير وحنا نميز بالحلال وحرامه ما للهدف من قتل الاطفال تفسير وصبر على فعل الجرايم غشامه اكثر من اللي صار وشعاد بيصير المسأله وصلت حدود الكرامه مالله خلقنا في سمانا عصافير والحمد لله مالنا بالرخامه جهالنا عند المواجه مغاوير وافعالنا صبر وثبات وجزامه يوم الظعيف ببالشديده معيثير حنا ليا ضاقت نطش العمامه نفزع بوجه المدفع بسيف وبعير ولا عاش فينا من يرد بكلامه يامير ما يلحقكم الشك يامير ولا غيركم يا اهل الزعامه زعامه الله مدبر فيكم العدل تدبير ومعكم يسود امن البلاد ونظامه وإن كان للفتنه على الشعب تأثير يمكن تزود وحدته والتحامه الحكم حكم الله ولا فيه تغيير ودوامكم ياسيدي من دوامه والله لا عنتر ولا سالم الزير يقدر يزعزع بأرض الاسلام هامه دام الفهد طيب وابو متعب بخير والنايب الثاني رجع بالسلامه هلت على الشعب السعودي تباشير وقامت على حزب الضلال القيامه // |
كحيلان
يا شعر تبقى في نظرهم كحيلان وبنظرتي تسوى عيال الحمايل حنا الاثنين اخوان واكثر من اخوان لو ما اجتمعنا بالنسب والسلايل لو نختلف بأسماء وعروق وأوطان يبقى التشابه بيننا بالخصايل وانا ليا مني نويت أكسب إنسان أسعى له بكل السبل والوسايل أعرف كيف ارد الاحسان باحسان وكيف احصد بذور الفضايل فضايل عايش زمن عاصرت به كل الازمان ما اعيل بس انطح ثمانين عايل اكسب عدو واحرق به قلوب عدوان اشعل فتيله بس أطفي فتايل إن خفت ضعف أخاف من ضعف الإيمان وإن عفت حمل أعاف حمل الجمايل ما أضمى على الساحل ولو مت غرقان لو مركبي تابوت والموج هايل أغرق شهيد أرحم من أموت عطشان طيحة شموخ ولا وقوف متمايل ودك ليامن جيت في كل ميدان لو ما انت الاول بالصفوف الأوايل خلك ليا عودت خسران خسران ينقال عنك عامل(ن) لك عمايل لا صرت تحلم احلم تكون سلطان وان جيت تقنع اقنع بحلم زايل الوقت غربة وآخر الدرب عنوان والعمر رحله والتجارب رحايل وانا كثر مالي من الناس خلان اللي صفولي بالشدايد قلايل شايف حسد.. قل شايف اشكال والوان قابلت ظلم.. الا لقيت الهوايل وإن عشعش بصدري من الغبن شيطان وتسددت دوني جميع الوسايل بلقى من عيال الحمايل كحيلان اللي يكفي عن عيال الحمايل مرات ربك يرزقك خوة إنسان واحد ويسوى في عيونك قبايل // |
اقرب الناس
بمشي على درب له الناس يسعون واصد عن درب الدجي والعتامة وبقصر اليسرة عن الضيم والهون وطلق يميني للصخا والكرامة وبحترم نفسي وانا شخص ممنون ومن يحترم نفسة وجوب احترامه ماني من اللي في ذرى الحيط يمشون ولامن اللي معتلي في مقامه متواضع وأمشي على الحق بالهون متوسط المعرفة والشهامة ولي مجلس دايم له الناس يلفون شرعت بابه والدلال العلامه مايفتح الا فيه الاجواد يدنون ويالله عسى اللي يقرب للسلامه هذا طريقي وكثر الناس يدرون صديت عن درب حلاله حرامه ميزت ربعي بين عاقل ومجنون واكشف بليد المنفعة من سلامه واهل المصالح لو على يوم يبنون في يوم ثاني يرغبون الهدامه واهل الحكي لو لك عن الناس يحكون بيجيك يوم ويقصدك في كلامه لاصار سيفة لاقرب الناس مسنون يضرب رفيقة وان اقوى في عضامه ناس مع الكلمة يروحون ويجون بس المصيبة يدعون الفهامه ولانيب ديان ولانيب مديون ولا بغيت من الهروج الملامه ولاطلبت من المخاليق يبكون ولا بغيت من الحزين ابتسامه بمشي بدربي واترك الناس يمشون كلن على كيفه رقى كل هامه ولا صرت انا من راعي الطيب مطعون ابيستوي قرب الرفيق وعدامه وأن خاب ضني بأقرب الناس وشلون بعطيك ضني يارفيق الندامه // |
قصة حياة
جتني ظروف للكدر مستعده قامت تحدد لي الاحزان ميعاد مرة مع حظي ومرات ضده واليا تكدر خاطر القلب تزداد في دنية خلقت على الناس نده مردودها للخير تجرح واجهاد إتجي على المظلوم وتبيح سده واتجي على الظالم تساهيل وامداد والصدق فيها ما لقى من يعده والكذب يلقى له مع الناس شهاد واللي فقد حق عجز يسترده يصبح على تسديدة الدين معتاد ومسكين من راد الزمن يستبده عيت عليه اقدار الايام تنقاد تطرح به الدنيا على القاع مده مثل الفريسة والمقادير صياد ضاعت حياته في لحاف ومخده عدت عليه ايام بغفول ورقاد وماله عن دروب الوعر من يصده ولا هو عن دروب السلامات نشاد تلطمه مو جات القدر فوق خده وتخطي به الخطوة من بلاد لبلاد حبله قريب وعاجز لا يشده يحسب جميع الناس قاصين وبعاد عاند حياته لو حياته تحده وادى سنينه كلها عناد بعناد إصحى من الغفلة ترى العمر حده للوقت سجاته وللموت ميعاد وهذي هي الدنيا تجي مستجده تلقا بها المازح وتلقا بها الجاد قصة حياة ومننا مستمدة ويلزمها تنفيذ وإخراج وإعداد عشنا على كف القدر فوق يده الله خلقنا عباد ونفني له عباد ولا حاصل للحي ماكان وده ولا حاصل للي يموتون ميلاد ويكفيني اني من ظلوه الموده ومالي مع الخسران بالدين مقعاد وإن جتني الغفلة علي اوقات شدة اصبح لها صداد والقلب صداد وتقدير ربي مالنا في مرده ومعارض لتقديره إشراك والحاد // |
أثني عشر شهر
التحدي والتصدي عادة القلب الصبور والصمود اقرب مسافة لكن الفترة دهر والخساير عاندتني حوطتني بلف سور والخيانه للامانه زودت قلبي قهر كنت ابقدم للنهاية لكن الدنيا تدور وقفت وياي ليلة وكتمل ضدي شهر كل ماطلت الحقيقة وامتلا قلبي سرور طاولتني من عذولي طعنة وسط الظهر حرت اميز في دروبي بين نار وبين نور بين هجعة ليل ولا صحوة اجفان وسهر خانت ظنوني وعيوني خانني ذاك الشعور اقطف الشوكة بكفي واحسب الشوكة زهر مشتهر بلسان صادق ماحكيت الصدق زور ولا حكي عني لساني ولا جهرت ولا جهر كم كتمت السد وافي خايف اعصابي تثور لين باح السد لما مدمعي بان وظهر ولا طوت رجلي مسافة ولا اثر فيني شهور ولا كوت قلبي حريقة ولا طفلي ضوى نهر معتري درب النهاية بعبر ضفاف البحور واشبك الدنيا بكفي وادفع ايامي مهر ودام هذا عنفواني واضح بين السطور من يلوم الدرب فيني لو قهرته او انقهر وبتدى مرة جديدة ودام انا قلبي جسور تجربة والعمر مرة والسنة اثنا عشر شهر // |
| الساعة الآن 11:57 PM |
|
Powered by vBulletin® Copyright ©2000 - 2024, Jelsoft Enterprises Ltd.