ثلاثيات ورباعيات سامح الشبة [الأرشيف]

سامح عبد البديع الشبة

06-07-2006, 10:41 PM

( 1 )
خليك ع الأرض ماشى
وأوعى تطلع فوق
ازعق وقول ماشى
واتكلم برضه بذوق
دا أنت ع الأرض ماشى
وبكره تطلع فوق
******

هند أبو العينين

06-07-2006, 10:47 PM

ما شاء الله
سامعينك يا أستاذ سامح
كمّل أرجوك

سامح عبد البديع الشبة

06-07-2006, 10:55 PM

( 2 )
سافرت مع موجة زرقة فى حضن البحر
حدفتنى فى موجة تانية مالهاش بر
لاقيت نفسى فى دوامة بتجر
لا أنا فيها حزين ولا بتسر

*****

سامح عبد البديع الشبة

06-07-2006, 11:11 PM

( 3 )
حبست نفسى فى زنزانة
ملهاش آخر
لافيها حد بيتكلم
ولا حد بيقول اتاخر
وأدى دنيتى أنا وحدى
أنا المسحور فيها
وأنا الساحر
دنيا صغيرة على قدى
بعيدة عن العالم الساخر
*****

سامح عبد البديع الشبة

07-07-2006, 06:22 PM

( 4 )

قلت أعمل حساب للزمن وأوفر
وأحط القرش ع القرش يكتر
يمكن بنت الحلال تقدر تصبر
لما البيت الصغير يكبر
*****

سامح عبد البديع الشبة

09-07-2006, 04:26 PM

( 5 )

علمونا إزاى نكتب الحروف
وإزاى نواجه كل خوف
ولما جات فرصة المواجهة
تعالى معانا اتفرج وشوف
*****

سامح عبد البديع الشبة

11-07-2006, 10:00 AM

( 6 )

يا عينى ع الولد اللى صوته اتنبح
وراح فيها لمـا شـاف الشــبح
بيقرب منه ويقطع كل الصحـف
ويوشوش ف ودنه كان غيرك فلح
*****

سامح عبد البديع الشبة

11-07-2006, 10:03 AM

( 7 )

زمان هتفنا بأعلى صوت
يا إما النصر .. يا إما الموت
ومرت أيام .. وجات أيام
والخوف جوانا ما له صوت
*****

سامح عبد البديع الشبة

11-07-2006, 09:03 PM

( 8 )

قلت أعمل لنفسى تابوت
قبل ما تمر الأيام وتفوت
ما احنا فى زمن يا بنى
ما تعرف له حياة من موت
*****

سامح عبد البديع الشبة

12-07-2006, 09:20 PM

( 9 )

قيس وليلى اتولدوا من جديد
واختلت الحكاية وخلفوا سعيد
تعالى واسمع من عمك قيس
إيه اللى جراله وإزاى بقى شريد
*****

سامح عبد البديع الشبة

12-07-2006, 09:56 PM

( 10 )

سلمت ف مرة على حوت
ماشى ع الأرض معاه " ريموت "
شتمته وضربته فى خيالى
وورايا ساكن جسدى فى تابوت
*****

سامح عبد البديع الشبة

13-07-2006, 01:06 PM

( 11 )

قول للحمار يا حمار شى هايمشى
وقول يا بنى آدم إمشى ما يمشى
مهما ضربته بالعصا والسوط
اللى ف دماغه ف دماغه هايمشى
*****

سامح عبد البديع الشبة

13-07-2006, 01:17 PM

( 12 )

الدنيا سجن كبير وعجيب
فيه الحبيب فى ضل حبيب
لو غابت فيه يوم الشمس
ما تعرف قريب من غريب
*****

سامح عبد البديع الشبة

13-07-2006, 10:14 PM

( 13 )

قمت أصلى الفجر لله
وأدعى ع اللى ربنا نساه
يارب خد بإيد الظالم
وعلى جهنم .. ما تسمع نداه
*****

سامح عبد البديع الشبة

13-07-2006, 10:15 PM

( 14 )

الدنيا بنت حلوة مؤدبة
لابسة طرحة بيضة منقطة
ماسكة بإيديها نار مولعة
للى يقرب منها تولعه
*****

سامح عبد البديع الشبة

14-07-2006, 09:33 PM

( 15 )

ع الفول صحينا وافطرنا
واتغدينا واتعشينا ونمنا
ورجعنا صحينا وقومنا
لقينا طبق الفول ملازمنا
*****

سامح عبد البديع الشبة

14-07-2006, 09:34 PM

( 16 )

ألمح فى عيون الناس كلام
يجيبوا فى سيرتى كتير ما نام
أفكر ودقق فى كل نظرة
أقول دا علام مش كلام
*****

سامح عبد البديع الشبة

14-07-2006, 09:37 PM

( 17 )

غنيت للناس أغانى ومواويل
ورقص الشجر ومال النخيل
وفرح النهار وسهر الليل
ونسينا زمنا وارتضينا بالبديل
*****

سامح عبد البديع الشبة

14-07-2006, 09:38 PM

( 18 )

قلت الوطن بيتباع يا رجالة
ومافيش حاجة أغلى م الكرامة
قالوا لنا الحكاية بسيطة خالص
حبة جاز على بنزين وولاعة
*****

سامح عبد البديع الشبة

14-07-2006, 09:39 PM

( 19 )

نقطة ورا نقطة ورا نقطة
لابد فى الآخر هاتجيلك نقطة
من نقطة عيش وملح وهدمه
لنقطة كلمة توصلك للنقطة
*****

سامح عبد البديع الشبة

14-07-2006, 09:40 PM

( 20 )

قلنا عروبة وقومية
راحت دى .. جات ديه
وبقلنا على الحال دا كده
قول ألف سنه وشويه
*****

سامح عبد البديع الشبة

14-07-2006, 09:42 PM

( 21 )

سجنو الكلمة فى لسانى
قلت ومالو ما أنا المسجون
سلبو العقل من راسى
قلت ومالو ما أنا المجنون
سحبو البذرة من فاسى
قلت ومالو ما أنا المديون
حبيت اتكلم واعقلها واتوكل
مالقيت نفسى إلا وأنا مدفون
*****

سامح عبد البديع الشبة

15-07-2006, 12:10 PM

( 22 )

كويس .. كويس .. كويس .. كويس
كله هنا.. كويس .. كويس
وكمان هناك .. كويس .. كويس
وفى كل حته .. كويس .. كويس
*****

سامح عبد البديع الشبة

15-07-2006, 05:05 PM

( 23 )

مال عليه صاحبى وقالى يا خايب
ماله حبل الوصال عندك كدا دايب
رديت عليه بعكازى وبشعرى الشايب
الولد مهما كبر عمره ما هيبقى شايب
*****

سامح عبد البديع الشبة

16-07-2006, 12:46 PM

( 24 )

أيوه علمتنا الدولة ومابننكرش
وخادت بروزم الروزم وماخلتش
وزرعت فى عقولنـــا مبدأ
اللى معاه قرش يساوى قرش
*****

سامح عبد البديع الشبة

16-07-2006, 12:49 PM

( 25 )

الجهات الأصلية فى بيتنا مخرفة
فى الجنوب صورة لبنت مِدمعة
وفى الشرق عجوز بهدوم مِرقعة
وفى الشمال لولد فيه النار مولعة
*****

سامح عبد البديع الشبة

16-07-2006, 01:12 PM

( 26 )

اكتب يا أديبنا اكتب واكتب
مهما كانت تحتك الأرض
بتتشق .. اكتب واكتب
ولا كانت فوق رقبتك سكينة
بتدق .. اكتب واكتب
ليوم يغيب فيه القمر
وينشق .. اكتب واكتب
*****

حمود الروقي

16-07-2006, 02:17 PM

راااائـع واللـه رااااائـع يـا ســامـح .. وثـلاثـيات وربـاعـيات أجـمـل ...

اكـتـب مـا شـئـت .. فالمـكـان لك هُـنـا بحـجــم الفـضــاء ..

عـتبـي عـلى نـفـســي .. أيــن أنـا مـن حـروف قــرأت ؟!!

سـامـح .. مـتــابعـون لـ روعـتــك ...

تـقـبـل التحـيــة والتـقـديــــر ...

أخـوكـ

سامح عبد البديع الشبة

17-07-2006, 09:47 PM

سامح عبد البديع الشبة

17-07-2006, 10:10 PM

( 27 )

صنعت فى يوم عربية لعبة
بأربع عجلات وموتور شِحته
مشت العربية ببطء وبسرعة
وكان اللى سايقها الواد سِعده
*****

سامح عبد البديع الشبة

17-07-2006, 10:12 PM

( 28 )

كنا زمان أطفال شاطرين
فى الجد واللعب والحب
ولما كبرنا صبحنا خايبين
فى الحب والصدق مش نافعين
*****

سامح عبد البديع الشبة

17-07-2006, 10:13 PM

( 29 )

طقت فى دماغى فكرة وراح أعملها
أجمع أعلام بلادى واظهر معالمها
وألغى كل الحدود ويبان أصل معدنها
قبل قرارات الكراسى وكدب عاملها
*****

سامح عبد البديع الشبة

17-07-2006, 10:15 PM

( 30 )

كلمة الآهـ فى لسانى بتقول آهـ وآهـ
لما تيجى تقول الآهـ آهـ وهى آهـ
ولما تيجى تقول الآهـ وهى مش آهـ
فيحسدوك على حالك ومن قولة آهـ
*****

سامح عبد البديع الشبة

18-07-2006, 06:37 PM

( 31 )

خيرونى ما بين الألوان
فاخترت أنا الأسود
قالوا لى ما له الأبيض
قولتلهم بكره يتقبل اسود
قالوا لى طب والعسل
قولتلهم أحلى مافيه الأسود
قالوا لى اتفاءل بالنهار اللى جاى
قولتلهم يا خوفى يتقلب اسود
*****

سامح عبد البديع الشبة

18-07-2006, 07:05 PM

( 32 )

كتير سألونى عنى وعنها
قلتلهم هاشيل همى وهمها
جيت أدور على همى
صعب عليه همها
*****

سامح عبد البديع الشبة

18-07-2006, 07:08 PM

( 33 )

يا لى الكورة دايماً فى ملعبك
وعمرها ما طلعت بره آوت
سنتر وباصى وشوت إيه يمنعك
دا عمرك ما جالك أبداً آوت
فن الكلام المزوق دا لعبتك
واحنا اللى دايماً فى الآوت
*****

سامح عبد البديع الشبة

18-07-2006, 09:53 PM

( 34 )

ملكت فى ساعة واحدة العالم فى إيديه
لاقيته حته واحدة من طينه وشوية ميه
وصبح فى ساعة تانية مش ف إيديه
حبة تراب رماهم الهوا ف عنيه
*****

سامح عبد البديع الشبة

19-07-2006, 06:33 PM

( 35 )

حط على شباك بيتنا حمام جم
مكسور الجناح وبينزف دم
سال ع الحيطان وصبحنا ف هم
وجه علينا الليل بجرح ما يتلم
*****

سامح عبد البديع الشبة

19-07-2006, 09:42 PM

( 36 )
عديت على بحر الهوا
وفردت أنا دراعى
شدنى بحر الهوا
قلت يا دراعى
سألت عن جنيته
فردت مافيش داعى
وابعد عن سكته
دا الغدر فيه راعى
*****

سامح عبد البديع الشبة

20-07-2006, 01:57 PM

( 37 )

قلبى قايد فيه النار

للى بيحصل ف الدار

قالوا نبنى أقوى جدار

صرخت لأهـ .. هاضرب بالنار
*****

سامح عبد البديع الشبة

21-07-2006, 09:23 AM

( 38 )

شفت ألوان كتير متلونة ع الخدود
الأبيض لون الفل والأحمر لون الورود
بس عمرى ما شفت ألوان كتيرة قوى
إلا على جناحين الحمام وع الحدود
*****

سامح عبد البديع الشبة

21-07-2006, 02:22 PM

( 39 )

الأستاذ الكبير قاعد على مكتب
جاله الفراش ومعاه واحد سحلب
مرة يشطب والتانية يشرب
قال إيه الأستاذ بيكتب
*****

سامح عبد البديع الشبة

21-07-2006, 02:23 PM

( 40 )
حاجة واضحة وزى الشمس
مش محتاجة نظر ولا همس
موافق ... مش موافق
الحرية دى كانت بالأمس
*****

عروسة الشمال

21-07-2006, 09:02 PM

ماذا سنقول لكي بعدما قلته

ما علينا إلا أن نقول أحسنت

تقبلي تحياتي زهرية

سامح عبد البديع الشبة

21-07-2006, 09:47 PM

ماذا سنقول لكي بعدما قلته

ما علينا إلا أن نقول أحسنت

تقبلي تحياتي زهرية

عروسة الشمال

شكراً لوجودك بين رباعياتى ، وأحب أن أذكرك بشئ ألا هو :-

ليس كل شئ قد قيل ، فهناك الكثير لم نقله .

تقبلى تحياتى وتقديرى

سامح عبد البديع الشبة

21-07-2006, 11:02 PM

( 41 )
حبيتك يا حبيبتى ومش هاقدر أقولك
عشان انتى من سنى وأنا من سِنك
وبكره يجى اللى يشترى ويقدر
ويخطفك من كفى ويبعدنى عنك
*****

سامح عبد البديع الشبة

21-07-2006, 11:06 PM

( 42 )

يامه تعالى شوفى حالى
وتعالى شوفى اللى جرالى
دا كل واحد من إخوانى
رافع عَلمه وبيقول وأنا مالى
*****

سامح عبد البديع الشبة

22-07-2006, 04:02 PM

( 43 )

عشموها كتير بالحلق
وذاع النبأ ع الملأ
لا هِى فِرحة بودَنها
ولا هى دِخلت السبق
*****

سامح عبد البديع الشبة

22-07-2006, 04:03 PM

( 44 )

سألتك بتحب .. ما جوبتنيش
طب رد .. أيوه .. مافيش
رسينى .. اسكت وأحب وأعيش
ولا أصد .. وابعد عنك .. ولا جيش
*****

سامح عبد البديع الشبة

22-07-2006, 04:10 PM

( 45 )

شبابيك بيتنــا القديم كلها قديمة
ما بين الخرسانة والطوب ما هى سليمة
فكرت أشيلها بالشاكوش من مطرحها
جات ريح من الشمال بنسمة عليلة
*****