منتديات منابر ثقافية

منتديات منابر ثقافية (http://www.mnaabr.com/vb/index.php)
-   منبر الشعر الشعبي والمحاورات الشعرية. (http://www.mnaabr.com/vb/forumdisplay.php?f=6)
-   -   في صـُحبة ِ البـَدْر ~ (http://www.mnaabr.com/vb/showthread.php?t=1022)

أمل محمد 09-02-2010 02:22 AM

لاتقول

لالا تقول ودعتني داري
بالحيل مالي عليك عتاب
مريت في موعدك ساري
وقفت لين النجم ماغاب
الليل تحت الشجر عاري
والفجر غطى السما بثياب
والريح في كفوفها الذاري
تدفن ارسوم الوعد بتراب
مريت ماللوله طاري
ووقفت ماللندم اسباب
مدري تعودت مشواري
أو خان بي قلبي الكذاب



//

أمل محمد 09-02-2010 02:23 AM

ليه



ليه انكسر ... مثل القزاز ..
كل مرةٍ .. أبوح همي .. وتسمعه
ياصاحبي .. وش حاجتك .. في غرشةٍ
طاحت شظاياها بيدك ..
وش حاجتي .. فما تجمعه ..
لي صاحبٍ .. كل مااشتكيت ..
همي عليه
دايم يجرح اصبعه ..
واصاحبي
الشكوى بها ذل ..
حدٍ رهيف .. أنما جرح يقتل ..
الشكوى ماتلبس ثياب..
عريانةٍ ماتلبس ثياب ..
في وجه راعيها ..
أموت أنا لو قلتها .. وأموت ابخفيها ..
ياهيه .. وان كانك رفيق
قم دلنى .. على طريق ..
ماهو يوصلني لطريق ..
عن يمةٍ .. غير الجهات الأربعه ..
اطلق حبال الليل .. خل الظلام يسري ..
المركب اللي كل مافل الشراع .. قلنا بعد بدري
ابي .. اوقظ النوم .. وأهدهد اسهادي..
أحفر في رمل وسادتي .. قبرٍ وسيع ..
أبي ادفن اعنادي ..
ابطرد الدنيا ورى باب الجفن .. وأغمض اعيوني ..
مابي اعض ابهامي بسنوني .. واشكي عليك ..
الليل كله .. ياصاحبي
نجم يطيح .. خله .. خله يطيح .. لاترفعه ..
أنا انكسر مثل القزاز .. كل مرةٍ تدري بهمي وتسمعه





//

أمل محمد 09-02-2010 02:23 AM

ناي

في الشارع .. عتمه ونور ..
زحمه ..واشارات مرور ..
تاقف على انفاس الطريق ..
مشيت انا ..وهمي العتيق ..
وقبل التعب .. مايهدني..
سمعت صوتٍ شدني ..
ناي .. في صوتها ناي ..
غنى وجرّحني الشجن ..
دقات قلبي .. وقفن..
وخطاي
قالت وش الوقت ...
ناظرت ليل اعيونها ...
وصبح الجبين ..
ومرت ثواني صمت ...
وقلت الزمان .. انتى..
وكوني اللي تبين ...
من يومها ماعاد اناظر ساعتي ..
وش حاجتي .. أعد الزمان ..
وهى الزمان الجاي





//

أمل محمد 09-02-2010 02:23 AM

شكراً صدقت

لو كـان في كفي رميته في كفك

يفـداك مافي الحب من صـادق الحب

تـحبنّي؟..ياعلّني بعض ضـعفك

قلبي جـرادٍ بعد مـا حصـّل العشب

أنا قـديم الـهم وأنفـع لعطفك

أما الـهـوى ياسـيدي مركبه صعب

يا ليت لي صهوة جوادٍ وأخطفك

للشمس لنجـوم المجـرات..للشـهب

تحبني..وأقـول من زود لـطفك

شكراً صدقت..وألف شكراً على الكذب




//

أمل محمد 09-02-2010 02:24 AM

أقـوم بجبال

أقـوم بجبـال ولا أقيم في سفـح

لـو أطعموا لحمي لعوج المخالب

يابنت مابه ذنب يصعب على الصفح

كود الهوان وعيش سحم الثعالب

لاوالذي كرّم جديلك عن النفـح

العز ماهو بين شـاري وجـالب

الله خلقنـا تلفـح وجيهينا لفـح

حـر السمايم في عزيز المـطالب

سـوى رضينا أوطفح كيلنا طفـح

عض النواجـذ طبع والطبع



//

أمل محمد 09-02-2010 02:24 AM

لامن غديتي شمس

لامن غديتي شمس .. وشلون اعذلك
لابد مايظهر مع طلعتك نور
ماالومهم وان لدت عيونهم لك
من ناظرك ياربة الحسن معذور
تلطفي وان كحل التيه نجلك
وتواضعي لوبك غدى الحسن مغرور
أغار لو بالزين قد ذكر مثلك
وأغار لو غيري سبقني لك شعور
لاصار لي قلبك.. وروحك .. ووصلك
لاقافلٍ باب ..ولا بانيٍ سور




//

أمل محمد 09-02-2010 02:25 AM

عظم وغضاريف

في دربـكم يا راحلين منا منـاكيف

تـالي ليـالي القيظ و أول خـريفه

ردّوا سـلام أهل القلوب المـواليف

على الوليف اللي نشــد عـن وليفه

ردّوه لعـذوق النخيــل المهـانيف

وعلى القصـور اللي بـوادي حنيفه

دارٍ لهـا بالقلب عشــق وتـكاليف

يـاعـل عيـن مـاهـوتها كـفيفه

طـبنا وشـبنا وأتـعبتنا المشـاريف

والمـرقب العـالي هبـوبه عـنيفه

يا وارديـن العـد..كفـّوا المغاريف

اللـي بقـى دمـع هـماجٍ ذريـفه

والله لــو دمّي يـغيث المـلاهيف

قطعت عـرقي ليـن يصفى نـزيفه

ويا حظ من لا عرف منهو ولا شيف

إن طـاب..يحمد وإن تـردّى..بكيفه

وحنا ورثنا العـز عظم وغضاريف

لا مـا ورثـنا العـز تـاج وقطيفة




//

أمل محمد 09-02-2010 02:25 AM

ياسيّد الناس

الما ركـد والجريد الغض..ما هـزّه

نسـايمٍ والـزمـن لا جـا ولا راحي

جمحت يا مهر حظّي وأثر بك فـزّه

ما طـوّلت كلها غـارة ومشـواحي

لو كنت رمحٍ بكفّي كنت با هـزّه

لاشـك منهـو عليه أهوش بسلاحي؟

ولو كنت بيرق عقيدٍ ويـن أبا رزّه؟

وأطـول طويل أشوف..هضبة جراحي

يا سـيّد الناس..شمسك مالها حـزّه

تعبت أمـاري بشمعي وضي مصباحي

من مس نورك جبينه يبشـر بعـزّه

ومـن مـر ليلك عتيمه بارقـه لاحي

يا سـيّد النـاس..كلٍ لابسٍ بـزّه

صعب إن أفرّق ما بين الخبل والصاحي

كم واحدٍ مـر..قال عيـوني تخـزّه

هو ما درى إني عمى عن قاصر أشباحي

أنـا عيـوني تتـل النجم..وتكـزّه

عن حـارك الفلك..هذي عادة رماحي

وما ألوم حظي..تعب من كثر ما دزّه

لو هـو لغيري..نسـاه الهم..وإرتاحي


//

ساره الودعاني 09-02-2010 02:36 AM


تسلم يدك ويسلم ذوقك يا امل

شاعر رهيب جدا

طلعت على الشعر من خلال

دواوينه..

مودتي لكِ خالصة

أميرة الشمري 09-02-2010 08:49 AM

تسلمين ياأموووولة
على النقل المميز
وشكرا على تعريفنا بالشاعرالكريم
تحياتي تسبقها مودتي


الساعة الآن 08:19 AM

Powered by vBulletin® Copyright ©2000 - 2024, Jelsoft Enterprises Ltd.

Security team