أيوه بغير

[سارة رمضان]

أيوه بغير - الشاعر المصرى هشام الجخ



و بقولها ..
أيوة بغير
أيوة بغير
لا أنا نقصان
و لا ضعفان
و لا مسطول
و لا سكران
و لا زايل من عينى الضى
و لا حد أحسن منى فى شى
بس بغير
و اللى قالولك غيرة الراجل قلة ثقة او قلة فهم
خلق حمير

غيرة الراجل
نار فى مراجل
نار بتنور مبتحرقش
و احنا صعايدة بنستحملش
شمسنا حامية
و عرقنا حامى
و طبعنا حامى
و اللى تخلى صعيدى يحبها
يبقى يا غُلبها
أصلنا ناس على اد الطيبة كلنا هيبة
و النسوان فى بلادنا جواهر
طب لو عندك حتة ماس
هتخليها مداس للناس !!
و للا هتقفلى أوضه عليها بمية ترباس
يمكن حتى تاجرى ليها جوزين حراس

يبقى أنا
لا أنا غافل و لا جاهل
كل الفرق ما بينى و بينك
إنى صعيدى
ينعل أبو ده اليوم الأكحل
اللى طلعت لقيتنى صعيدى

لو كان بإيدى
كنت اعملك هندى بريش
و أجلب شعرى كنيش كراويش
و ألبسلك سلسلة متدلدلة خرزة و قلب
بس إزاى ألبسلك سلسلة هو أنا كلب !!؟
ثم العبرة مهيش فى اللبس
أصل المشكلة مهيش فى اللبس
أصل المشكلة عندك .. عندك .. عنادك

قلت هسيبها و بكرة تحس
بعده تحس
بعده تحس
ده أنا لو جبس كنت زعقت
ماشى صداقة و ماشى زمالة
بس مجتش على الرجالة
ما هى نسوان الدنيا كتير
و انا مبقولش تخاصمى الناس
و للا تتحجبى عن الرجالة
و لا تعتكفى و تسكنى دير
بس ياريت حبة تقدير
انى بحبك و إنى بريدك
و إنى زرعت حياتى فى إيدك
و إنى غزلت بنات الدنيا عقود على جيدك
و إنى تعبت من التفكير
و إنى بغير


شاهدوها إليها هنا بإلقائه :
http://www.youtube.com/watch?v=TnzRQm4hx3o

[أحمد النواوى]

رائع إختيارك
وتدعيمك للقصيدة بالإلقاء الحي للشاعر

[سارة رمضان]

رائع إختيارك
وتدعيمك للقصيدة بالإلقاء الحي للشاعر

هشام - فى رأيى - الأفضل لقصائده أن تشاهد و تسمع من أن تقرأ ,

شكرا لمرورك .

[تيمه الشمري]

ساره
جميل ما قرات هنا
وللعلم اول مره اقرا شعرا شعبيا باللهجه المصريه
دمتي بخير عزيزتي